ކޮލެޖް އަދި ޔުނިވާސިޓީތަކަށް ޚާއްސަކޮށްގެން ކުރިއަށްގެންދިޔަ އައިޔޫއެމްއެސްޔޫ ހޭންޑްބޯލް ފިއެސްޓާ 2023 ގެ ޗެމްޕިއަންކަން ވިލާ ކޮލެޖާއި ޤައުމީ ޔުނިވާސިޓީ (އެމްއެންޔޫ) އިން ހޯދައިފިއެވެ.
ދިވެހިރާއްޖޭގެ އިސްލާމިކް ޔުނިވާސިޓީގެ ދަރިވަރުންގެ ގުޅުމުން އިންތިޒާމްކުރާ އެ މުބާރާތުގެ ފައިނަލް ރޭ ގައުމީ ހޭންޑްބޯލް ދަނޑުގައި ކުޅެވިގެން ދިޔައިރު، ފިރިހެން ޑިވިޝަން ކާމިޔާބުކުރީ ވިލާ ކޮލެޖްގެ ސްޓޫޑެންޓް އެސޯސިއޭޝަން އެވެ.
މިދިޔަ އަހަރުގެ ޗެމްޕިއަނުން ކަމުގައިވާ މެޕްސް ކޮލެޖާ ވާދަކޮށް، ވިލާއިން މޮޅުވީ 16-12 ގެ ނަތީޖާ އަކުންނެވެ. އެ މެޗުގެ އެންމެ މޮޅު ކުޅުންތެރިއަކަށް ހޮވިފައި ވަނީ ވިލާ ކޮލެޖްގެ ކީޕަރު މުހައްމަދު ޝައްބާން އެވެ. ގޯލަށް އަމާޒުކޮށް ފޮނުވާލި އެތައް ބޯޅައެއް ހުށިޔާރުޔާރުކަމާއި އެކު އޭނާ ދިފާއުކުރި އިރު، އޭނާއަށް ވަނީ މުބާރާޓުގެ އެންމެ މޮޅު ކުޅުންތެރިޔާގެ މަގާމްވެސް ލިބިފައެވެ.
އަންހެން ޑިވިޝަނަށް ފައިނަލަށް ބަލާއިރު، ކްލިކާއި ދެކޮޅަށް ކުޅުނު މެޗު 28-12 އިން އެމްއެންޔޫއިން ކާމިޔާބުކޮށް މިވަނީ ވާދައިގެ ތަށި ދިފާއުކޮށްފައެވެ. ދޫދިނުމެއް ނެތި، އެމްއެންޔޫއިން ފޯރިއާއި އެކު ލަނޑަކަށްފަހު ލަނޑެއް ޖަހަމުން ދިޔަ އެ މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ ފިރުޝާނާ ނަސީރު އެވެ. މުބާރާތުގެ ތިން މެޗެއްގެ އެންމެ މޮޅު ކުޅުންތެރިޔާގެ މަގާމް އޭނާއަށް ލިބިފައިވާއިރު، މުޅި މުބާރާތުގެ އެންމެ މޮޅު ކުޅުންތެރިއަކަށްވެސް އޭނާ ހޮވިގެން ދިޔައެވެ.
ފައިނަލްގެ ދެ މެޗުވެސް ޝަރަފްވެރިކޮށްދެއްވާފައި ވަނީ ރައިސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދު އެވެ. އެކަމަނާ ވަނީ ނިމުމުގެ ރަސްމިއްޔާތުގައިވެސް ބައިވެރިވަޑައިގެން ޗެމްޕިއަން ޓީމަށް ޓްރޮފީއާއި ހަދާނީ ލިޔުން ހަވާލުކޮށްދެއްވާފަ އެވެ.
ފަސްޓް ލޭޑީގެ އަރިހުގައި ހަޔާ އެޑިއުކޭޝަން މިނިސްޓަރު އިބްރާހިމް ހަސަންއާއި، އިސްލާމިކް ޔުނިވާސިޓީގެ ވައިސް ޗާންސެލަރ ޑރ. އިބްރާހިމް ޒަކަރިއްޔާ މޫސާގެ އިތުރުން މައްޗަން ގޯޅި ދެކުނު މައްޗަންގޮޅީ ދެކުނު ދާއިރާގެ މެންބަރު އަހުމަދު ހައިތަމްއާއި ރާއްޖޭގެ ޔޫތު ކައުންސިލްގެ ރައީސް ހަސަން ފަރުހާން މުހައްމަދު އެ ހަފްލާގައި ބައިވެރިވަޑައިގެންނެވި އެވެ.
ދެ ޑިވިޝަންގެ ޗެމްޕިއަން ޓީމަށް 5000 ރުފިޔާގެ ފައިސާގެ އިނާމް ހުށަހަޅާފައި ވެއެވެ. އަދި އެ މުބާރާތުގެ އެންމެ މޮޅު ކުޅުންތެރިޔާއަށް އެޓްމޮސްފެއާ ގްރޫޕްގެ އޮބްލޫ އެކްސްޕީރިއެންސް އައިލާފުއްޓަށް އިތުރު ބައިވެރިއަކާއި އެކު އެއް ރޭ ހޭދަކޮށްލަން ދިއުމުގެ ފުރުސަތާއި ހުޅުމާލޭގެ އޯކް ކެފޭ އެންޑް ބިސްޓްރޯ އިން ހަދިޔާ ކުރި ޑިނާ ގިފްޓް ވައުޗާ ލިބިފައިވެއެވެ.
ފިރިހެން ބައިގައި ހަ ޓީމު އަދި އަންހެން ބައިގައި އަށް ޓީމު ވާދަކުރި މި މުބާރާތުގެ ދެ ޑިވިޝަންގެ ފެއާ ޕްލޭ ޓީމަކީވެސް އެމްއައި ކޮލެޖް އެވެ. ދެ ޑިވިޝަނުން އެންމެ މޮޅު ހަތް ކުޅުންތެރިންވެސް ރޭ ހޮވާފައިވެއެވެ.