މެޗުގެ އިތުރުވަގުތުގައި ޖެހި ދެ ލަނޑާއެކު އިނގިރޭސި ޕްރިމިއަރ ލީގުގައި އާސެނަލުން 3-1 ގެ ނަތީޖާއަކުން މެންޗެސްޓާ ޔުނައިޓެޑުގެ މައްޗަށް އަތްގަދަކޮށްފިއެވެ.
އާސެނަލްގެ ދަނޑުގައި ރޭ ކުޅުނު މެޗުގައި ފުރަތަމަ ލީޑްނެގީ ޔުނައިޓެޑުންނެވެ. މެޗުގެ 27 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މާކަސް ރަޝްފޯޑްއެވެ. މި ލަނޑުޖެހީ ކްރިސްޓިއަން އެރިކްސަން ދިން ބޯޅައަކުންނެވެ.
މި ލަނޑު ޖެހިތާ މާގިނައިރުތަކެއް ނުވަނީ އާސެނަލަށް އެއްވަރުކޮށްދިނީ އެ ޓީމުގެ ކެޕްޓަން މާޓިން އޮޑެގާޑްއެވެ. މިއީ ގެބްރިއެލް މާޓިނެލީގެ އެހީތެރިކަމާއެކު ކާމިޔާބުކުރި ލަނޑެކެވެ.
ޔުނައިޓެޑުން 89 ވަނަ މިނެޓުގައި ލަނޑެއް ޖެހި ނަމަވެސް ވީއޭއާރުން އެ ލަނޑު ބަލައެއްނުގަތެވެ. އެއްވަރުވެގެން ނިމެންދަނިކޮށް އާސެނަލުން މި މެޗުގައި ފުރަތަމަ ފަހަރަށް ލީޑްނެގީ ބުކާޔޯ ސާކާގެ އެހީތެރިކަމާއެކު ، މި ފަހަރުގެ ޓްރާންސްފާ ބާޒާރުގައި ރެކޯޑް އަގެއްގައި ވެސްޓް ހޭމުން ގެނައި އިނގިރޭސި މިޑްފީލްޑަރު، ޑެކްލަން ރައިސް އެވެ. އަދި އެ ޓީމުގެ ތިންވަނަ ލަނޑު ޖެހީ ގެބްރިއެލް ޖެސޫސް އެވެ.
މި ނަތީޖާއާއެކު އާސެނަލް އޮތީ ހަތަރު މެޗުން ލިބުނު 10 ޕޮއިންޓާއެކު ފަސް ވަނައިގައެވެ. ޔުނައިޓެޑަށް 4 މެޗުން ލިބިފައިވާ ހަ ޕޮއިންޓާއެކު އޮތީ 11 ވަނައިގައެވެ.
ސައްތައިން ސައްތަ ރެކޯޑަކާއެކު އެއްވަނައިގައި އޮތީ އެންމެ ފަހުގެ ޗެމްޕިއަން މެންޗެސްޓާ ސިޓީއެވެ.