ދުނިޔޭގެ އެކި ކަންކޮޅުތަކުގައި މި ވަގުތު ހަލުވިކަމާ އެކު ފެތުރެމުންދާ ކޮވިޑް-19ގެ އައު ސަބްވޭރިއެންޓެއް ކަމުގައިވާ "އީޖީ.5" ނުވަތަ "އެރިސް"އަށް ޚާއްޞަކޮށްފައިވާ ވެކްސިންގެ ބޫސްޓަރ ޑޯޒެއް އަންނަ ސެޕްޓެންބަރު މަހު ބޭނުންކުރަން ފަށަން އެމެރިކާއިން ތައްޔާރުވެއްޖެއެވެ. އެރިސްއަކީ 2021 ވަނަ އަހަރުގެ ނޮވެންބަރު މަހު ފެތުރެން ފެށި އޮމިކްރޮން ވޭރިރެންޓްގެ ސަބްވޭރިއެންޓެކެވެ.
އޮމިކްރޯންގެ ސަބްވޭރިއެންޓެއް ކަމުގައިވާ "އެކްސްބީބީ.5.1"އަށް ޚާއްޞަކޮށްގެން ވެކްސިންގެ ބޫސްޓަރ ޑޯޒެއް މިހާރު ވެސް ބޭނުން ކުރަމުންދާއިރު، އަލަށް ބޭނުންކުރަން ފެށުމަށް ތައްޔާރުވަމުންދާ ޑޯޒަކީ އެރިސް ސަބްވޭރިއެންޓަށް ޚާއްޞަކޮށްފައިވާ ޑޯޒެކެވެ. އެރިސް ޖެހިފައިވާ މީހުންގެ ޢަދަދު އިތުރުވެ، އެމެރިކާގެ ހޮސްޕިޓަލުތަކުގައި އެޑްމިޓުކޮށްގެން ފަރުވާދެމުންދާ މީހުންގެ ޢަދަދު އުފުލިފައިވާ ކަމުގައި އެ ޤައުމުން ބުނެއެވެ.
އެކްސްބީބީ ޢާއިލާއަށް ނިސްބަތްވާ އެރިސްއަށް ޚާއްޞަކޮށް ވެކްސިންގެ ބޫސްޓަރ ޑޯޒް އުފައްދާފައިވާ ކުންފުނިތަކުގެ ތެރޭގައި ފައިޒަރ/ބަޔޯއެންޓެކް، މޮޑަރނާ އަދި ނޮވެވެކްސް ހިމެނެއެވެ. އެރިސްއަށް ޚާއްޞަކޮށްފައިވާ ވެކްސިންގެ ބޫސްޓަރ ޑޯޒް ޖަހައިދިނުމަށް ކުރިއަށް އޮތް ސެޕްޓެންބަރު މަހު ހުޅުވައިލި ނަމަވެސް މި ކަމަށް އެމެރިކާގައި ބޮޑު ތަހުހީބެއް ލިބޭނެ ކަމަށް ނުބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
2021 ވަނަ އަހަރުގެ ތެރޭގައި އެމެރިކާގައި ވެކްސިން ޖަހައިދޭން ފަށައި، 240 މިލިޔަނެއްހާ މީހުން ވެކްސިންގެ ފުރަތަމަ ޑޯޒް ޖެހި ނަމަވެސް، ވެކްސިނަށް އޮތް ޑިމާންޑު އެއަށްފަހު ވަނީ ދަށްވާން ފަށާފައެވެ. އެމެރިކާގެ އާބާދީގެ 73 އިންސައްތަ މީހުން ވެކްސިންގެ ފުރަތަމަ ޑޯޒް ޖަހާފައިވީ ނަމަވެސް، ދެވަނަ ޑޯޒް އަދި ބޫސްޓަރ ޑޯޒް ޖަހާފައިވާ މީހުންގެ ޢަދަދު މަދެވެ. އަދި، ބޫސްޓަރ ޖަހަން ބޭނުންވާ މީހުންގެ ޢަދަދު ދަނީ މަދުވަމުންނެވެ.
2022 ވަނަ އަހަރުގެ ޚަރީފު މޫސުމުގައި އެމެރިކާގައި ބޫސްޓަރ ޑޯޒް ޖަހާފައި ވަނީ އެންމެ 50 މިލިޔަނެއްހާ މީހުންނެވެ. ޞިއްޙީ ދާއިރާގެ ދިރާސާކުރާ ކައިސަރ ފެމިލީ ފައުންޑޭޝަންގެ ޑިރެކްޓަރެއް ކަމުގައިވާ އޭޝްލީ ކަރޒިންގަރ ވިދާޅުވީ، ކޮވިޑްގެ ނުރައްކާތެރިކަން ނިމުމަކަށް އައިސްފައި ނުވާ ކަމާ މެދު ޢާންމުންގެ މެދުގައި ހޭލުންތެރިކަން އިތުރުކުރަން ޖެހިފައިވާ ކަމުގައެވެ. ނޫން ނަމަ، ވެކްސިން ޖަހާ މީހުންގެ ޢަދަދު އިތުރު ނުކުރެވޭނެ ކަމަށް އޭނާ ވިދާޅުވިއެވެ.
ޢާންމުންނަށް ހިލޭ ވެކްސިން ފޯރުކޮށްދިނުން އެމެރިކާ ސަރުކާރުން މިހާރު ވަނީ ހުއްޓައިލާފައެވެ. އަދި، ކުރިއަށް އޮތް ތަނުގައި ވެކްސިން ބޫސްޓަރ ޑޯޒް ބޭނުންވާ ފަރާތްތަކުން ޖެހޭނީ ވެކްސިން އުފައްދާ ކުންފުނިތަކުން ޑޯޒް ގަންނާށެވެ. ނަމަވެސް، ބޫސްޓަރ ޑޯޒް ޖެހުން ކުރިއަށްގެންދަން ބޭނުންވާ މީހުންގެ ޢަދަދުތައް މަދުވެ، ވެކްސިން އުފައްދާ ކުންފުނިތަކަށް މިހާރު ދަނީ މާލީ ގެއްލުންތައް ކުރިމަތިވަމުންނެވެ.
"އެމް.އާރް.އެން.އޭ" ވެކްސިން އެންމެ ގިނައިން އުފައްދާ އެމެރިކާގެ ފައިޒަރ އަދި ބަޔޯއެންޓެކް ކުންފުނިން ވަނީ މި ކަމާ ގުޅިގެން އެ ކުންފުނިތަކުގައި މަސައްކަތްކުރާ މުވައްޒަފުންގެ ޢަދަދު މަދު ކުރަން ޖެހިފައިވާ ކަމަށް ބުނެފައެވެ. މޮޑަރނާ ކުންފުނިން ބުނީ ވެކްސިން ޖަހަން ބޭނުންވާ މީހުންގެ ޢަދަދު 50 މިލިޔަނަށް ދަށްވެފައިވާ ކަމުގައެވެ.
ކޮވިޑް ވެކްސިން ވިއްކައިގެން ފައިޒަރ އަދި މޮޑަރނާ ކުންފުނިން ވަނީ ހުސްވި 2022 ވަނަ އަހަރު 56 ބިލިޔަން އެމެރިކާ ޑޮލަރުގެ އާމްދަނީއެއް ހޯދާފައެވެ. ނަމަވެސް، މި އަހަރު އެ ކުންފުނިތަކުގެ އާމްދަނީ 20 ބިލިޔަނަށް ވެއްޓޭނެ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. މި އަހަރުގެ ޚަރީފު މޫސުމުގައި ވެކްސިން ޖަހާ އެމެރިކާ މީހުންގެ ޢަދަދު 50 މިލިޔަނަށް ވެސް ނާރާނެ ކަމަށް އެ ފަރާތްތަކުން ބުނެއެވެ.