އެމްޑަބްލިއުއެސްސީ ދިވެހި ޕްރިމިއަރ ލީގުގައި ރޭ ކުލަބު ގްރީން ސްޓްރީޓްސް އާއި ކުލަބު ވެލެންސިއާ ބައްދަލުކުރި މެޗު އެއްވަރުވެއްޖެއެވެ.
ޤައުމީ ފުޓްބޯޅަ ދަނޑުގައި ކުޅުނު މި މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ކުލަބު ވެލެންސިއާ އިންނެވެ. މިލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ ކެޕްޓަން ހަސަން ސުފްޔާން އެވެ.
ނަމަވެސް މި ލަނޑު ޖެހިތާ ހަތް މިނެޓުފަހުން ގްރީން ސްޓްރީޓްގެ އަންސަރު އިބްރާހިމް ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ. ގްރީން ސްޓްރީޓުން ލީޑު ހޯދީ ފުރަތަމަ ހާފުގެ 25 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އަހުމަދު ރަސްލާން އެވެ.
ފުރަތަމަ ހާފު ނިމުމުގެ ކުރިން ވެލެންސިއާ އިން ވަނީ ނަތީޖާ ހަމަހަމަކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އުމުރުން 14 އަހަރުގެ މުހައްމަދު އިލާން އެވެ.
މެޗުގެ ދެވަނަ ހާފުގައި ދެ ޓީމަށްވެސް ލަނޑުޖަހަން ރަނގަޅު ފުރުސަތުތަކެއް ލިބިގެންދިޔައެވެ. މެޗުގެ މޮޅު ކުޅުންތެރިއަކަށް ހޮވުނީ ގްރީން ސްޓްރީޓް އަންސަރު އިބްރާހީމެވެ. މި މެޗުން ލިބުނު އެއް ޕޮއިންޓާއެކު ކުޅުނު 9 މެޗުން ގްރީން ސްޓްރީޓަށް ފަސް ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ 7 ވަނައިގައެވެ.
މި މެޗުން ލިބުނު އެއް ޕޮއިންޓާއެކު ކުޅުނު 9 މެޗުން ކުލަބް ވެލެންސިއާ އަށް 2 ޕޮއިންޓް ލިބިފައިވާއިރު، އެޓީމު މިވަގުތު އޮތީ ތާވަލްގެ ފުލުގައެވެ.