އެމްޑަބްލިއުއެސްސީ ދިވެހި ޕްރިމިއަރ ލީގުގައި ޔުނައިޓެޑް ވިކްޓަރީ (ޔޫވީ) ބަލިކޮށް، ލީގުގެ ގަދަ ހަތަރެއްގައި ޓީސީ ސްޕޯޓްސް ކުލަބު ހަމަޖެހިލައިފިއެވެ.
ޤައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު ޓީސީން ކާމިޔާބުކުރީ 3-0 ގެ ނަތީޖާއަކުންނެވެ.
މި މެޗުގެ ފުރަތަމަ މިނުޓުގެ ތެރޭގައި ޓީސީ އެޓީމުގެ ފުރަތަމަ ލަނޑު ކާމިޔާބު ކުރިއިރު މި ލަނޑު އެޓީމަށް ކާމިޔާބުކޮށްދިނީ ހަމްދޫން އަބްދުލް ލަތީފެވެ.
މި ލަނޑަށްފަހު ޔޫވީން ކުޅުން ރަނގަޅުކޮށް ވަނީ ޓީސީގެ ގޯލަށް ހަމާލާތަކެއް ފޮނުވާލާފައެވެ. އެގޮތުން މެޗުގެ 18 ވަނަ މިނެޓުގައި ޓީސީގެ ޕެނަލްޓީ އޭރިއާ ބޭރުން ރީހާން ފޮނުވި ހަމަލާ ދިޔައީ ބޭރަށެވެ. ދެން އެންމެ ރަނގަޅު ހަމަލާއެއް ފޮނުވާލީ ޔޫވީގެ ޝަނާން ރަޝާދެވެ. އޭނާ ފޮނުވާލި ހަމަލާ ގޯލްގެ ރޮނގުމަތިން ބޯޅަ ދިފާއުކުރީ ޓީސީގެ ޑިފެންޑަރ ހަސަން އީނާޒެވެ.
މެޗުގެ މެޗު 36 ވަނަ މިނުޓުގައި ޓީސީގެ ޒަޔާން ނަސީރު ފޮނުވާލި ހަމަލާގެ ހުރަހަކަށްވީ ޔޫވީގެ ކީޕަރު މުހަންމަދު ޔާމީންއެވެ. މެޗުގެ 38 ވަނަ މިނުޓުގައި ޓީސީގެ އަބްދުލް ވާހިދު އިބްރާހީމް ފޮނުވާލި ހަމަލާއެއް ވަނީ ޔޫވީގެ ގޯލުގެ އަރިމަތީ ދަނޑިއަށް އަމާޒުވެފައެވެ. މެޗުގެ ފުރަތަމަ ހާފުގެ ފަހުކޮޅު ޓީސީގެ މުހަންމަދު ސާދު ނިޒާރަށް ވަނީ ލަނޑުޖަހާނެ ރަނގަޅު ފުރުސަތެއް ލިބިފައެވެ.
ފުރަތަމަ ހާފުގެ ފަހު މިނެޓުގައި ޔޫވީގެ އަބްދުލްﷲ ލޫތު އިބްރާހިމް ފޮނުވާލި ހަމަލާ ހުރަހަކަށްވީ ޓީސީ ކީޕަރު ސުޖަން ޕެރޭރާއެވެ. ދެވަނަ ހާފުގައި އެންމެ ރަނގަޅު ފުރުސަތެއް ޔޫވީން ލިބުނީ ވެސް ލޫތަށެވެ. ޓީސީގެ ދެވަނަ ލަނޑު ކާމިޔާބުކޮށްދިނީ ޕެނަލްޓީ އޭރިއާ ތެރެއިން ޒަޔާން ނަސީރު ހުސްކޮށް ހުރެ ދިން ބޯޅައަކުން ހަމްދޫނެވެ.
ޓީސީގެ ތިންވަނަ ލަނޑު މެޗުގެ އިތުރު ވަގުތުތެރޭގައި ހައިސަމް ރަޝީދު ދިން ބޯޅައަކުން ކާމިޔާބުކުރީ އަހުމަދު މައިޝް ރަޝީދުއެވެ. މި މޮޅާއެކު ޓީސީ ލީގުގެ ހަތަރުވަނައިގަ އޮތީ 9 މެޗުން ލިބުނު 16 ޕޮއިންޓާއެކުއެވެ.