ޓެރަރިސްޓް ޖަމާޢަތްތައްކަމަށް ބެލެވޭ ޖަމާޢަތްތަކުގެ ލިސްޓު ސަލާމަތީ ސަބަބުތަކަށްޓަކައި ޢާންމުނުކުރައްވާގޮތަށް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ. ޓެރަރިޒަމް މަނާކުރުމުގެ ޤާނޫނަށް ވިލިނގިލި ދާއިރާގެ މެމްބަރު ސަޢުދު ޙުސައިން ހުށައެޅުއްވި މިއިޞްލާޙު ފާސްވީ 43 މެމްބަރުންގެ އަޣްލަބިއްޔަތުންނެވެ.
ޓެރަރިޒަމް މަނާކުރުމުގެ ޤާނޫނުގައި މިހާރު ބަޔާންކުރެވިފައިވަނީ، ޓެރަރިސްޓް ޖަމާޢަތްތައް ކަމަށް ބެލެވޭ ޖަމާޢަތްތަކުގެ ލިސްޓެއް ރައީސުލްޖުމްހޫރިއްޔާ ކަނޑައަޅުއްވަން ވާނެކަމަށާއި ޤާނޫނުގައި، ޓެރަރިސްޓް ޖަމާޢަތްތައްކަމަށް ބެލެވޭ ޖަމާޢަތްތައް ކަނޑައަޅާނީ ޤައުމީ ސަލާމަތާބެހޭ މަޖިލީހުގެ މަޝްވަރާގެ މަތިން ރައީސުލްޖުމްހޫރިއްޔާކަމަށެވެ. އަދިޓެރަރިސްޓް ޖަމާޢަތްތަކުގެ ލިސްޓް ދިވެހި ސަރުކާރުގެ ގެޒެޓްގައި ޝާއިޢުކުރައްވަން ލާޒިމްކަމަށް މިހާރު ޤާނޫނުގައިވެއެވެ. ނަމަވެސް ސަރުކާރުގެ ފަރާތުން ވިލިނގިލި ދާއިރާގެ މެމްބަރު ސަޢުދު ޙުސައިން ހުށައެޅުއްވި އިޞްލާޙުގައި ވަނީ މިއިޞްލާޙު ފާސްވުމުން ރައީސުލްޖުމްހޫރިއްޔާ ކަނޑައަޅުއްވާ ޓެރަރިސްޓް ޖަމާޢަތްތަކުގެ ލިސްޓް ޤައުމީ ސަލާމަތާބެހޭ މަޖިލީހުގެ އިރުޝާދާއެކު ސިފައިން ބަލަހައްޓަވަންވާނެ ކަމަށާއި، ރައީސުލްޖުމްހޫރިއްޔާ ކަނޑައަޅުއްވާ ޓެރަރިސްޓް ޖަމާޢަތްތަކުގެ ލިސްޓް ސަލާމަތީ ސަބަބުތަކަށްޓަކައި ޢާންމުނުކުރެވޭނެކަމަށެވެ. މި އިޞްލާޙަށް ގިނަ މެމްބަރުން ތާއީދުކުރެއްވިއެވެ.
ޓެރަރިޒަމް މަނާކުރުމުގެ ޤާނޫނަށް އިޞްލާޙުށައަޅުއްވުމުގެ މަޤްޞަދަކީ، ޓެރަރިޒަމް ޖަމާޢަތުގެ ލިސްޓް ގެޒެޓްކުރަންޖެހޭ ގޮތަށް އޮތުމުން، ދިމާވެދާނެ މައްސަލަތަކަށް ޙައްލެއް ހޯއްދެވުމުގެ ގޮތުންކަމަށް ބުނެފައިވެއެވެ.