އެމްޑަބްލިއުއެސްސީ ދިވެހި ޕްރިމިއަރ ލީގުގެ ދެވަނަ ބުރުގައި ބުރު ސްޕޯޓްސް ކުލަބް ފަސޭހަކަމާއެކު ބަލިކޮށް ކުލަބް އީގަލްސް އިން ތާވަލުގެ ދެވަނައަށް ޖެހިލައިފިއެވެ.
މެޗު އީގަލްސް ކާމިޔާބުކޮށްފައިވަނީ 5-0 ގެ ނަތީޖާއަކުންނެވެ. މި މެޗުގައި އީގަލްސްގެ އިބްރާހިމް މަހުދީ ހުސެއިން (ފޭދޫ އިއްބެ) ގެ ހެޓްރިކެއް ވަނީ ފެނިގެންގޮސްފައެވެ.
ދެވަނަ ބުރުގެ ފުރަތަމަ މެޗު ފަސްކުރުމާ ގުޅިގެން، އީގަލްސް އަށްވުރެ އެއް މެޗު އިތުރަށް ކުޅެގެން ޕޮއިންޓެއް އިތުރަށް ހޯދައިގެން ސުޕަ ޔުނައިޓެޑް ސްޕޯޓްސް (ސަސް) ވަނީ އީގަލްސް ތިންވަނައަށް ވައްޓާލައި ލީގު ތާވަލްގެ ދެވަނައަށް ޖެހިލައިފަ އެވެ. ނަމަވެސް ބުރު އަތުން ލިބުނު މި މޮޅާއެކު އީގަލްސް މިވަނީ އަށް މެޗުން 20 ޕޮއިންޓް ހަމަކޮށް އަލުން ދެވަނައަށް ޖެހިލައިފައެވެ.
ބުރު ސްޕޯޓްސް އާއި ދެކޮޅަށް އީގަލްސް ކުޅުނު މެޗުގެ ކުރީކޮޅު އަހުމަދު ރިޒުވާން (ރިޒޭ) ހުސްކޮށްލި ބޯޅައަކުން އެ ޓީމަށް ލީޑު ނަގައިދިން ލަނޑު ކާމިޔާބުކޮށްދިނީ ބްރެޒިލް ފޯވާޑް އިވާން ކާލޯސް އެވެ. މި ލަނޑު ޖެހިތާ 20 މިނިޓު ފަހުން އިބްރާހިމް މަހުދީ ހުސެއިން (ފޭދޫ އިއްބެ) ވަނީ ލީޑު ފުޅާކޮށްފައެވެ.
ދެވަނަ ހާފު ފެށިގެން ހަތަރުވަނަ މިނިޓުގައި އީގަލްސްގެ ތިންވަނަ ލަނޑު ކާމިޔާބުކޮށްދިނީ އަހުމަދު ރިޒްވާން (ރިޒޭ) އެވެ. މި ލަނޑު ޖެހިތާ ހަ މިނިޓު ފަހުން ރިޒޭގެ އެހީތެރިކަމާ އެކު ފޭދޫ އިއްބެ ވަނީ އޭނާގެ ދެވަނަ ގޯލު ކާމިޔާބުކޮށްފަ އެވެ. ފޭދޫ އިއްބެގެ ހެޓްރިކް ފެނިގެންދިޔައީ މެޗުގެ 83 ވަނަ މިނިޓުގައެވެ. މި ހެޓްރިކާއެކު މި ސީޒަނުގެ ލީގުގައި އޭނާ ޖެހި ލަނޑުތަކުގެ އަދަދު ވަނީ 10 އަށް އަރާފައެވެ.
މި މެޗުގައި ބުރު ސްޕޯޓްސް ކްލަބްގެ ވައިސް ކެޕްޓަން މުހައްމަދު ނާއިމް އަށް ރެފްރީ ވަނީ ދެވަނަ ރީނދޫ ކާޑަކާ އެކު ރަތް ކާޑެއް ދައްކައިފަ އެވެ. އަދި ދެވަނަ ހާފުގެ ފަހުކޮޅު ގިނަ ކާޑުތަކެއް ފެނިގެންދިޔަ އެވެ.