އެމްޑަބްލުއެސްސީ ދިވެހި ޕްރިމިއަރ ލީގުގެ ދެވަނަ ބުރުގައި ސުޕަ ޔުނައިޓެޑް ސްޕޯޓްސް (ސަސް) ބަލިކޮށް، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ތާވަލުގެ އެއްވަނައިގައި ލީޑު ފުޅާކޮށްފިއެވެ.
ޤައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު މާޒިޔާއިން ކާމިޔާބުކުރީ 3-0 ގެ ނަތީޖާއަކުންނެވެ.
މާޒިޔާއިން ވަނީ މިއަދުގެ މެޗުގެ ފުރަތަމަ އެގާރައިގައި ބިދޭސީ ފަސް ކުޅުންތެރިން ހިމަނާފައެވެ. އަދި އެ ޓީމާ އެންމެ ފަހުން ގުޅުނު ޖަޕާނުގެ ޓުމޯކީ ވާޑާވެސް ވަނީ މެޗުގެ ދެވަނަ ހާފުގައި ކުޅެން ނުކުމެފައެވެ.
މި މެޗު ފަށައިގެން އެންމެ ފުރަތަމަ ފުރުސަތެއް ލިބިގެންދިޔައީ މާޒިޔާގެ ވޮޖްސްލޭވް ބަލަބަނޮވިޗް އަށެވެ. މެޗުގެ 8 ވަނަ މިނިޓުގައި ލަނޑުޖަހަން ރަނގަޅު ފުރުސަތެއް ސަސްގެ އަހުމަދު ހުސާމް ލިބުނު ފުރުސަތު ދިޔައީ ގޯލުގެ ދަނޑިކައިރިން ބޭރަށެވެ. މެޗުގެ ފުރަތަމަ ހާފްގައި މާޒިޔާގެ ބަލަބަނޮވިޗްގެ ނުރައްކާ ދިޔައީ އިތުރުވަމުންނެވެ. އެގޮތުން 24 ވަނަ މިނެޓުގައި އޭނާއަށް ވަނީ ލަނޑު ޖަހަން ރަނގަޅު ފުރުސަތެއް ލިބިފައެވެ.
މެޗުގައި މާޒިޔާ ލީޑު ނެގީ ފުރަތަމަ ހާފްގެ 33 ވަނަ މިނިޓުގައެވެ. މި ލަނޑު އެޓީމަށް ކާމިޔާބުކޮށްދިނީ ސާބިޔާގެ ޖޯސިކް ބްރެނިމިރްއެވެ. މިލަނޑަށް ފަހު ސަސްގެ އޭރިއާ ބޭރުން އައިސަމް ފޮނުވާލި ހަމަލާގެ ހުރަހަކަށް ވެގެންދިޔައީ ސަސްގެ ކީޕަރު އަބްދުﷲ ޒިމާމެވެ. މާޒިޔާގެ ދެވަނަ ލަނޑަކީ ގާނާގެ މިޑްފީލްޑަރ ރެގަން އޮބެންގް ނަގައިދިން ކޯނަރަކުރުން ބޮލުން ގޯލް ތެރެއަށް ވައްދާލީ ބަލަބަނޮވިޗްއެވެ. މި ލަނޑު އޭނާ ކާމިޔާބުކުރީ 40 ވަނަ މިނިޓުގައެވެ.
މެޗުގެ ދެވަނަ ހާފް ފަށައިގެން ސަސް ރަނގަޅަށް ކުޅެން ފަށައި އެޓީމުގެ ހުސާމް އަށް ވަނީ މާޒިޔާގެ ޕްނެލްޓީ އެރޭއިޔާ ތެރެއިން ހުސްކޮށް ވެސް ފުރުސަތެއް ލިބިފައެވެ. ދެވަނަ ހާފްގެ 59 ވަނަ މިނިޓުގައި ސަސްގެ އަލީ ނަސޫހް ފޮނުވާލި ހަމަލާ ހުރަހަކަށްވީ މާޒިޔާގެ ކީޕަރު ހުސެއިން ޝަރީފްއެވެ.
މާޒިޔާ ޖެހި ތިންވަނަ ލަނޑަކީ ސަސްގެ މުހަންމަދު ނިޒާމް އަތުން ބައިކޮޅަށް ވަތް ލަނޑެކެވެ. މާޒިޔާގެ ތިންވަނަ ލަނޑަށްފަހު އެޓީމުގެ ނާއިޒް ހަސަން ފޮނުވާލި ހަމަލާއެއް ވަނީ ސަސްގެ ގޯލުގެ އަރިމަތީ ދަނޑިއަށް ވެސް އަމާޒުވެފައެވެ. މެޗު ނިމެން ތިން މިނެޓަށް ވެފައިވަނިކޮށް ސަސްގެ އަހުމަދު އައިހަމް މާޒިޔާ ހާފްގެ މެދުތެރެއިން ގޯލާ ދިމާލަށް ފޮނުވާލީ ހަމަލާ ދިފާއުކުރީ މާޒިޔާގެ ކީޕަރު ހުސެއިން އަށް އަނިޔާވުމުން ބަދަލުގައި ކުޅެން އެރި ޒުވާން ކީޕަރު އަޔާން އަބްދުލް އަލީމެވެ.
މެޗުގެ އިތުރުވަގުތު ތެރޭގައި މާޒިޔާގެ ބަލަބަނޮވިޗް ސަސްގެ އޭރިޔާތެރެއަށް ވަދެ ކީޕަރު ކައިރިން ނައްޓާލުމަށްފަހު ފޮނުވާލި ހަމަލާ ދިފާއު ކުރީ އައިހަމްއެވެ. މި މޮޅާއެކު ލީގުގައި ކުޅުނު 8 ލިބުނު 22 ޕޮއިންޓާ އެކު މާޒިޔާ ވަނީ އެއްވަނައިގަ ލީޑް ފުޅާކޮށްފައެވެ.