ލީގްސް ކަޕުގެ ފައިނަލް މެޗުގައި ޕެނަލްޓީ ޖަހައިގެން ނަޝްވިލް އެސްސީ ބަލިކޮށް، އިންޓަރ މަޔާމީން މުބާރާތުގެ ތަށި އުފުލާލައިފިއެވެ.
މިއަދު ފަތިހު ކުޅުނު މި މެޗު މަޔާމީން ކާމިޔާބުކޮށްފައިވަނީ ޕެނަލްޓީ ޖަހައިގެން 10-9 ގެ ނަތީޖާއަކުންނެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައިވަނީ 1-1 ގެ ނަތީޖާއަކުންނެވެ.
ނަޝްވިލުގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ މަޔާމީންނެވެ. މެޗުގެ 23 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އާޖެންޓީނާގެ ތަރި ލިއޮނެލް މެސީއެވެ. މިއީ މަޔާމީގެ ޖާޒީގައި މެސީ ކާމިޔާބުކުރި 10 ވަނަ ލަނޑެވެ. އަދި މެސީ ވަނީ މަޔާމީއަށް މިހާތަނަށް ކުޅެދިން ހަތް މެޗުގައިވެސް ލަނޑު ޖަހާފައެވެ.
މިސީގެ ލަނޑުން މަޔާމީން ލީޑު ހޯދާފައިވަނިކޮށް، ނަޝްވިލްއިން މެޗުގެ ނަތީޖާ އެއްވަރުކުރީ ދެވަނަ ހާފު ފަށައިގެން 12 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ފާފާ ޕިކާލުޓެވެ.
މި މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވުމުން، ނެތީޖާ ނެރުމަށް ޖެހި ޕެނަލްޓީ ޝޫޓްއައުޓުވެސް ފެނިގެންދިޔައީ އެހާމެ ފޯރިގަދަކޮށެވެ. އެގޮތުން ކޮންމެ ޓީމަކުން 11 ޕެނަލްޓީ ފޮނުވާލިއިރު، ނަޝްވިލްގެ ގޯލްކީޕަރު އެލިއަޓް ޕަނޭކޯ ފޮނުވާލި ފަހު ޕެނަލްޓީ މަޔާމީގެ ކީޕަރު ޑްރޭކް ކަލެންޑާ ވަނީ ދިފާއުކޮށްފައެވެ.
މިއީ މަޔާމީއާއެކު މެސީ ކާމިޔާބުކުރި ފުރަތަމަ ތައްޓެވެ. އަދި މި ތައްޓާއެކު އޭނާ ވެފައި ވަނީ ކެރިއަރުގައި އެންމެ ގިނަ ތަށި ކާމިޔާބުކުރި ކުޅުންތެރިޔާ އަށެވެ. އެގޮތުން މެސީ ވަނީ މިހާތަނަށް ކެރިއަރުގައި 44 ތަށި ކާމިޔާބުކޮށްފައެވެ.