ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ސެމީ ފައިނަލް ފުރަތަމަ މެޗުގައި ސްވިޑެން ބަލިކޮށް، މުބާރާތުގެ ފައިނަލުގެ ފުރަތަމަ ޖާގަ ސްޕެއިނުން ހޯދައިފިއެވެ.
ނިއު ޒީލަންޑުގެ އެޑެން ޕާކުގައި މިއަދު ކުޅުނު ސެމީ ފައިނަލް މެޗު ސްޕެއިނުން ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.
މި މެޗުގެ ބޮޑުބައި ދެ ޓީމުންކުރެ އެއްވެސް ޓީމަކަށް ލަނޑެއް ޖެހިފައިނުވާއިރު، ސްޕެއިނުން ލީޑު ނަގާފައިވަނީ މެޗު ނިމެން ނުވަ މިނެޓަށް ވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ ދެވަނަ ހާފުގައި ބަދަލަކަށް ކުޅެން ނުކުތް އުމުރުން 19 އަހަރުގެ ސަލްމާ ޕަރަލުއޭލޯއެވެ. ސަލްމާ ވަނީ ކުއާޓާ ފައިނަލުގައިވެސް ބަދަލަކަށް ކުޅެން އަރައި، ނެދަލަންޑްސް އަތުން ސްޕެއިން މޮޅުކޮށްދީފައެވެ.
މި މެޗުގައި ސްޕެއިނުން ލީޑު ނެގިތާ ހަތް މިނެޓު ފަހުން، މެޗުގެ 88 ވަނަ މިނެޓުގައި ސްވިޑެންއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ޖަހައިދިނީ ރެބޭކާ ބްލޮމްކްވިސްޓެވެ. އެކަމަކު އޭގެ 93 ސިކުންތު ފަހުން ސްޕެއިންގެ ކެޕްޓަން އޯލްގާ ކަރްމޯނާ ވަނީ ލަނޑެއް ކާމިޔާބުކޮށް، ފައިނަލުގެ ޖާގައެއް ސްޕެއިނަށް ކަށަވަރުކޮށްދީފައެވެ.
މި މޮޅާއެކު މުބާރާތުގެ ފައިނަލަށް ސްޕެއިން ދަތުރުކުރިއިރު، މިއީ ވިމެންސް ވޯލްޑް ކަޕެއް ފައިނަލުގައި ސްޕެއިން ކުޅޭނެ ފުރަތަމަ ފަހަރެވެ. އަނެއްކޮޅުން ސްވިޑެން މި ވަނީ ޖެހިޖެހިގެން ދެވަނަ ފަހަރަށް ވޯލްޑް ކަޕުގެ ސެމީ ފައިނަލުން ބަލިވެފައެވެ.
އަންނަ އާދިއްތަ ދުވަހު ކުޅޭ ފައިނަލް މެޗުގައި ސްޕެއިން ވާދަކުރަންް ޖެހޭ ޓީމެއް އެނގޭނީ މާދަމާ އޮސްޓްރޭލިއާ އާއި އިންގްލަންޑް ކުޅޭ ދެވަަނަ ސެމީ ފައިނަލް މެޗުންނެވެ.