އެމެރިކާގެ ސްޓޭޓެއް ކަމުގައިވާ ހަވާއީގެ ޖަންގަލިތަކުގައި ރޯވެފައިވާ އަލިފާންގަނޑު ޢާންމުން ދިރިއުޅޭ ސަރަޙައްދުތަކަށް ފެތުރުމާ ގުޅިގެން މަރުވި މީހުންގެ ޢަދަދު 96 އަށް އަރައިފިއެވެ. އަލިފާނުގައި އެންމެ ބޮޑަށް ގެއްލުން ލިބިފައި ވަނީ މަވުއީގެ ރިސޯޓު ރަށެއް ކަމުގައިވާ ލަހެއިނާއަށެވެ. އެ ރަށުގެ ބޮޑު ބައެއް އަލިފާނުގައި ވަނީ އަނދާ ހުލިވެފައެވެ.
އަލިފާނުގެ ހާދިސާގައި ގެއްލިފައިވާ ކަމަށް ނުވަތަ މަރުވެފައިވާ ކަމަށް ބެލެވޭ މީހުންގެ ހަށިތައް ހޯދުމުގެ މަސައްކަތުގައި އޮފިޝަލުން އިތުރުން އެ މީހުންގެ ޢާއިލާތަކުން ވެސް މިހާރު ދަނީ ހަރަކާތްތެރިވަމުންނެވެ. އެ ރަށުގެ ބައެއް ސަރަޙައްދުތަކުގައި ރޯވެފައިވާ އަލިފާންގަނޑުތައް އަދިވެސް މުޅިން ނިއްވައިލެވިފައެއް ނުވެއެވެ. އެ އަލިފާންގަނޑުތައް ކޮންޓްރޯލް ކުރަން އަލިފާން ނިއްވާ ޓީމުތަކުން އަދިވެސް ދަނީ މަސައްކަތް ކުރަމުންނެވެ.
މި ހާދިސާއާ ގުޅިގެން ގެއްލިފައިވާ ކަމަށް ބެލެވޭ މީހުންގެ ޢަދަދު 100 އަށްވުރެ އިތުރުވާނެ ކަމަށް ބެލެވެއެވެ. ނަމަވެސް، ގެއްލިފައިވާ މީހުންގެ ފުރިހަމަ ޢަދަދު އަދިވެސް ސާފެއް ނޫނެވެ. އަދި، މަރުވެފައިވާ އިތުރު މީހުންގެ ހަށިތައް ފެންނަމުންދާ ވަރަކަށް މަރުވި މީހުންގެ ޢަދަދު އިތުރުވާނެ ކަމަށް ބެލެވެއެވެ.
ހަވާއީގެ ގަވަރުނަރު ޖޯޝް ގްރީން ވިދާޅުވީ އަލިފާންގަނޑު ރަށުތެރެއަށް ފެތުރިގެންދިޔަ ސަބަބު ދެނެގަތުމަށް ފުރިހަމަ ތަހުޤީޤެއް ހިންގާނެ ކަމުގައެވެ. އަދި، މި ފަދަ ހާދިސާތަކާ ގުޅޭ އިންޒާރުދޭ ނިޒާމު މަސައްކަތް ކޮށްފައި ނުވާ ސަބަބު ވެސް ދެނެގަންނާނެ ކަމުގައި އޭނާ ވިދާޅުވިއެވެ. މި ހާދިސާއިން ސަލާމަތްވި ލަހެއިނާގެ ރައްޔިތުން ބުނީ، އަލިފާންގަނޑު ފެތުރެމުންދާ ކަމުގެ އެއްވެސް އިންޒާރެއް ލިބިފައި ނުވާ ކަމުގައެވެ.
ލަހެއިނާއަކީ ފަތުރުވެރިންގެ މެދުގައި މަގުބޫލު ރަށެކެވެ. އެ ރަށަށް އަހަރެއްގެ މައްޗަށް ޒިޔާރަތްކުރާ ފަތުރުވެރިންގެ ޢަދަދު 2 މިލިޔަނަށް އަރައެވެ. ލަހެއިނާގެ އިތުރުން މަވުއީ އެހެން ދެ ސަރަޙައްދެއްގެ ޖަންގަލިތަކުގައި ވެސް ރޯވެ އަނދަމުންދާ ކަމުގައި އޮފިޝަލުން ވިދާޅުވިއެވެ. މޫސުން ގޯސްވުމާ އެކު ހޫނު ގަދަވެ، ގަޑިއަކު 100 ކިލޯމީޓަރަށް ވައިބާރުވުމާ ގުޅިގެން އަލިފާންގަނޑުތައް ކޮންޓްރޯލްކޮށް ނިއްވައިލުމަށް ކުރަމުންދާ މަސައްކަތަށް ވަނީ ހުރަސް އެޅިފައެވެ.
އެމެރިކާގެ ފެޑެރަލް އެމަޖެންސީ މެނޭޖްމަންޓް އޭޖެންސީ (ފީމާ)އިން ބުނީ، އަލިފާނުގެ ހާދިސާގައި ލަހެއިނާއަށް ލިބިފައިވާ ގެއްލުމުގެ އަގު 5.5 ބިލިޔަން އެމެރިކާ ޑޮލަރަށް އަރާނެ ކަމަށް އަންދާޒާ ކުރެވޭ ކަމުގައެވެ. އަލިފާނުގެ ހާދިސާގައި 2,200 ޢިމާރާތައި 850 ހެކްޓަރުގެ ބިން ވަނީ އަނދާ ހުލިވެފައެވެ.
ހަވާއީގައި މި ފަދަ ނުރައްކާތެރި އަދި ފަނާކުރަނިވި ކާރިސާއެއް އެންމެ ފަހުން ހިނގާފައި ވަނީ 1960 ވަނަ އަހަރުއެވެ. އެއީ، ހަވާއީއަކީ އެމެރިކާގެ ސްޓޭޓެއްގެ ގޮތުގައި ކަނޑައެޅުމުގެ އެއް އަހަރު ފަހެވެ. އެ އަހަރު ހަވާއީގެ ބިގް އައިލެންޑަށް އެރި ނުރައްކާތެރި ސުނާމީއެއްގައި 61 މީހުން މަރުވެ، ބޮޑެތި ގެއްލުންތަކެއް ލިބުނެވެ.