އަޅުވެތިކޮށްފައިވާ ހުޅަނގު އައްސޭރިއަށް އަރައި ޔަހޫދީ އިސްރާޢީލުގެ އަސްކަރިއްޔާއިން ހިންގި ލާއިންސާނީ އުދުވާންތަކެއްގައި ފަލަސްޠީނުގެ ތިން މީހުން ޝަހީދުކޮށްލައިފިއެވެ. ޔަހޫދީންގެ އިންސާނިއްޔަތާ ޚިލާފު ޖަރީމާތައް ހިންގާފައި ވަނީ ޖިނީން ރެފިއުޖީ ކޭމްޕު ކައިރީގައެވެ. ހުސްވި ޖުލައި މަހު ވެސް ޔަހޫދީ އިސްރާޢީލުން ވަނީ ޖިނީނަށް އަރައި ލާއިންސާނީ އުދުވާންތަކެއް ހިންގައި ގިނަ ޢަދަދެއްގެ ބަޔަކު ޝަހީދުކޮށްލާފައެވެ.
ޔަހޫދީ އިސްރާޢީލުން ހަމަލަދީ ޝަހީދުކޮށްލާފައި ވަނީ ކާރެއްގައި ދަތުރުކުރި ފަލަސްޠީނުގެ ތިން މީހުންނެވެ. އެ މީހުން ދަތުރު ކުރި ކާރުގެ ތެރެއިން އޮޓޮމެޓިކް ބަޑިއެއް ފެނިފައިވާ ކަމަށާއި، އެއީ އިސްރާޢީލާ ދެކޮޅަށް ހަމަލަތަކެއް ދިނުމަށް ރާވަމުން ދިޔަ ތިން މީހުން ކަމުގައި ޔަހޫދީ ޖައްބާރު ދަޢުލަތުގެ ޓެރެރިސްޓު އަސްކަރިއްޔާއިން ބުންޏެވެ.
އެ ތިން މީހުން ޝަހީދުކޮށްލާފައި ވަނީ ހުޅަނގު އައްސޭރީގައި ފަލަސްޠީނުގެ ރައްޔިތުން ދިރިއުޅޭ އަވަށަކަށް ޔަހޫދީންގެ ބަޔަކު ހަމަލަތަކެއް ދީފައިވާ ދަނޑިވަޅެއްގައެވެ. އެ ހަމަލަތަކުގައި ފަލަސްޠީނުގެ 19 އަހަރުގެ ޒުވާނެއް ޝަހީދުކޮށްލާފައިވެއެވެ. އެމެރިކާއިން ވަނީ އެއީ ޓެރެރިޒަމްގެ އަމަލެއް ކަމަށް ސިފަކޮށް، ޔަހޫދީ ވަޒަންވެރިންގެ އުދުވާންތައް ކުށްވެރިކޮށްފައެވެ. ޔަހޫދީ އިސްރާޢީލުން ބުނީ ކާރުގައި ދަތުރު ކުރަނިކޮށް ޝަހީދުކޮށްލާފައިވާ ތިން މީހުންނަކީ، އެ އަވަށަށް ޔަހޫދީންގެ ޢާންމުން ދިން ހަމަލަތަކުގެ ބަދަލު ހިފުމަށް ރާވަމުން ދިޔަ ތިން މީހުން ކަމުގައެވެ.
އެއީ ޓެރެރިސްޓުންގެ ގޮތުގައި ވެސް ޔަހޫދީ ޖައްބާރު އަސްކަރިއްޔާއިން ސިފަކުރިއެވެ. ނަމަވެސް، ހަޤީޤަތަކީ، އެއީ ޔަހޫދީ އިސްރާޢީލުގެ އަޅުވެތިކަމުން ފަލަސްޠީނުގެ ރައްޔިތުން ސަލާމަތްކޮށް، ފަލަސްޠީނަށް މިނިވަން ކަން ހޯދައިދޭން ޖިހާދު ކުރަމުންދާ މުޖާހިދުންގެ ޖަމާޢަތަކަށް ނިސްބަތްވާ ތިން މުޖާހިދުން ކަމެވެ.
އެ ތިން މުޖާހިދުން ޝަހީދުކޮށްލުމަށް ހިންގި ލާއިންސާނީ ޖަރީމާތަކުގައި ބައިވެރިވި ޔަހޫދީ އަސްކަރިއްޔާގެ ޓެރެރިސްޓު ސިފައިންނަށް އެ ޤައުމުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ވަނީ ތާރީފު ކޮށްފައެވެ. އޭނާއަކީ ފަލަސްޠީނުގެ މުސްލިމުންގެ ލޭއޮހޮރުވައިލުމަށް ގޮވައިލަމުންދާ، އެ ކަމަށް ހިތްވަރުދޭ، އަދި އެ ކަމަށް އަމުރުކުރަމުންދާ ޖައްބާރު ކަމުން ފުރިފައިވާ މީހެކެވެ.
ފަލަސްޠީނުގެ މުޖާހިދުންގެ ޖަމާޢަތްތަކުން ވަނީ ޔަހޫދީ އިސްރާޢީލުގެ އުދުވާންތައް ކުށްވެރިކޮށްފައެވެ. ޣައްޒާގައި ވެރިކަން ކުރާ ހަމާސް ޖަމާޢަތުން ބުނީ ޝަހީދުކޮށްލާފައިވާ ތިން މީހުންގެ ބަދަލު ހިފާނެ ކަމުގައެވެ. އަދި، އިސްލާމިކް ޖިހާދުން ބުނީ ޔަހޫދީ އަސްކަރިއްޔާއިން ހިންގާ ޓެރެރިޒަމްގެ މި ފަދަ އަމަލުތަކަށް ރައްދު ދޭނެ ކަމުގައެވެ.
ޔަހޫދީ އިސްރާޢީލުގެ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީން މީހުންގެ ޢަދަދު މިހާރު ވަނީ 210 އަށްވުރެ މައްޗަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. ޖުލައި މަހުގެ ކުރީކޮޅު ޔަހޫދީ ސިފައިން ޖިނީން ރެފިއުޖީ ކޭމްޕުގައި ހިންގި އުދުވާންތަކެއްގައި ވެސް ފަލަސްޠީނުގެ 12 މީހުން ޝަހީދުކޮށްލިއެވެ. އަދި، އެ ކޭމްޕު ސުންނާފަތިކޮށްލިއެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.