އެމްޑަބްލިއުއެސްސީ ދިވެހި ޕްރިމިއަރ ލީގުގައި މިރޭ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅެން ހަމަޖެހިފައި އޮތް މެޗު، ކުލަބު އީގަލްސްއިން އެދުނު ގޮތަށް ފަސްކޮށްދީފިއެވެ.
އޭއެފްސީ ޕްރިލިމިނަރީ ބުރުގައި މި މަހު 16 ވަނަ ދުވަހު ބަންގްލަދޭޝްގެ ޑާކާ އަބަހާނީއާ ދެކޮޅަށް އީގަލްސްއިން ކުޅެން އޮތް މެޗަށް އެ ޓީމުން ދިގު ދަތުރެއް ކުރަން ޖެހޭތީ އާއި އެ މެޗަށް ތައްޔާރުވާން ވަގުތު ބޭނުންވާތީ، އެ ޓީމުން ވަނީ މާޒިޔާ މެޗު ފަސްކޮށްދިނުމަށް އެދިފައެވެ.
އެއާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މިޑީއާ ގުރޫޕުގައި ހިއްސާކުރި މެސެޖެއްގައި، އެ އިދާރާގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ މިރޭގެ މެޗު ފަސްކުރަން ނިންމާފައިވާ ކަމަށާއި، އެ މެޗު ދެން ތާވަލުކުރެވޭނެ ތާރީޚެއް ފަހުން އަންގާނެ ކަމަށެވެ.
މިއީ ކުލަބު އީގަލްސްއިން އޭއެފްސީ ކަޕުގެ ކޮލިފައިންގައި ވާދަކުރާ ދެވަނަ ފަހަރެވެ. އެ ޓީމުން އެންމެ ފަހުން ކޮލިފައިންގައި ވާދަކުރި ފަަހަރު ޕްލޭއޮފްގައި ބަލިވީ ބެންގަލޫރު އެފްސީ އަތުންނެވެ. އެ ގޮތުން 2021 ގައި އީގަލްސްއިން ޕްރިލިމިނަރީ ފުރަތަމަ ބުރުގައި މާލޭގައި ބޫޓާންގެ ތިމްޕޫ ސިޓީ އަތުން މޮޅުވިއެވެ. އެއާއެކު ޕްރިލިމިނަރީ ދެވަނަ ބުރުގައި އީގަލްސް ކުޅެން ޖެހުނީ ބަންގްލަދޭޝްގެ އަބަހާނީއާއެވެ. އެ ފަހަރު އަބަހާނީއަށް އެ ޤައުމުގައި މެޗު ކުޅެވޭގޮތް ނުވެ، ދަތުރުކުރުމުގައިވެސް ދަތިވެފައިވާތީވެ، އެ މެޗު އީގަލްސްއަށް ލިބި ޕްލޭއޮފަށް ދަތުރުކުރީއެވެ.
އަބަހާނީ ބަލިކޮށްގެން، މި ފަހަރުގެ ޕްލޭއޮފް ބުރަށް އީގަލްސް ދަތުރުކޮށްފިނަމަ, އެ ބުރުގައި ކުޅެން ޖެހޭނީ އިންޑިއާގެ މޯހަން ބަގާން އާއި ނޭޕާލުގެ މަޗިންދުރަ އެފްސީ ކުޅެގެން މޮޅުވާ ޓީމަކާއެވެ.