އެމްޑަބްލިއުއެސްސީ ދިވެހި ޕްރިމިއަރ ލީގުގެ ދެވަނަ ބުރުގައި ބުރު ސްޕޯޓްސް ކުލަބު ބަލިކޮށް ތާވަލުގެ ދެވަނައަށް ސުޕަ ޔުނައިޓެޑް ސްޕޯޓްސް (ސަސް) ޖެހިލައިފިއެވެ.
ޤައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު ސަސްއިން ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. މި މެޗުގެ ކުރިން ލީގުގެ ފުރަތަމަ ބުރުގެ ފަހު މެޗުގައިވެސް ސަސް ވާދަކޮށްފައިވަނީ ބުރު ސްޕޯޓްސްއާއެވެ. އެ މެޗު ސަސްއިން ކާމިޔާބުކުރީ 2-1 ގެ ނަތީޖާއަކުންނެވެ.
މިއަދު ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 15 ވަނަ މިނެޓުގައި އޭރިއާ ބޭރުން ސަސްގެ މުޙައްމަދު ސަޚާއު ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އަދި އޭގެ ހަތަރު މިނެޓު ފަހުން އޭރިއާ ބޭރުން ބުރު ސްޕޯޓްސްގެ މުޙައްމަދު ސާމިރު ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މި މެޗުގައި ސަސްއިން ލީޑު ނަގާފައިވަނީ މެޗުގެ 22 ވަނަ މިނެޓުގައެވެ. ކައުންޓަރ އެޓޭކެއްގައި ސަޚާއު ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އަލީ ނަސޫހް ރަޝީދެވެ. އޭގެ ފަހުން މެޗުގެ 27 ވަނަ މިނެޓުގައި އޭރިއާ ތެރެއިން ބުރު ސްޕޯޓްސްގެ މުޙައްމަދު ނާއިމް ފޮނުވާލި ބޯޅައެއް، ސަސްގެ ގޯލްކީޕަރު އަބްދުﷲ ޒިމާމް ވަނީ ދިފާއުކޮށްފައެވެ.
މި މެޗުގައި ސަސްއިން ލީޑު ފުޅާކޮށްފައިވަނީ ދެވަނަ ހާފު ފަށައިގެން ފަސްވަނަ މިނެޓުގައެވެ. މުޙައްމަދު އަލާއު ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖަހައިދިން ނަސޫހެވެ. އަދި އޭގެ ހަތް މިނެޓު ފަހުން ބުރު ސްޕޯޓްސްގެ އަލީ އިޝްފާގް ހަސަން މަޖީދު އަތުން ބޯޅަ ހޯދައި އޭރިއާ ތެރެއިން ސަސްގެ އަޙްމަދު އައިހަމް ފޮނުވާލި ނުރައްކާތެރި ހަމަލާގެ ހުރަހަކަށްވީ ބުރު ސްޕޯޓްސްގެ ކީޕަރު އަބްދުﷲ އަރުޝަންއެވެ.
މި މެޗުގެ 81 ވަނަ މިނެޓުގައި ތިންވަނަ ލަނޑެއް ޖަހަން ސަސްއަށް ޕެނަލްޓީއެއް ލިބުނު ނަމަވެސް، އެ ޓީމުގެ އައިހަމް އަޙްމަދު ފޮނުވާލި ޕެނަލްޓީ، ބުރު ސްޕޯޓްސްގެ ކީޕަރު ވަނީ ދިފާއުކޮށްފައެވެ. މިއީ އޭރިއ ތެރެއިން ސަސްގެ ނަސޫހަށް، ބުރު ސްޕޯޓްސްގެ ކީޕަރު އަރުޝަން ކުރި ފައުލަކަށް ރެފުރީ ދިން ޕެނަލްޓީއެކެވެ.
މި މޮޅާއެކު ތާވަލުގެ ދެވަނައަށް ސަސް ޖެހިލީ ކުޅުނު އަށް މެޗުން ލިބުނު 18 ޕޮއިންޓާއެކުއެވެ. ތާވަލުގެ ތިންވަނައަށް ވެއްޓުނު ކުލަބު އީގަލްސްއަށް ހަތް މެޗުން 17 ޕޮއިންޓް ލިބިފައިވާއިރު، ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ހަތް މެޗުން ލިބިފައިވަނީ 19 ޕޮއިންޓެވެ. ލީގުގައި މިރޭ މާޒިޔާ އާއި އީގަލްސް ބައްދަލުކުރަން ހަމަޖެހިފައި އޮތް ނަމަވެސް، އީގަލްސްގެ އެދުމުގެ މަތިން އެ މެޗު މިހާރު ވަނީ ފަސްކޮށްފައެވެ.
މީގެ އިތުރުން ސަސް އަތުން ބަލިވި ބުރު ސްޕޯޓްސް ފަސްވަނައިގައި އޮތީ އަށް މެޗުން 12 ޕޮއިންޓާއެކުއެވެ. ހަތަރުވަނައިގައި އޮތީ އަށް މެޗުން 13 ޕޮއިންޓް ހޯދާފައިވާ ޓީސީ ސްޕޯޓްސް ކުލަބެވެ.