ޕެނަލްޓީގައި 4-1 އިން މެންޗެސްޓާ ސިޓީ ބަލިކޮށް ކޮމިއުނިޓީ ޝީލްޑް އާސެނަލުން ކާމިޔާބުކޮށްފި އެވެ.
މިއީ އާސެނަލަށް ބޮޑު ކާމިޔާބީއެކެވެ. އެގޮތުން މިއީ އިނގިރޭސި ފުޓްބޯޅަ ސީޒަން ހުޅުވުމުގެ ގޮތުން ކުޅޭ ކޮމިއުނިޓީ ޝީލްޑް މެޗު 2020 ވަނަ އަހަރަށް ފަހު އާސެނަލުން ކާމިޔާބުކުރި ފުރަތަމަ ފަހަރެވެ.
ވެމްބްލީ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފްގައި ގޯލެއް ނުފެނެއެވެ. ފުރަތަމަ ހާފްގައި ގޯލެއް ފެނިގެން ގޮސްފައި ނުވި ނަމަވެސް މެޗުގެ 77 ވަނަ މިނެޓްގައި ކޯލް ޕާމާ ވަނީ ސިޓީ އަށް ލީޑު ނަގައިދީފަ އެވެ. މިއީ އާސެނަލްގެ ޕެނަލްޓީއޭރިއާ ތެރޭ ހުރެ ފޮނުވާލި ހަމަލާއެއް ގޯލުގެ ކަނަށް އަމާޒުކޮށްލައިގެން ޕާމާ ކާމިޔާބުކުރި ލަނޑެކެވެ.
މި ގޯލާއެކު ސިޓީ މޮޅުވާން ދަނިކޮށް މެޗުގެ އެންމެފަހު ވަގުތުކޮޅުތެރޭ ލިއަންޑްރޯ ޓްރޮސާޑް ވަނީ އާސެނަލަށް ނަތީޖާ އެއްވަރުކޮށްދީފަ އެވެ. މެޗުގެ 90 މިނެޓް ހަމަވިއިރު ނަތީޖާ އެއްވަރުވެފައި އޮތުމުން ނަތީޖާ ދެން ނެރުނީ ޕެނަލްޓީންނެވެ. ޕެނަލްޓީގައި ސިޓީގެ ކެވިން ޑި ބްރޭނާ އާއި ރޮޑްރީ ފޮނުވާލި ޕެނަލްޓީތައް ކާމިޔާބުވެފައެއް ނުވެ އެވެ. އާސެނަލުން ޖެހި ހަތަރު ޕެނަލްޓީ ވެސް އެޓީމުން ވަނީ ކާމިޔާބުކޮށްފަ އެވެ.
ޕްރިމިއާ ލީގުގެ އާ ސީޒަން އަންނަ ހޮނިހިރު ދުވަހު ފަށާނެ އެވެ.