ބައިނަލްއަޤުވާމީ ޤާނޫނުތަކާ ޚިލާފަށް ހުޅަނގު އައްސޭރީގައި ވަޒަންވެރިވެގެން އުޅޭ ޔަހޫދީއަކު ބަޑިން ހަމަލަދީ ފަލަސްޠީނުގެ ޒުވާނަކު ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީއެއްގެ ޝިކާރައަކަށްވެ ޝަހީދުވެފައި ވަނީ އުމުރުން 19 އަހަރުގެ ޤުޞައްޔު ޖަމާލް މަޢުޠާނީ ކަމުގައެވެ.
ޤުޞައްޔު ޝަހީދުކޮށްލާފައި ވަނީ ރާމަاللهގެ އިރުން އޮންނަ ބަރްޤަޢު ކިޔާ އަވަށެއްގައި ދިން ހަމަލައެއްގައެވެ. އޭނާ ޝަހީދުކޮށްލާފައި މި ވަނީ، ހުޅަނގު އައްސޭރީގައި ވަޒަންވެރިވެގެން އުޅޭ ޔަހޫދީންގެ މި ފަދަ ހަމަލަތައް އިތުރުކޮށް، ފަލަސްޠީން ރައްޔިތުންގެ ފުރާނައަށް އިތުރަށް ނުރައްކާވަމުންދާ ކަމަށް ބުނެ އ.ދއިން އިންޒާރު ކޮށްފައިވާ ދަނޑިވަޅެއްގައެވެ.
ޔަހޫދީ ވަޒަންވެރިން ހިންގާ މި ފަދަ ލާއިންސާނީ އުދުވާންތަކުގެ ޢަދަދު ހުސްވި 2022 ވަނަ އަހަރުގެ ކުރީކޮޅން ފެށިގެން ވަނީ އިތުރުވެފައެވެ. އަދި، މި ކަމުގެ ބަދަލުހިފުމުގެ ގޮތުން ފަލަސްޠީނުގެ މިނިވަން ކަމަށް ޖިހާދު ކުރާ މުޖާހިދުންގެ ޖަމާޢަތްތަކުން ދޭ ހަމަލަތަކުގެ ޢަދަދުތައް ވެސް ވަނީ އިތުރުކޮށްފައެވެ.
ބަރްޤަޢުގައި ހަމަނުޖެހުންތައް ހިނގާފައި ވަނީ ބަކަރި ހުއިހައްޕަން ތިބި ފަލަސްޠީނުގެ ބަޔަކާއި ޔަހޫދީ ވަޒަންވެރިންގެ ބަޔަކާ ދެމެދު ކަމަށް ރިޕޯޓުތައް ބުނެއެވެ. އަދި، ޔަހޫދީންނާ ދިމާލަށް ފަލަސްޠީނުގެ ޒުވާނުން ގައު އުކުމުން، އެ މީހުންނާ ދިމާލަށް ޔަހޫދީން ބަޑި ޖަހާފައިވާ ކަމުގައި ވެސް ރިޕޯޓުތައް ބުނެއެވެ. މި ހަމަނުޖެހުންތަކުގައި ފަލަސްޠީނުގެ އިތުރު ހަތަރު މީހަކު ޒަޚަމުވެފައިވާ ކަމުގައި ޞިއްޙަތާ ބެހޭ ވުޒާރާއިން ބުނެއެވެ.
މި ހަމަނުޖެހުންތަކުގެ ތެރެއިން ޔަހޫދީންގެ ބަޔަކު ވަނީ ފަލަސްޠީން ރައްޔިތުންގެ އެއްގަމު އުޅަނދު ފަހަރަށް ގެއްލުންދީ، އުޅަނދުތަކެއްގައި ހުޅުވެސް ޖަހާފައެވެ. މި ފަދަ ހަމަނުޖެހުންތައް ގިނައިން ފެށިފައި ވަނީ އަޅުވެތިކޮށްފައިވާ ފަލަސްޠީނުގެ ބިންތަކަށް ޔަހޫދީ އިސްރާޢީލުގެ ޖައްބާރު ސިފައިން އަރައި އުދުވާންތައް ހިންގަން ފެށުމުންނެވެ.
ޖޫން މަހުގެ ތެރޭގައި ވެސް ޔަހޫދީން ވަނީ މި ފަދަ ނުރައްކާތެރި ހަމަލަތަކެއް ދީފައެވެ. ހުޅަނގު އައްސޭރީގެ އަވަށެއް ކަމުގައިވާ ތަރްމުސް އާޔާގައި ޔަހޫދީން ހިންގި އުދުވާންތަކުގައި ފަލަސްޠީނުގެ ޢާންމުންނަށް ހަމަލަދީ، އެ މީހުންގެ ގެދޮރާއި ގިނަ ޢަދަދެއްގެ އެއްގަމު އުޅަނދުގައި ހުޅު ޖަހާފައިވެއެވެ. އެ ހަމަނުޖެހުންތައް ފެށުނީ ޔަހޫދީ އިސްރާޢީލުގެ ޓެރެރިސްޓު ސިފައިން ޖިނީން ރެފިއުޖީ ކޭމްޕަށް އަރައި ފަލަސްޠީނުގެ ހަ މީހަކު ޝަހީދުކޮށްލުމާ ގުޅިގެންނެވެ.
އ.ދގެ އިންސާނީ އެހީއާ ބެހޭ އިދާރާ – ޔޫ.އެން އޮފީސް ފޯ ދަ ކޯޑިނޭޝަން އޮފް ހިޔުމެނިޓޭރިއަން އެފެއާޒް (އޯ.ސީ.އެޗް.އޭ)އިން ބުނީ މި އަހަރުގެ ފުރަތަމަ ހަ މަސް ދުވަހުގެ ތެރޭގައި ޔަހޫދީން އިސްވެ މި ފަދަ 591 ހަމަލަ ދީފައިވާ ކަމުގައެވެ. އަދި، އެ ހަމަލަތަކުގައި ފަލަސްޠީން ރައްޔިތުންގެ ފުރާނައަށް ނުރައްކާވެ، ގެދޮރާއި މުދަލަށް ބޮޑެތި ގެއްލުންތަކެއް ލިބިފައިވާ ކަމުގައެވެ.
އޯ.ސީ.އެޗް.އޭގެ ތަރުޖަމާނު ޔެންސް ލެއަކަރ ވިދާޅުވީ މި އަހަރުގެ ފުރަތަމަ ހަ މަސް ދުވަހުގެ ތެރޭގައި ކޮންމެ މަހަކު މި ފަދަ 99 ހާދިސާއެއް ހިނގާފައިވާ ކަމުގައެވެ. އަދި، ހުސްވި 2022 ވަނަ އަހަރުގެ ފުރަތަމަ ހަ މަސް ދުވަހާއި އަޅައިބަލާއިރު، ޔަހޫދީ ވަޒަންވެރިންގެ ހަމަލަތަކުގެ ޢަދަދު މި އަހަރު 39 އިންސައްތަ އިތުރުވެފައިވާ ކަމުގައެވެ.
އޮގަސްޓު 4 ވަނަ ދުވަހު ވެސް ޔަހޫދީ އިސްރާޢީލުގެ ޓެރެރިސްޓު އަސްކަރިއްޔާއިން ވަނީ ހުޅަނގު އައްސޭރީގެ ޠުލްކަރްމަށް އަރައި ލާއިންސާނީ ޖަރީމާތަކެއް ހިންގައި ފަލަސްޠީނުގެ ޒުވާނަކު ޝަހީދުކޮށްލާފައެވެ. އެ ދުވަހު ޝަހީދުކޮށްލާފައި ވަނީ އުމުރުން 18 އަހަރުގެ މަޙްމޫދު އަބޫ ސާނެވެ. އޭނާގެ ކުށަކީ ވެސް ޔަހޫދީ ސިފައިންނާ ދިމާލަށް ގައު އުކުމެވެ.
ޔަހޫދީ އިސްރާޢީލުގެ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީން މީހުންގެ ޢަދަދު މިހާރު ވަނީ 207 އަށްވުރެ މައްޗަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ. ޖުލައި މަހުގެ ކުރީކޮޅު ޔަހޫދީ ސިފައިން ޖިނީން ރެފިއުޖީ ކޭމްޕުގައި ހިންގި އުދުވާންތަކެއްގައި ވެސް ފަލަސްޠީނުގެ 12 މީހުން ޝަހީދުކޮށްލިއެވެ. އަދި، އެ ކޭމްޕު ސުންނާފަތިކޮށްލިއެވެ.
ޔަހުދީ އިސްރާޢީލުގެ އިސްތިޢުމާރީ ސިފައިން ފަލަސްޠީނުގެ ބިންތަކަށް އަރައި ހުޅަނގު އައްސޭރި އަޅުވެތިކޮށްފައި ވަނީ 1967 ވަނަ އަހަރުއެވެ. އޭގެ ފަހުން ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީންގެ އަޅުވެތިކަމުގެ ދަށުގައެވެ. އަދި، ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންގެ ޢަދަދު މިހާރު 490,000 އަށް އަރައެވެ.