ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ ގަދަ 16 ބުރުގައި ސްވިޓްޒަލަންޑް ބަލިކޮށް، މުބާރާތުގެ ކުއާޓާ ފައިނަލުން ސްޕެއިން ޖާގަ ހޯދައިފިއެވެ.
ނިއު ޒީލަންޑުގެ އެޑެން ޕާކުގައި މިއަދު ކުޅުނު މެޗު ސްޕެއިނުން ކާމިޔާބުކޮށްފައިވަނީ ފަސޭހަކަމާއެކު 5-1 ގެ ނަތީޖާއަކުންނެވެ.
މި މެޗުގައި ސްޕެއިނުން ކާމިޔާބުކުރި ފަސް ލަނޑުގެ ތެރެއިން ހަތަރު ލަޑު ޖަހާފައިވަނީ މެޗުގެ ފުރަތަމަ ހާފުގައެވެ. އެގޮތުން މި މެޗުގައި ސްޕެއިނުން ލީޑު ނަގާފައިވަނީ މެޗު ފަށައިގެން ފަސްވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އައިޓާނާ ބޯންމާޓީއެވެ. އެކަމަކު މެޗުގެ 11 ވަނަ މިނެޓުގައި ސްވިޓްޒަލަންޑުން ނަތީޖާ އެއްވަރުކުރިއިރު، މި ލަނޑަކީ ސްޕެއިނުގެ ލައިއާ ކޯޑީނާ އަތުން ބައިކޮޅަށް ވަން ލަނޑެކެވެ.
އެކަމަކު އޭގެ ހަ މިނެޓު ފަހުން ސްޕެއިނުން ވަނީ މި މެޗުގައި އަލުން ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ އަލްބާ ރެޑޯންޑޯއެވެ. އަދި މެޗުގެ 36 ވަނަ މިނެޓުގައި ސްޕެއިނުގެ ބޯންމާޓީ އިތުރު ލަނޑެއް ކާމިޔާބުކުރިއިރު، ފުރަތަމަ ހާފުގެ ފަހު މިނެޓުގައި އެ ޓީމުގެ ހަތަރުވަނަ ލަނޑު ޖަހައިދިނީ ކޯޑީނާއެވެ.
މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ސްޕެއިނުން ކާމިޔާބުކުރި ހަމައެކަނި ލަނޑު ފެނިގެންދިޔައީ މެޗުގެ މެޗުގެ 70 ވަނަ މިނެޓުގައެވެ. މި ލަނޑު ޖަހައިދިނީ ޖެނިފާ ހާމޯސޯއެވެ.
މި މޮޅާއެކު މި ފަހަރުގެ މުބާރާތުގެ ކުއާޓާއަށް ސްޕެއިން ދަތުރުކުރިއިރު، މިއީ ވިމެންސް ވޯލްޑް ކަޕެއްގެ ކުއާޓާ ފައިނަލުން ސްޕެއިން ޖާގަ ހޯދި ފުރަތަމަ ފަހަރެވެ. މި ފަހަރުގެ މުބާރާތުގެ ކުއާޓާގައި ސްޕެއިން ބައްދަލުކުރަން ޖެހޭނީ ގަދަ 16 ބުރުގައި ނެދަލަންޑްސް އާއި ދެކުނު އެފްރިކާ ކުޅޭ މެޗުން މޮޅުވާ ޓީމަކާއެވެ.