މިހާރު ކުރިއަށްދާ ކުލަބު މޯލްޑިވްސް ކަޕް 2023 ގެ ގަދަ 16 ބުރުގައި ކުޅުނު މެޗުތައް ކާމިޔާބުކޮށް، މުބާރާތުގެ ކުއާޓާ ފައިނަލަށް ޔުނައިޓެޑް ބީއެމްއެލް، ސްޓެލްކޯ ކުލަބު، އާބަންކޯ އަދި ވެމްކޯ ދަތުރުކޮށްފިއެވެ.
މުބާރާތުގެ ކުއާޓާއަށް ބީއެމްއެލް ދަތުރުކުރީ އެންމެ ފަހުގެ ރަނަރަޕް، އެމްޕީއެލް 1-0 ގެ ނަތީޖާއަކުން ބަލިކޮށްގެންނެވެ. މޮޅުވުމުގެ ރިކޯޑަކާއެކު ތިން ފަހަރު މުބާރާތުގެ ތަށި ހޯދާފައިވާ އެމްޕީއެލް އަށް މި މެޗުގައި ބީއެމްއެލް ކޮޅަށް ލަނޑެއް ނުޖެހުނެވެ. މެޗުގައި ބީއެމްއެލްގެ ހަމައެކަނި ލަނޑު ކާމިޔާބުކުރީ އިޝާން އިބްރާހިމް (ސައްޓު) އެވެ.
ގަދަ 16 ބުރުގައި ކަސްޓަމްސް ރެކްރިއޭޝަން ކްލަބް އަތުން ސްޓެލްކޯ މޮޅުވީ 6-0 ގެ ނަތީޖާއަކުންނެވެ. އެ ޓީމުގެ ލަނޑުތައް ޖެހީ އިބްރާހިމް ރިމާހު (ރިމޭ) ދެ ގޯލާއި އަލީ މާއިޝް (މައްޓު)، ޖުމައިލް ޖަމީލް، މުހައްމަދު ޝިރުހާން އަދި ހާރޫން އިބްރާހިމް އެވެ.
ވެމްކޯ ކުއާޓާއަށް ދަތުރުކުރީ ކްރޮސްރޯޑްސް މޯލްޑިވްސްގެ މައްޗަށް 6-0 އިން ކުރި ހޯދައިގެންނެވެ. ވެމްކޯގެ ލަނޑުތައް ޖެހީ އަލީ ޝިޔާހު ، އިސްމާއިލް ވަޖީހު ، މުސައްނިފު މުހައްމަދު އަދި އަބްދުﷲ ޖުނައިދު އެވެ. މީގެތެރެއިން ޝިޔާހު ވަނީ ހެޓްރިކެއް ހަދާފައެވެ.
އަދި ކްލަބް އާބަންކޯ އިން ވަނީ 5-0 އިން ޕްރިޒަން ކްލަބް ބަލިކޮށްފަ އެވެ. އާބަންކޯ އަށް މި މެޗުގައި ލަނޑުތައް ޖަހައިދިނީ އަބްދުﷲ ޝާފިއު ދެ ގޯލާއި ޔާމިން މުހައްމަދު (ޔާންޓެ)، އަބްދުﷲ ޝައްފާން (ޝާކާ) އަދި ސާމިން މުހައްމަދު ނަސީރު އެވެ.
ކްލަބް މޯލްޑިވްސް ކަޕްގެ ގަދަ 16 ބުރުގެ ފަހު މެޗުތަކުގެ ތެރެއިން ރޯޑް ރެކްރިއޭޝަން ކްލަބް ކުޅޭނީ އެމްއޭސީއެލްއާ އެވެ. އަދި އެސްޓީއޯ އާއި މޯލްޑިވިއަން ބައްދަލުކުރާނެއެވެ. މީގެއިތުރުން ކްލަބް ފެން އާއި ޓީމު އެފްއެސްއެމް ބައްދަލުކުރާ އިރު އެންމެ ފަހުގެ ޗެމްޕިއަން، ޓީމު ފެނަކަ އާއި ގޭސް ކްލަބްގެ ކުރިމަތިލާނެއެވެ.