ބްލެކް ސީ ނުވަތަ ކަޅު ކަނޑުގެ އައްސޭރިފަށުގައި އޮންނަ ރަޝިޔާގެ ކަނޑުގެ ސިފައިންގެ އަސްކަރީ ބަނދަރަކަށް ޑްރޯން ހަމަލަތަކެއް ދީފިއެވެ. "ސީ ޑްރޯން" ނުވަތަ ކަނޑުގައި ދުއްވާ ޑްރޯންތަކެއް ބޭނުންކޮށްގެން ދީފައިވާ މި ހަމަލަތައް އަމާޒުކޮށްފައި ވަނީ ކަޅު ކަނޑުގެ އައްސޭރިފަށުގައި އޮންނަ ނޮވޮރޮސީސްކްގައި އޮންނަ އަސްކަރީ ބަނދަރަށެވެ.
މިއީ ޔޫކްރެއިނުން ދިން ހަމަލަތަކެއް ކަމަށް ތުހުމަތުކޮށް ރަޝިޔާގެ ދިފާޢީ ވުޒާރާއިން ބުނީ ރަޝިޔާގެ މަނަވަރުތަކުން ޑްރޯން ހަމަލަތައް ދިފާޢުކޮށްފައިވާ ކަމުގައެވެ. ނޮވޮރޮސީސްކަކީ ރަޝިޔާގެ މައި ވިޔަފާރި ބަނދަރެއް ވެސް އޮންނަ ސަރަޙައްދެކެވެ. މިއީ، 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން އެ ސަރަޙައްދަށް ހަމަލައެއް ދީފައިވާ ފުރަތަމަ ފަހަރެވެ.
ނޮވޮރޮސީސްކުގައި އޮންނަ ވިޔަފާރި ބަނދަރުން ތެޔޮ އެކްސްޕޯޓުކުރާ ކެސްޕިޔަން ޕައިޕްލައިން ކޮންސޯޓިޔަމް ކުންފުނިން ބުނީ، ހަމަލަތަކާ ގުޅިގެން ވިޔަފާރި ބަނދަރު ވަގުތީ ގޮތުން ބަންދުކޮށް، ތެޔޮ އެކްސްޕޯޓު ކުރުމުގެ މަސައްކަތްތައް ވަގުތީ ގޮތުން މެދުކަނޑައިލަން ޖެހުނު ކަމުގައެވެ. ރަޝިޔާގެ މީޑިޔާތަކުން ވަނީ ނޮވޮރޮސީސްކު ކައިރިން ބާރުގެ ގޮވުންތަކާއި ބަޑީގެ ހަމަލަތަކުގެ އަޑުތައް އިވުނު ކަމުގައެވެ. ނަމަވެސް، ބަނދަރަށް އެއްވެސް ވަރެއްގެ ގެއްލުމެއް ލިބިފައިވާ ކަމުގެ ރިޕޯޓެއް ކޮށްފައެއް ނެތެވެ.
ނޮވޮރޮސީސްކުގެ އެމަރޖެންސީ ޚިދުމަތްތަކުން ވެސް ވަނީ އެ ސަރަޙައްދަށް ޑްރޯން ހަމަލަތަކެއް ދީފައިވާ ކަން ކަށަވަރުކޮށްދީފައެވެ. އަދި، އެ ކަމުގެ މަޢުލޫމާތު ރަޝިޔާގެ ސަލާމަތީ ޚިދުމަތްތަކާ ބެހޭ އިދާރާއަށް ހުށަހަޅާފައިވާ ކަމުގައި ރަޝިޔާގެ މީޑިޔާތަކުން ރިޕޯޓު ކުރެއެވެ. ނޮވޮރޮސީސްކުގައި އޮންނަ ބަނދަރަކީ ކަޅު ކަނޑުގެ އައްސޭރިފަށުގައި އޮންނަ ރަޝިޔާގެ އެންމެ ބޮޑު ވިޔަފާރި ބަނދަރެވެ.
އެ ބަނދަރު އޮންނަ ސަރަޙައްދަށް ޑްރޯން ހަމަލަތަކެއް އަމާޒުކޮށްފައި މި ވަނީ، ޔޫކްރެއިނުން ގޮވާން އެކްސްޕޯޓުކުރުމާ ގުޅޭ ގޮތުން އެ ޤައުމާއި ޔޫކްރެއިނާ ދެމެދު ހަދާފައިވާ އެއްބަސްވުމުގެ މުއްދަތު އިތުރުކުރަން ރަޝިޔާއިން ދެކޮޅު ހަދައި، އެއްބަސްވުން ރޫޅައިލާފައިވާ ދަނޑިވަޅެއްގައެވެ. އެ އެއްބަސްވުން ރޫޅައިލާފައި ވަނީ ހުސްވި ޖުލައި މަހުއެވެ.
2022 ވަނަ އަހަރުގެ ފެބުރުވަރީ މަހުގެ ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމުގެ ކުރިން ޔޫކްރެއިނަކީ ދުނިޔޭގެ ބާޒާރަށް އެންމެ ގިނައިން ގޮވާމުގެ ބާވަތްތައް ފޯރުކޮށްދޭ ޤައުމެވެ. ނަމަވެސް، ހަނގުރާމައާ އެކު އެ ކަމަށް ހުރަސްއެޅި، ދުނިޔޭގެ ބާޒާރުތަކުގައި ކާބޯތަކެތީގެ އަގުތައް އިންތިހާއަށް އުފުލި، އެތަކެއް މިލިޔަން މީހުންނަށް ކާބޯތަކެތީގެ ރައްކާތެރިކަން ކަށަވަރުކޮށްދޭން ހުރަސް އެޅުނެވެ.
ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުން އަލުން ފެށުމަށް ރަޝިޔާއިން ހުއްދަ ދީފައި ވަނީ 2022 ވަނަ އަހަރުގެ ޖުލައި މަހުއެވެ. އެ ކަމާ ގުޅޭ ގޮތުން އެއްބަސްވުމެއް އެކުލަވައިލާފައި ވަނީ ތުރުކީވިލާތުގެ ބައިވެރިވުމާ އެކު އ.ދއިންނެވެ. އެ އެއްބަސްވުމުގެ މުއްދަތު ހުސްވި ޖުލައި މަހު ހަމަވެފައިވާއިރު، ރަޝިޔާއިން ވަނީ އެއްބަސްވުމުގެ މުއްދަތު އިތުރުކުރަން ދެކޮޅު ހަދާފައެވެ.
އަދި، އެއްބަސްވުމަށް ހުރަސް އެޅުމަށް ފަހު ރަޝިޔާއިން ވަނީ ޔޫކްރެއިނުން ގޮވާން އެކްސްޕޯޓު ކުރަން ހުރަސް އެޅުމުގެ ގޮތުން ބްލެކް ސީ ނުވަތަ ކަޅު ކަނޑުގެ އައްސޭރިފަށުގައިވާ ޔޫކްރެއިންގެ ބަނދަރުމަތީ ރަށްތަކަށް ހަމަލަދޭން ފަށާފައެވެ. މީގެ ތެރެއިން ގިނަ ހަމަލަތައް އަމާޒުކޮށްފައި ވަނީ އަދިއްސާ، މިކޮލައިފް އަދި ޑެނިޔުބް ކޯރުގެ އައްސޭރިފަށުގައިވާ ބަނދަރުތަކަށެވެ.
ކަޅު ކަނޑުން ގޮވާން އެކްސްޕޯޓު ކުރަން ރަޝިޔާއިން ހުރަސް އަޅަމުން ދިޔުމާ ގުޅިގެން ޔޫކްރެއިނުން މިހާރު ގޮވާން ބޭރުކުރަނީ އެއްގަމު މަގުން ވިލާތުގެ ޤައުމުތަކަށް އެކަންޏެވެ. އަދި، ކްރޮއޭޝިޔާ މަގުން ޔޫކްރެއިނުގެ ގޮވާން އެކްސްޕޯޓު ކުރުމަށް އެ ޤައުމުން މިހާރު ދަނީ މަސައްކަތް ކުރަމުންނެވެ.