އެމްޑަބްލިއުއެސްސީ ދިވެހި ޕްރިމިއަރ ލީގުގައި ބުރު ސްޕޯޓްސް ކުލަބު ބަލިކޮށް ތާވަލުގެ ތިންވަނައިގައި ސުޕަ ޔުނައިޓެޑް ސްޕޯޓްސް (ސަސް) ހަމަޖެހިލައިފިއެވެ.
ޤައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗު ސަސްއިން ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ބުރު ސްޕޯޓްސްއަށް އެންމެ އެދެވޭ ކުޅުމެއް ނުދެއްކުނުއިރު، މެޗުގެ ވަރަށް ކުރީކޮޅު ސަސްއިން ވަނީ ލީޑު ނަގާފައެވެ. މެޗު ފަށައިގެން ހަވަނަ މިނެޓުގައި އުފެއްދި ކައުންޓަރ އެޓޭކެއްގައި މުޙައްމަދު ސަޚާއު ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ހުސާމެވެ. އޭގެ ފަހުން މެޗުގެ 16 ވަނަ މިނެޓުގައި އޭރިއާ ތެރެއިން ހުސާމަށް އިތުރު ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ބުރު ސްޕޯޓްސްގެ ގޯލްކީޕަރު ޝައިހާން އަލީ ވަނީ ދިފާއުކޮށްފައެވެ.
މި މެޗުގެ 26 ވަނަ މިނެޓުގައި ބުރު ސްޕޯޓްސްގެ މުޙައްމަދު ނާއިމް ނަގައިދިން ހުރަހަކުން އެ ޓީމުގެ ފާރޫގް އިސްމާޢލް ފޮނުވާލި ބޯޅަ ސަސްގެ ކީޕަރު އަބްދުﷲ ޒިމާމް ވަނީ ދިފާއުކޮށްފައެވެ. އަދި މެޗުގެ 34 ވަނަ މިނެޓުގައި އޭރިއާ ތެރެއިން ސަސްގެ އަލީ ނަސޫހް ރަޝީދަށް ހުސް ފުރުސަތެއް ލިބުނު ނަމަވެސް، ކީޕަރު ކައިރިން ނައްޓާލުމަށްފަހު އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.
މި މެޗުގެ ފުރަތަމަ ހާފުގެ އިތުރު ވަގުތުގައި ސަސްއަށް ވަނީ ރަނގަޅު ދެ ފުރުސަތެއް ލިބިފައެވެ. އެގޮތުން އޭރިއާ ތެރެއިން އެ ޓީމުގެ އަޙްމަދު އައިހަމް ފޮނުވާލި ހަމަލާ ގޯލުގެ އަރިމަތީ ދަނޑި ކައިރިން ބޭރަށް ދިޔައިރު، ބުރު ސްޕޯޓްސްގެ ކީޕަރު ޝައިހާން ހެދި ގޯހެއްގެ ފައިދާ ނަގައި އޭރިއާ ބޭރުން މުޙައްމަދު އަލާއު ފޮނުވާލި ހަމަލާ ދިޔައީ ހުރަސް ދަނޑި ކައިރިން ބޭރަށެވެ.
މި މެޗުގައި ސަސްއިން ލީޑު ފުޅާކޮށްފައިވަނީ ދެވަނަ ހާފުގެ ކުރީކޮޅެވެ. މި ހާފު ފަށައިގެން ފަސްވަނަ މިނެޓުގައި އައިހަމް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖަހައިދިން ހުސާމެވެ. އެކަމަކު އޭގެ ފަހުން ބުރު ސްޕޯޓްސްއިން ކުޅުން ރަނގަޅުކުރިއިރު، މެޗުގެ 56 ވަނަ މިނެޓުގައި އެ ޓީމުން ވަނީ ފަރަގު ކުޑަކޮށްފައެވެ. ބަދަލަކަށް ކުޅެން ނުކުތް އަޙްމަދު ސުލައިމާން ދިން ބޯޅައަކުން މި ލަނޑު ބުރު ސްޕޯޓްސްއަށް ކާމިޔާބުކޮށްދިނީ ކެޕްޓަން އަޙްމަދު ރަޝީދު (އަންމަޑޭ) އެވެ.
އޭގެ ފަހުން މެޗުގެ 68 ވަނަ މިނެޓުގައި ނަތީޖާ ހަމަހަމަކުރަން ބުރު ސްޕޯޓްސްގެ މުޙައްމަދު ލީވާން ނަދީމަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ، ސަސްގެ ކީޕަރު ޒިމާމް ވަނީ ދިފާއުކޮށްފައެވެ. އަދި މެޗުގެ 79 ވަނަ މިނެޓުގައި އޭރިއާ ތެރެއިން ސަސްގެ މުޙައްމަދު ސަޚާއު ފޮނުވާލި ހަމަލާ، ބުރު ސްޕޯޓްސްގެ ކީޕަރު ޝައިހާން ވަނީ ދިފާއުކޮށްފައެވެ.
މި މޮޅާއެކު ސަސްއިން ލީގުގެ ފުރަތަމަ ބުރު ނިންމާލާނީ ތިންވަނައިގައެވެ. އެ ޓީމަށް ކުޅުނު ހަތް މެޗުން 15 ޕޮއިންޓް ލިބިފައިވާއިރު، ހަތަރުވަނައިގައި ބުރު ސްޕޯޓްސް އޮތީ ހަތް މެޗުން 12 ޕޮއިންޓާއެކުއެވެ.