ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ބްރެޒިލް ކަޓުވާލައި، މުބާރާތުގެ ދެވަނަ ބުރުން ޖެމެއިކާ ޖާގައެއް ހޯދައިފިއެވެ.
އޮސްޓްރޭލިއާގެ މެލްބަން ރެކްޓޭންގިއުލަރ ސްޓޭޑިއަމުގައި މިއަދު ކުޅުނު މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.
މި މެޗުގެ ކުރިން ގްރޫޕުގެ ފުރަތަމަ މެޗުގައި ޖެމެއިކާއިން ވަނީ ފްރާންސާވެސް ލަނޑެއް ނުޖެހި އެއްވަރުކޮށްފައެވެ. އަދި ދެވަނަ މެޗުގައި 1-0 ގެ ނަތީޖާއަކުން ޕެނަމާ ބަލިކޮށްފައިވުމާއެކު، ގްރޫޕް އެފްގެ ދެވަނަ ޓީމުގެ ގޮތުގައި ޖެމެއިކާ ވަނީ ދެވަނަ ބުރަށް ދަތުރުކޮށްފައެވެ.
ޖެމެއިކާއަށް ކުޅުނު ތިން މެޗުން ފަސް ޕޮއިންޓް ލިބުނުއިރު، ބްރެޒިލަށް ތިން މެޗުން ލިބުނީ ހަތަރު ޕޮއިންޓެވެ. މި ގްރޫޕުގެ އެއްވަނަ ހޯދައި، ދެވަނަ ބުރުން ޖާގަ ހޯދީ މިއަދު ޕެނަމާ އަތުން ފަސޭހަކަމާއެކު 6-3 ގެ ނަތީޖާއަކުން މޮޅުވި ފްރާންސެވެ. އެގޮތުން އެ ޓީމަށް ވަނީ ތިން މެޗުން ހަތް ޕޮއިންޓް ލިބިފައެވެ.
މިއީ 1995 ވަނަ އަހަރަށްފަހު އަންހެނުންގެ ވޯލްޑް ކަޕުގެ ގްރޫޕް ސްޓޭޖުން ބްރެޒިިލް ކެޓި ފުރަތަމަ ފަހަރެވެ. އެކަމަކު ބްރެޒިލަށް އަންހެނުންގެ ވޯލްޑް ކަޕެއްގައި އެންމެ ދުރަށްވެސް ދެވުނީ 2007 ވަނަ އަހަރުގެ ފައިނަލަށެވެ.
މި ފަހަރުގެ ވޯލްޑް ކަޕްގެ ގްރޫޕް ސްޓޭޖުން ބްރެޒިލް ކެޓުމާއެކު، އެ ޓީމުގެ ލެޖެންޑް އުމުރުން 37 އަހަރުގެ މާތާ ވަނީ ފުޓްބޯޅަ ކެރިއަރު ނިންމާލާފައެވެ. ނަމަވެސް އެންމެ މޮޅު އަންހެން ފުޓްބޯޅަ ކުޅުންތެރިޔާގެ މަޤާމު ހަ ފަހަރެއްގެ މަތިން ހޯދާފައިވާ މާތާގެ ކެރިއަރު ނިންމާލަން މި ޖެހުނީ ހަ ވޯލްޑް ކަޕެއްގައި ކުޅެ، އެއްވެސް މުބާރާތެއް ކާމިޔާބުނުކުރެވިއެވެ.