ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި އާޖެންޓީނާ ކަޓުވާލުމަށްފަހު، ގްރޫޕުގެ އެއްވަނަ ޓީމުގެ ގޮތުގައި ސްވިޑެން ދެވަނަ ބުރުން ޖާގަ ހޯދައިފިއެވެ.
ގުރޫޕް ޖީގެ ފަހު މެޗުގައި މިއަދު ސްވިޑެންއިން އާޖެންޓީނާގެ މައްޗަށް ކުރި ހޯދީ 2-0 ގެ ނަތީޖާއަކުންނެވެ.
ނިއު ޒީލަންޑުގެ ހެމިލްޓަންގެ ވައިކަޓޯ ސްޓޭޑިއަމުގައި ކުޅުނު މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަވަނީ ސްވިޑެންއިންނެވެ. މި މެޗަށް ނުކުތްއިރުވެސް މުބާރާތުގެ ދެވަނަ ބުރުގެ ޖާގައެއް ވެފައި އޮތުމާއެކު، ސްވިޑެންއިން މެޗަށް ނުކުތީ ފުރަތަމަ އޭގާރައަށް ނުވަ ބަދަލެއް ގެނެސްގެންނެވެ.
މި މެޗުގައި ސްވިޑެންއިން ކާމިޔާބުކުރި ދެ ލަނޑުވެސް ދެވަނަ ހާފުގައި ފެނިގެންދިޔައިރު، އެ ޓީމުން މެޗުގައި ލީޑު ނެގީ 66 ވަނަ މިނޓުގައެވެ. ސޯފިޔާ ޖޮކްބޯސަން ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ރެބެކާ ބޮލޯމްވިސްޓެވެ. މި މެޗުގައި ސްވިޑެންއިން ލީޑު ފުޅާކުރީ މެޗުގެ 90 ވަނަ މިނެޓުގައި ލިބުނު ޕެނެލްޓީއަކުންނެވެ. ސްވިޑެންގެ ބޮލްމްވިސްޓަށް ކުރި ފައުލަކާ ގުޅިގެން ލިބުނު މި ޕެނެލްޓީ ކާމިޔާބުކޮށްދިނީ އެލިން ރުބެންސަންއެވެ.
މި ނަތީޖާއާއެކު އާޖެންޓީނާ މުބާރާތުން ކެޓީ އެއްވެސް މެޗަކުން މޮޅުނުވެ، އެންމެ ޕޮއިންޓަކާއެކު ގުރޫޕުގެ ފުލުގައި އޮވެގެންނެވެ. އަދި މުބާރާތުގެ ދެވަނަ ބުރަށް ސްވިޑެން ދަތުރުކުރިއިރު، އެންމެ ފަހުން ކުޅުނު ބޮޑު ހަ މުބާރާތުގެ ތެރެއިން ފަސް މުބާރާތެއްގެ ގަދަ ހަތަރަކާ ހަމައަށް އެ ޓީމު ވަނީ ދަތުރުކޮއްފައެވެ.
މި ފަހަރުގެ މުބާރާތުގެ ދެވަނަ ބުރުގައި އަންނަ އާދިއްތަ ދުވަހު ސްވިޑެން ނުކުންނާނީ މި މުބާރަތް ހަތަރު ފަހަރު ކާމިޔާބުކޮށްފައިވާ އަދި އެންމެ ފަހުގެ ޗެމްޕިއަން އެމެރިކާއާ ދެކޮޅަށެވެ.