އިންސާނީ ޙައްގުތައް ރައްކާތެރިކުރުމުގައި ރާއްޖެއިން ބޮޑު ކުރިއެރުމެއް ހޯދާފައިވާކަމަށް ހޯމް މިނިސްޓަރ ޢުމަރު ނަޞީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ހިއުމަން ރައިޓްސް ކޮމިޝަނުން ބޭއްވެވި އިންސާނީ ޙައްޤުތަކާބެހޭ ބައްދަލުވުމެއްގެ ނިމުން ފާހަގަކުރެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ދެދުވަހުގެ މި މަސައްކަތު ބައްދަލުވުން ނިންމެވުމުގެ ރަސްމިއްޔާތުގައި ވާހަކަފުޅު ދައްކަވަމުން ހޯމް މިނިސްޓަރ އުމަރު ނަސީރު ވިދާޅުވީ ބަވަނަވެފައިވާ ދުނިޔޭގައި ރާއްޖެއަށް ވަކިވެގަނެގެން އުޅެވެން ނެތް ކަމަށެވެ. އަދި ބައިނަލްއަޤުވާމީ މަސްރަޙުގައި ރީތި ނަން ދެމެހެއްޓެވުމަށްޓަކައިވެސް އިންސާނީ ޙައްގުތަކުގެ ޙާލަތު ރަނގަޅުކުރަން ޖެހޭ ކަމަށެވެ. އަދި އިންސާނީ ޙައްގުތަކުގެ ޙާލަތު 2004 ވަނަ އަހަރުން ފެށިގެން މިހާތަނަށް އައިއިރު ވަރަށް ބޮޑަށް ކުރިއެރުން ހޯދާފައިވާ ކަމަށާއި އަދިވެސް އިޞްލާޙްކުރަންޖެހޭ ކަންކަން އެބަހުރިކަމަށް މިނިސްޓަރ ވިދާޅުވިއެވެ. މީގެއިތުރުން އިންސާނީ ޙައްޤުތަކުގެ ޙާލަތު އިޞްލާޙު ކުރުމަކީ ހަމައެކަނި ދައުލަތުގެ ޒިންމާއެއް ނޫންކަންވެސް މިނިސްޓަރ ފާހަގަކުރެއްވިއެވެ.
އަނިޔާކުރުމާއި އެހެނިހެން ދަށުދަރަޖައިގެ ޢަމަލުހިންގުމާއި އަދަބު ދިނުމާ ދެކޮޅަށް ހަދާފައިވާ ބައިނަލްއަޤުވާމީމުޢާހަދާކަމުގައިވާ ކެޓްގެ މައްޗަށް ހޭލުންތެރިކަން އިތުރުކުރެއްވުމަށް ހިއުމަންރައިޓްސް ކޮމިޝަނުން "ސެންސަޓައިޒޭޝަންއަދި އޮރިއެންޓޭޝަން ޕްރޮގްރާމް ފޮރ ކެޓް، އޮޕްކެޓް އެކްޓަރސް" ގެނަމުގައި ބޭއްވެވި ބައްދަލުވުން ނިމުނީ މިއަދުއެވެ. އެޗްއާރުސީއެމުން ވިދާޅުވީ މި ހިންގެވި ޕްރޮގްރާމަކީ އޭ.ޕީ.އެފް އަދި އޭ.ޓީ.ޕީ އާ ގުޅިގެން ފަށްޓަވާފައިވާ ޓޯޗަރ ޕްރިވެންޝަން އެމްބެސެޑަރޒް ޕްރޮޖެޓްގެ ދަށުން ނޭޝަނަލް ކެޓް އަދި އޮޕްކެޓް ކޮމެޓީގެ މެމްބަރުން މި ދެ މުޢާހަދާއަށާއި މުޢާހަދާގެ ދަށުން އަދާކުރައްވަންޖެހޭ ޒިންމާތަކަށް އަހުލުވެރިކުރެއްވުމަށް ހިންގެވި ޕްރޮގްރާމެކެވެ. މި ބައްދަލުވުމުގައި މި ދެ މުޢާހަދާއާ ގުޅޭ މުހިންމު މައުޟޫތަކަކަށް މަޝްވަރާކުރައްވާފައިވެއެވެ.
ކެޓް އަކީ އަނިޔާކުރުމާއި އެހެނިހެން ދަށުދަރަޖައިގެ ޢަމަލު ހިންގުމާއި އަދަބު ދިނުމާ ދެކޮޅަށް ހަދާފައިވާ މުޢާހަދާއެކެވެ. އޮޕްކެޓަކީ ބައިނަލްއަޤްވާމީ އަދި ޤައުމީ ފެންވަރުގެ މިނިވަން މުއައްސަސާއަކުން މިނިވަންކަން ގެއްލޭގޮތަށް މީހުން ބަންދުކޮށްފައި ބައިތިއްބާ ތަންތަނަށް ޤަވާއިދުން ޒިޔާރަތްކުރާ ނިޒާމެއް މެދުވެރިކޮށް އަނިޔާވެރި އަދި ދަށުދަރަޖައިގެ އަމަލުތައް ހުއްޓުވުމަށް އަމާޒުކޮށް އެކުލަވާލާފައިވާ ފުރަތަމަ މުއާހަދާއެވެ.
ނޭޝަނަލް ކެޓް އަދި އޮޕްކެޓް ކޮމިޓީއަކީ، އެ ދެ މުއާހަދާގެ މަސައްކަތް ޤައުމީ ފެންވަރުގައި ކުރުމަށް މިދިޔަ ފެބްރުއަރީ މަހު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އެކުލަވާލައްވާފައިވާ ކޮމިޓީއެކެވެ.
މި ނިމުނު މަސައްކަތު ބައްދަލުވުމުގައި ކެޓް އަދި އޮޕްކެޓުގެ ޤައުމީ ކޮމިޓީގައި ހިމެނިވަޑައިގަންނަވާ 14 މުއައްސަސާއިން ބައިވެރިވެވަޑައިގެންނެވިއެވެ.