މި ފަހަރުގެ ވިމްބަލްޑަން ޓެނިސް މުބާރާތުގެ ފައިނަލް ވެގެންދާނީ އެންމެ އުނދަގޫ ފައިނަލަށް ކަމަށާއި، ސްޕެއިންގެ ކާލޯސް އަލްކަރާޒަކީ މިވަގުތު ދުނިޔޭގައި ހުރި އެންމެ މޮޅު އެއް ޓެނިސް ކުޅުންތެރިޔާ ކަމަށް އެންމެ ފަހުގެ ޗެމްޕިއަންކަން ހޯދާފައިވާ ސާބިއާގެ ނޯވަކް ޖޮކޮވިޗް ބުނެފިއެވެ.
މިފަހަރުގެ މުބާރާތުގައި އެއްވަނައަށް ސީޑު ކުރެވިފައިވަނީ އަލްކަރާޒެވެ. އަދި ދެވަނައަށް ސީޑް ކުރެވިފައިވަނީ ޖޮކޮވިޗެވެ.
ޖޮކޮވިޗް ބުނީ މިއަހަރުގެ މުބާރާތް ކާމިޔާބުކުރުމަށް އަލްކަރާޒްވެސް އަދި އޭނާވެސް މިހުރީ ކެތްމަދުވެފައި ކަމަށާއި، އެހެންކަމުން މި ފައިނަލް މެޗު ވެގެންދާނީ ވާދަވެރި ފެންވަރު ރަނގަޅު ޓެނިސް މެޗަކަށް ކަމަށެވެ.
ޖޮކޮވިޗް ވަނީ މިއަހަރު ކުރިއަށްދިޔަ އޮސްޓްރޭލިއަން އޯޕަން އަދި ފްރެންޗް އޯޕަން ކާމިޔާބުކޮށްފައެވެ. އެއާއެކު އޭނާ ވަނީ ސްޕެއިންގެ ރަފައެލް ނަޑާލްގެ 22 ގްރޭންޑް ސްލޭމް ރެކޯޑް މުގުރާލާފައެވެ.
ޖޯކޮވިޗް ބުނީ ވިމްބަލްޑަންގައި އޭނާގެ ތަޖުރިބާ ކިތަންމެ ބޮޑުވިޔަސް އެ ތަޖުރިބާތަކުން މި މެޗަށް ކުރާނެ މާ ބޮޑު ފައިދާއެއް ނޯންނާނެ ކަމަށެވެ. އަދި ޒުވާން ކުޅުންތެރިން ހޯދަމުންދާ ކާމިޔާބީއަކީ ފާހަގަކުރަން ޖެހޭ ކާމިޔާބީތަކެއް ކަމަށްވެސް ވަނީ ބުނެފައެވެ.