ދުނިޔޭގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ އާޖެންޓީނާގެ ތަރި ލިއޮނެލް މެސީ، ރަސްމީކޮށް އެމެރިކާގެ މޭޖާ ލީގު ސޮކާ (އެމްއެލްއެސް) ގެ އިންޓަރ މައޭމީއަށް ގުޅިއްޖެއެވެ.
ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާއަށްދޭ ބެލެންޑޯ އެވޯޑް ހަތް ފަހަރު ހޯދާފައިވާ މެސީ މިއޭމީއާ ގުޅުނީ 2025 ވަނަ އަހަރުގެ ނިޔަލަށެވެ. މައޭމީއާ ގުޅުމަށްފަހު މެސީ ބުނީ މިހުރީ ވަރަށް ހިތްހަމަޖެހިފައި ކަމަށާއި އެމެރިކާ ލީގަކީ އޭނާގެ ކެރިޔަރުގައި އެޅުނު މުހިންމު ފިޔަވަޅެއްކަމުގައި ދެކޭ ކަމަށެވެ.
މިއޭމީގެ އޯނަރު އަދި ކުރީގެ ފުޓުބޯޅަ ކުޅުންތެރިޔާ ޑޭވިޑް ބެކަމް ބުނީ މިއީ މައޭމީން ވަރަށް ކުރިއްސުރެ ދެކެމުން އައި ހުވަފެނެއް ހަގީގަތަކަށް ވުން ކަމަށެވެ. އަދި މިއީ އެއްކޮށް މަސައްކަތްކޮށް އަމާޒަށް ވާސިލުވާން އެޅުނު ބޮޑު ފިޔަވަޅެއް ކަމަށް ބެކަމް ބުންޏެވެ.
ބެކަމް ބުނީ މީގެ 10 އަހަރު ކުރިން މައޭމީ އުފެއްދުމުގައި އުޅުނުއިރު، އެ ޓީމަށް ދުނިޔޭގެ އެންމެ މޮޅު ކުޅުންތެރިން އަންނާނެ ކަމަށް ބުނެފައިވާނެ ކަމަށާއި، އެގޮތުން މިއަދު އެ ކުޅުންތެރިޔާ މިއޭމީއާ ގުޅުން އެއީ އޭނާއަށް ލިބުނު ބޮޑު އުފަލެއް ކަމަށް ބެކަމް ބުންޏެވެ.
އިންޓަ މިއޭމީއާއެކު މެސީ ފެންނާނެ ފުރަތަމަ މެޗަކީ މި މަހުގެ 21 ވަނަ ދުވަހު ލިގާ އެމްއެކްސްއާ ދެކޮޅަށް ލީގްސް ކަޕުގައި ކުޅޭ މެޗެވެ.
މި ޓްރާންސްފާ ބާޒާރުގައި މެސީ ހޯދަން އިންޓަ މިއޭމީގެ އިތުރުން އޭނާގެ ކުރީގެ ކުލަބް ބާސެލޯނާއިންވެސް ވަނީ މަސައްކަތްކޮށްފައެވެ.