ސްކޮޓްލަންޑާއި ނޯދަން އައިލަންޑްގެ އަންހެން ޓީމްގެ މެދުގައި ކުޅުނު ރަހްމަތްތެރިކަމުގެ މެޗް ސްކޮޓްލަންޑް ކާމިޔާބުކޮށްފިއެވެ.
މިމެޗް ސްކޮޓްލަންޑް ކާމިޔާބުކޮށްފައިވަނީ ތިން ލަނޑު ސުންލަނޑުންނެވެ.
ވާދަވެރި ކުޅުމެއް ދެޓީމްގެ ފަރާތުން ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްކޮޓްލަންޑުންނެވެ. މިމެޗްގައި ސްކޮޓްލަންޑްގެ ފުރަތަމަ ލަނޑު މެޗްގެ 32 ވަނަ މިނެޓްގައި ޖަހާދިނީ އެރިން ކަރތުބަރޓްއެވެ. އަދި އޭގެ ފަސް މިނެޓްފަހުން ސޭމް ކާރވަނީ ލަނޑެއް ޖަހާ ސްކޮޓްލަންޑްގެ ލީޑު ފުޅާކޮށްދީފައެވެ. އަދި މެޗްގެ 39 ވަނަ މިނެޓްގައި މާރތާ ތޯމަސްވަނީ ސްކޮޓްލަންޑްގެ ތިންވަނަ ލަނޑުވެސް ކާމިޔާބުކޮށްދީފައެވެ. ފުރަތަމަ ހާފްގެ ހަތް މިނެތްގެ ތެރޭގައި ބައިކޮޅަށް ވަން ތިން ލަނޑާއެކު އަޔަލަންޑަށް އެކަމުން އަރައި ގަނެވޭގޮތް މިމެޗްގައި ނުވި ނަމަވެސް ލަނޑެއް ޖެހޭތޯ ވަރަށް މަސައްކަތް ކުރިއެވެ.
މެޗަށްފަހު ވާހަކަ ދައްކަމުން ސްކޮޓްލަންޑްގެ ކޯޗް ޕެދްރޯ މާޓިނޭޒް ލޯސާ ހާމަކުރިގޮތުގައި މިމެޗްގެ ނަތީޖާ އާމެދު ވަރަށް ހިތްހަމަ ޖެހޭ ކަމަށާއި އަދި އެއްވެސް ކުޅުންތެރިޔަކަށް އަނިޔާއެއް ނުވާކަމުގައި އޭނާ ފާހަގަ ކުރިއެވެ. މިމެޗްގެ ފުރަތަމަ ހާފްގައި ރަނގަޅަށް ކުޅެވުނު ކަމަށާއި ނަމަވެސް ދެވަނަ ހާފް ދެޓީމަށްވެސް އުނދަގޫތަކާއި ކުރިމަތިވެގެން ދިޔަ ކަމަށް އޭނާ ހާމަކުރިއެވެ.