އަޔެކްސްއަށް ކުޅެމުންދިޔަ ނެދަލަންޑްސްގެ ޑިފެންޑަރ ޔޫރިއަން ޓިމްބަރ އިނގިރޭސި ޕްރިމިއާ ލީގުގެ އާސެނަލްއަށް ސޮއިކޮށްފިއެވެ.
މައުލޫމާތުލިބޭގޮތުގައި އާސެނަލްއަށް އޭނާ ސޮއިކޮށްފައިވަނީ 34 މިލިއަން ޕައުންޑްގެ އަގަކަށެވެ.
އުމުރުން 22 އަހަރުގެ މި ކުޅުންތެރިޔާގެ އަގު 38.5 މިލިއަންއަށް އެހެނިހެން ބައިތަކާއެކު އެރުމަކީ ގާތްކަމެއްކަމަށް ހަބަރު ލިބެއެވެ. ޓިމްބަރ އާއެކު އާސެނަލްގެ ޑިފެންސް ވަރުގަދަ ކުރުމަށް ކުރާ މަސައްކަތަށް އިތުރު ކުރިއެރުމެއް ލިބިގެންދާނެކަމަށް ގަބޫލް ކުރެއެވެ. އާސެނަލްގެ ކޯޗް މިކެލް އާޓޭޓާ ހާމަކުރިގޮތުގައި ޔޫރިއަން އޭނާގެ ޓީމާއި ގުޅުމުން ވަރަށް ހިތްހަމަ ޖެހިފައިހުރި ކަމަށެވެ. އޭނާ ގަބޫލް ކުރާ ގޮތުގައި ޔޫރިއަންއަކީ ފާހަގަ ކޮށްލެވޭ ޒުވާން ޑިފެންޑަރެކެވެ. ޓިމްބަރ ހާމަކުރުގޮތުގައި އޭނާއަކީ އަބަދުވެސް އާސެނަލްއަށް ތާއިޑު ކުރާ މީހެއް ކަމަށެވެ. އަދި މިކަން ފެށިގެން ދިޔައީ އޭނާގެ ބޭބެގެ ފަރާތުން ކަމަށެވެ. ޓިމްބަރ ހާމަކުރިގޮތުގައި އޭނާގެ ބޭބެއަކީ އާސެނަލްއަށް ވަރަށް ގަދައަށް ސަޕޯޓްކުރާ ފަރާތެކެވެ. މިގޮތުން ކުޑައިރުން ފެނިގެން އާސެނަލް ކުޅޭތަން ބަލަމުންދާކަމަށެވެ.
ޓިމްބަރ މިދިޔަ ސީޒަންގައިވަނީ އަޔެކްސްއަށް 47 ފަހަރު ކުޅެފައެވެ. މީގެތެރޭގައި ޗެމްޕިއަންސް ލީގުގައި އަޔެކްސް ކުޅުނު ހަމެޗް ހިމެނެއެވެ. މީގެއިތުރުން އޭނާވަނީ 2021 އަދި 2022 ވަނަ އަހަރު އެރެޑިވިސީ ތަށި އަޔެކްސްއަށް ހޯދާދިނުމުގައިވެސް މުހިންމު ދައުރެއް އަދާކޮށްފައެވެ. އަދި އޭނާވަނީ ނެދަލަންޑްސް ޤައުމީ ޓީމަށް 15 މެޗް ކުޅެދީފައެވެ. މީގެތެރޭގައި މިދިޔަ އަހަރުގެ ފަހު ކޮޅު ބޭއްވި ފީފާ ވާރލްޑް ކަޕްގައި އޭނާ ކުޅުނު ހަތަރު މެޗްވެސް ހިމެނެއެވެ.