ވިމްބަލްޑަން ޓެނިސް މުބާރާތުގެ ސެމީ ފައިނަލުން މިމުބާރާތުގައި ފިރިހެން ސިންގަލްސްގެ އެއްވަނައަށް ސީޑް ކުރެވިފައިވާ ސްޕެއިންގެ ކާލޯސް އަލްކަރާޒް ޖާގަހޯދައިފިއެވެ.
މިމުބާރާތުގެ ސެމީފައިނަލުން އަލްކަރާޒް ޖާގަހޯދީ ކްއާޓަރ ފައިނަލްގައި ހަވަނައަށް ސީޑް ކުރެވިފައިވާ ޑެންމާކްގެ ހޮލްގަރ ރޫން އާއި ބައްދަލުކުރިމެޗް ކާމިޔާބުކޮށްގެންނެވެ.
މިމެޗް އަލްކަރާޒް ކާމިޔާބުކޮށްފައިވަނީ ސީދާ ތިން ސެޓުންނެވެ. މިމެޗްގެ ފުރަތަަމަ ސެޓް ޓައިބްރޭކަކަށް ގޮސް ހަތެއް ތިނަކުން އަލްކަރާޒް ކާމިޔާބުކުރިއިރު ޖެހިގެން އައި ދެސެޓް އޭނާ ކާމިޔާބުކުރީ ހީކުރިވަރަށް ވުރެ ފަސޭހަ ކަމާއެކު ހައެއް ހަތަރެއް އަދި ހައެއް ހަތަރަކުންނެވެ.
މެޗަށްފަހު ވާހަކަ ދައްކަމުން އަލްކަރާޒް ހާމަކުރިގޮތުގައި ވިމްބަލްޑަން މުބާރާތުގެ ސެމީފައިނަލްގައި ކުޅުމުގެ ފުރުސަތު ލިބުމަކީވެސް އޭނާއަށް ހުވަފެނެއް ކަހަލަ ކަމެއް ކަމަށެވެ. އަދި އޭނާއަށް ގަބޫލް ކުރެވޭގޮތުގައި މިފަހަރުގެ މުބާރާތުގައި އޭނާއަށް ރަނގަޅު ކުޅުމެއް ދެއްކެމުންދާކަމަށާއި ވިނަ ކޯޓެއްގައި މިކަހަލަ ކުޅުމެއް ދެއްކުންމިއީ އަލްކަރާޒްއަށްވެސް ގަބޫލް ނުކުރެވޭކަމެއް ކަމަށެވެ. މިއީ އަލްކަރާޒް ވިނަ ކޯޓެއްގައި ކުޅޭ ހަތަރު ވަނަ މުބާރާތެވެ.
މިމުބާރާތުގެ ސެމީފައިނަލްގައި އަލްކަރާޒް ބައްދަލުކުރާނީ މުބާރާތުގައި ތިންވަނައަށް ސީޑް ކުރެވިފައިވާ ރަޝިއާގެ ޑަނީލް މެޑްވެޑޭވްއާއެވެ. މެޑްވެޑޭވް ސެމީފައިނަލުން ޖާގަހޯދީ ކްއާޓަރ ފައިނަލްގައި ސީޑް ނުކުރެވޭ ކުޅުންތެރިއެއް ކަމަށްވާ ކްރިސް އިއުބޭންކްސް އާއި ބައްދަލުކޮށް ތިން ސެޓް ދެސެޓުން މެޗް ކާމިޔާބުކޮށްގެންނެވެ. މިމެޗްގެ ސެޓްތައް ދިޔައީ ހައެއް ހަތަރެއް، އެކެއް ހައެއް، ހައެއް ހަތަރެއް، ހަތެއް ހައެއް އަދި ހައެއް އެކަކުންނެވެ.
އަލްކަރާޒް އާއި މެޑްވެޑޭވް އިން ކުރެ އެއްވެސް ކުޅުންތެރިޔަކަށް މިހާތަނަށް ވިމްބަލްޑަން މުބާރާތުގެ ފައިނަލުން ޖާގަހޯދިފައެއް ނުވެއެވެ. އެހެން ކަމުން މިފަހަރުގެ ފައިނަލްގައި މުޅިން އާ އެއް ކުޅުންތެރިއެއް ފެނިގެންދާނެކަން މިހާރުމިވަނީ ޔަގީންވެފައެވެ. މިމުބާރާތުގެ ފުރަތަމަ ސެމީފައިނަލްގައި ބައްދަލުކުރާނީ ދެވަނައަށް ސީޑް ކުރެވިފައިވާ ސަރބިއާގެ ނޯވަކް ޖޯކޮވިޗް އާއި ހަވަނައަށް ސީޑް ކުރެވިފައިވާ އިޓަލީވިލާތުގެ ޔަނިކް ސިނަރ އާއެވެ.