ބްރެޒިލްގެ އެތުލެޓިކް ޕަރަނައެންސޭއަށް ކުޅެމުންދާ ޒުވާން ފޯވަޑް ވިކްޓަރ ރޮކޭ ސްޕެނިޝް ލީގުގެ ޗެމްޕިއަން ބާސެލޯނާއަށް ސޮއިކުރަން ނިންމައިފިއެވެ.
މައުލޫމާތުލިބޭގޮތުގައި އުމުރުން 18 އަހަރުގެ ރޮކޭ ބާރސާ އާއި ގުޅުމަށް ހަމަޖެހިފައިވަނީ މިއަންނަ އަހަރުން ފެށިގެންނެވެ.
މިއެއްބަސްވުމުގެ ދަށުން ރޮކޭ ބާރސާއަށް ސޮއިކުރާނީ 7 އަހަރު ދުވަހުގެ އެއްބަސްވުމެއްގެ ދަށުންނެވެ. އަދި އޭނާގެ އެއްބަސްވުމުގައި ބައި އައުޓް މާއްދާގައި ހަމަޖައްސާފައިވާ އަގަކީ 500 މިލިއަން ޔޫރޯއެެވެ.
ރޮކޭއަނީ ޕަރަނައެންސޭއަށް ކުޅެދީފައިވާ 66 މެޗްގައި 22 ލަނޑު ޖަހާދީފައެވެ. އަދި މިއަހަރުގެ މާރޗް މަހުގެ ތެރޭގައި ބްރެޒިލްގެ ޤައުމީ ޓީމަށް ކުޅުނު އެންމެ ޒުވާން ކުޅުންތެރިޔާއަށްވެސް އޭނާ ވަނީ ވެގެން ގޮސްފައެވެ. ޓްވިޓަރގައި ރޮކޭ ހާމަކުރިގޮތުގައި ބާރސާއަށް ސޮއިކުރުމުގެ ފުރުސަތު ލިބުމުން އޭނާ ހުރީ ވަރަށް އުފާވެފައިކަމަށެވެ.
މިއީ ހުވަފެނެއް ހަގީގަތަކަށް ވުން ކަމުގައިވެސް އޭނާ ފާހަގަ ކުރިއެވެ. ރިޕޯޓްތައް ބުނާގޮތުން ބާރސާއިން އެންމެ ފުރަތަމަ އަގެއްގެގޮތުގައި ޕަރަނައެންސޭއަށް ދިނުމަށް ހަމަޖެހިފައިވަނީ 30 މިލިއަން ޔޫރޯއެވެ. އަދި އެހެނިހެން އިތުރު ކަންތައްތަކާއެކު އިތުރު 31 މިލިއަން ޔޫރޯ ދިނުމަށްވެސް އެއްބަސްވެވިފައިވެއެވެ. ރޮކޭވަނީ މިއަހަރުގެ ކުރީކޮޅު ބޭއްވި ދެކުނު އެމެރިކާގެ އަންޑަރ ޓުވެންޓީ ޗެމްޕިއަންޝިޕްގައި ހަލަނޑު ޖަހާދީ އެންމެ ގިނަ ލަނޑު ޖެހި ކުޅުްތެރިޔާއަށް އެމުބާރާތުގައި ވެގެން ގޮސްފައެވެ.