ޔޫކްރެއިންގެ މިނިވަންކަމާއި ސިޔާދަތު ހިމާޔަތްކުރަން ކުރަމުންދާ ހަނގުރާމައަށް އަސްކަރީ އެހީތެރިކަން ފޯރުކޮށްދިނުމުގެ ގޮތުން އެ ޤައުމަށް ދުރު ރާސްތާ ކްރޫޒް މިސައިލް ފޯރުކޮށްދޭން ނިންމާފައިވާ ކަން ފަރަންސޭސިވިލާތުގެ ރައީސް އިމަނުއެލް މެކްޚޮން އިޢުލާނު ކުރައްވައިފިއެވެ. އޭނާ މި ކަން ހާމަކުރައްވާފައި ވަނީ ލިތުއޭނިޔާގެ ވިލްނިޔަސްގައި މިހާރު ކުރިއަށްދާ ނޭޓޯގެ މެންބަރު ޤައުމުތަކުގެ އިސްވެރިންގެ ސަމިޓުގެ ހަވާސާގައި ވާހަކަފުޅު ދައްކަވަމުންނެވެ.
ފަރަންސޭސިވިލާތުން ޔޫކްރެއިނަށް ފޯރުކޮށްދޭން ނިންމާފައި ވަނީ "ސްކެލްޕް" މަރުކާގެ ދުރު ރާސްތާ ކްރޫޒް މިސައިލެވެ. އެއީ، އިނގިރޭސިވިލާތުން ޔޫކްރެއިނަށް މިހާރު ވެސް "ސްޓޯމް ޝެޑޯ"ގެ ނަމުގައި ފޯރުކޮށްދެމުންދާ މަރުކާގެ މިސައިލާ އެއްގޮތް ހަތިޔާރެކެވެ. މި ހަތިޔާރުތަކާ އެކު، ޔޫކްރެއިންގެ ބައެއް ސަރަޙައްދުތަކަށް އަތްގަދަކޮށްފައިވާ ރަޝިޔާގެ އިސްތިޢުމާރީ ސިފައިންނާ ދެކޮޅަށް ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭންގައި ޔޫކްރެއިނަށް ކުރިއެރުންތަކެއް ހޯދޭނެ ކަމަށް މަސްރަޙު ދިރާސާކުރާ ފަރާރަތްތަކުން ގަބޫލުކުރެއެވެ.
ސްކެލްޕް މަރުކާގެ މިސައިލްތައް ޔޫކްރެއިނަށް ފޯރުކޮށްދިނުމާ ގުޅޭ ގޮތުން މެކްޚޮން ވިދާޅުވީ، އެ ހަތިޔާރު ބޭނުންކޮށްގެން ހަނގުރާމައިގެ ކުރީ ސަފާ ދުރުގައިވާ ރަޝިޔާގެ އަސްކަރިއްޔާގެ އަމާޒުތަކަށް ހަމަލަދޭން ޔޫކްރެއިންގެ ފައުޖުތަކަށް ފަސޭހަވެގެންދާނެ ކަމުގައެވެ. އަދި، ކައުންޓަރއޮފެންސިވް ކާމިޔާބު ކުރަން އިތުރު އެހީތެރިކަމެއް ލިބިގެންދާނެ ކަމަށް ގަބޫލުފުޅު ކުރައްވާ ކަމުގައެވެ.
ސްކެލްޕް މަރުކާގެ ދުރު ރާސްތާ ކްރޫޒް މިސައިލަކީ 250 ކިލޯމީޓަރު ދުރުގައިވާ އަމާޒުތަކަށް ހަމަލަދޭން ބޭނުން ކުރެވޭނެ ހަތިޔާރެކެވެ. މިއީ، ޔޫކްރެއިނަށް މިހާތަނަށް ފޯރުކޮށްދީފައިވާ އެންމެ ދުރު ރާސްތާގެ މިސައިލެވެ. ސްޓޯމް ޝެޑޯ މަރުކާގެ މިސައިލްތައް ޔޫކްރެއިނަށް ފޯރުކޮށްދޭނެ ކަން އިނގިރޭސިވިލާތުން އިޢުލާނުކޮށްފައި ވަނީ މޭ މަހުގެ ތެރޭގައެވެ. އެ ކަމާ ގުޅިގެން ރަޝިޔާއިން ވަނީ ނުރުހުން ފާޅުކޮށް، އިނގިރޭސިވިލާތުން މި ހަނގުރާމައިގައި އަމަލީ ގޮތުން ބައިވެރިވަމުންދާ ކަމަށް ދެކޭނެ ކަމުގައި ބުނެފައެވެ.
ޔޫކްރެއިނުން ދުރު ރާސްތާ ކްރޫޒް މިސައިލްތައް ބޭނުންކޮށްގެން ސަރަޙައްދީ ރޮނގު ހުރަސްކޮށް ރަޝިޔާގެ ރަށްތަކަށް ހަމަލަދޭނެ ކަމުގައި ރަޝިޔާއިން ދަނީ ތުހުމަތު ކުރަމުންނެވެ. ނަމަވެސް، މެކްޚޮން ވިދާޅުވީ، ފަރަންސޭސިވިލާތުން ފޯރުކޮށްދޭ މިސައިލްތައް ބޭނުންކޮށްގެން ރަޝިޔާގެ އެއްވެސް ރަށަކަށް ހަމަލަނުދޭނެ ކަމުގެ ފުރިހަމަ ޔަގީންކަން ޔޫކްރެއިނުން ދީފައިވާ ކަމުގައެވެ. އަދި، އެ ހަތިޔާރު ބޭނުން ކުރާނީ ޔޫކްރެއިންގެ މިނިވަންކަމާއި ސިޔާދަތު ހިމާޔަތްކުރަން ކުރަމުންދާ ހަނގުރާމައިގައި ކަމަށް ވެސް މެކްޚޮން ވިދާޅުވިއެވެ.
ފަރަންސޭސިވިލާތުން ޔޫކްރެއިނަށް ފޮނުވަން ނިންމާފައި ވަނީ ސްކެލްޕް މަރުކާގެ ކިތައް މިސައިލް ކަން މެކްޚޮން ސާފުކޮށްދެއްވާފައެއް ނުވެއެވެ. ނަމަވެސް، އެ ޤައުމުގެ އަސްކަރިއްޔާގައި އެ މަރުކާގެ 400 އަށްވުރެ ގިނަ މިސައިލް ހުންނާނެ ކަމަށް ބެލެވޭ ކަމުގައި ދިފާޢީ ދާއިރާގެ މާހިރުން ބުނެއެވެ.