އޭޝިއާގެ އެތުލެޓިކްސްއަށް ކޮށްދެއްވި ޚިދުމަތުގެ އަގުވަޒަންކޮށް، ރާއްޖޭގެ އެތުލެޓިކްސް އެސޯސިއޭޝަނުގެ ޖެނެރަލް ސެކްރެޓަރީ އަޙްމަދު މުންތަގިމް (މުންތޭ) އަށް އޭޝިއާ އެތުލެޓިކްސްގެ ރައީސް ޤަތަރުގެ ދަހްލާން އަލް ހަމަދު ދެއްވާ ލީޑަޝިޕް ޕިން ދެއްވައިފިއެވެ.
މި ޕިން މުންތަގިމްއަށް ހަވާލުކޮށްފައިވަނީ އޭޝިއާ އެތުލެޓިކްސްގެ 25 ވަނަ އަހަރީ އާންމު ބައްދަލުވުމުގެ ތެރެއިންނެވެ. މީގެއިތުރުން ރާއްޖޭގެ އެތުލެޓިކްސް އެސޯސިއޭޝަންގެ ނައިބު ރައީސް އަހުމަދު އަޒީލް އަށް ވަނީ ޑަބްލިއު އޭ ރެފްރީ ބްރޯންޒް ލެވަލް ހާސިލުކުރި ކަމުގެ ލިޔުން ހަވާލުކޮށްފައެވެ.
ހަތަރުވަނަ ދައުރަކަށް އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރީއެއްގެ ޒިންމާ އަދާކުރަމުން އަންނަ މުންތަގިމް ވަނީ 2021 ވަނަ އަހަރު ބޭއްވި އޮލިމްޕިކްސްގައި ރާއްޖޭގެ ޝެފް ޑި މިޝަނަރަކަށް މަސައްކަތް ކޮށްފައެވެ. އަދި މިދިޔަ އަހަރު ވިއެޓްނާމްގައި ބޭއްވި 31 ވަނަ ސީގޭމްސްގައި ޓެކްނިކަލް އޮފިޝަލުންގެ ތެރޭގައި މަސައްކަތްކޮށްފައެވެ.
މީގެއިތުރުން މުންތަގިމް ވަނީ 2019 ވަނަ އަހަރު ސައުތު އޭޝިއަން ގޭމްސްގެ އެތުލެޓިކްސް އިވެންޓްތަކުގެ އިންޓަނޭޝަނަލް ޓެކްނިކަލް އޮފިޝަލް (އައިޓީއޯ) އަކަށް މަސައްކަތްކޮށްފައެވެ. އެންމެ ފަހުން މިދިޔަ މަހު އޭނާ ވަނީ ކޮރެއާގައި ބޭއްވި އޭޝިއާގެ 20 އަހަރުންދަށުގެ އެތުލެޓިކްސް މުބާރާތުގައި ވެސް ޓެކްނިކަލް އޮފިޝަލުކަން ކޮށްފައެވެ.