ހޮޅުދޫގައި މަގު ހެދުމުގެ މަސައްކަތްކުރަމުންދަނިކޮށް ފާރެއް ވެއްޓި ތިން މީހަކަށް އަނިޔާވެއްޖެ

ނ.ހޮޅުދޫގައި މަގުހެދުމުގެ މަސައްކަތްކުރަމުންދިޔަ ތިން މީހެއްގެ ގަޔަށް ފާރެއް ވެއްޓި، އެމީހުންނަށް ފަރުވާދޭން ފަށައިފިއެވެ.

ހޮޅުދޫ ކައުންސިލްގެ ރައީސް ރިޟްވާން މުޙައްމަދު ވިދާޅުވީ އެރަށު މަގުހެދުމުގެ މަސައްކަތްކުރަމުންދަނިކޮށް އާރުޑީސީގެ ތިން މުވައްޒަފުންގެ ގަޔަށް ފާރެއް ވެއްޓުނީ، މަގުގެ ފާރާ ކައިރިން ވަޅު ކޮންނަމުންދަނިކޮށްކަމަށެވެ. އޭގެތެރެއިން އެކެއްގެ ބޯ ފަޅައިގެން ގޮސްފައިވާއިރު، އެކެއްގެ ކޮނޑަށް އަދި އަނެއް މީހާގެ އުނގަނޑަށް އަނިޔާވެފައިވާކަމަށް ކައުންސިލްގެ ރައީސް ވިދާޅުވިއެވެ.

އަދި އެމީހުން އިތުރު ފަރުވާއަށް އުނގޫފާރު ރީޖަނަލް ހޮސްޕިޓަލަށް ގެންދިއުމުގެ މަސައްކަތްކުރައްވަމުން އަންނަކަމަށް ރިޟްވާން ވިދާޅުވިއެވެ.

"ފާރާ ވަރަށް ކައިރިން ކޮންނަމުންދަނިކޮށް ފާރު ވެއްޓުނީ. އެ ފާރު ވެއްޓުނީ، ފާރުގެ އެއްފަރާތަށް ވެލި ޖައްސާފައިހުރުމުން ފާރު އަރިއަޅާލައިގެންކަމަށް ބޮޑަށް ބެލެވެނީ. އެއީ މިރަށު ތިން މީހުން. އެމީހުން މިހާރު ފުރުވާލެވޭތޯ މި މަސައްކަތްކުރަނީ." ހޮޅުދޫ ކައުންސިލްގެ ރައީސް ވިދާޅުވިއެވެ.

މި ހާދިސާ ހިނގާފައިވަނީ ހަވީރު 1745 ހާއިރުކަމަށް ލަފާކުރެވޭކަމަށްވެސް ކައުންސިލްގެ ރައީސް ރިޟްވާން މުޙައްމަދު ވިދާޅުވިއެވެ. އެމީހުންނަށް ލިބިފައިވާ އަނިޔާގެ އިތުރު ތަފްސީލް އެނގޭނީ އުނގޫފާރު ހޮސްޕިޓަލަށް ގެންގޮސް ބައެއް ޓެސްޓުތައް ހެދުމުންކަމަށްވެސް ކައުންސިލްގެ ރައީސް ވިދާޅުވިއެވެ.