ބޯހިމެނުމުގެ ތަފާސްހިސާބަކީ ކުރިމަގަށް ކަންކަން ރޭވުމުށް އެންމެ މުހިންމު މަޢުލޫމާތު: ނައިބު ރައީސް

އާބާދީއާގުޅޭ މަޢުލޫމާތު އެއްކުރުމަކީ ހަމައެކަނި މަޢުލޫމާތެއް އެއްކުރަން ކުރާ މަސައްކަތެއް ނޫންކަމަށާއި، މިއީ ކަންކަން އޮތް ހާލަތާއި ކުރިމަގަށް ކަން ކުރަންވީ ގޮތް ދެނގަތުމަށް މަގުދައްކައިދޭ އެންމެ މުހިންމު މަސައްކަތްތަކަށް ރައިސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.

ނައިބު ރައީސް މިހެން ވިދާޅުވީ ދުނިޔޭގެ އާބާދީ ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅުދައްކަވަމުންނެވެ.

މި ޖަލްސާގައި ނައިބު ރައީސް ފައިސަލް ނަސީމް ވަނީ "ބޯހިމެނުން 2022"ގެ ނަތީޖާ އިފްތިތާޙުކޮށްދެއްވާފައެވެ.

މި ރަސްމިއްޔާތުގައި ވާހަކަދައްކަވަމުން ނައިބު ރައީސް ފައިސަލް ނަސީމު ވިދާޅުވީ ބޯހިމެނުމުގެ މަޢުލޫމާތަކީ، މުޖުތަމަޢުގެ ތަފާތު ދާއިރާތަކުގެ ކަންކަން ހުރިގޮތް ވަރަށް ބޮޑަށް ސާފުވެގެންދާ ކަމެއްކަމަށެވެ. މިގޮތުން މިއީ މާލެއާއި އަތޮޅުތަކުގެ ރައްޔިތުންގެ ދިރިއުޅުމަށް އަންނަމުންދާ ބަދަލު ފެންނަ މަޢުލޫމާތެއް ކަމަށްވެސް ނައިބު ރައީސް ވިދާޅުވިއެވެ.

ނައިބު ރައީސް ވިދާޅުވީ، އެއްވެސް ބަޔަކު ބާކީނުކޮށް މުޖުތަމަޢުގެ ހަމަހަމަކަން ޤާއިމުކުރުމަށް ސަރުކާރުން ކުރައްވަން ފެއްޓެވި އެންމެ މުހިންމު މަސައްކަތަކީ އަންހެނުން ބާރުވެރިކުރުންކަމަށާއި އަންހެނުން ފުރުޞަތުތައް ފަހިކޮށް ނުދީ، މުޖުތަމަޢުގެ ހަމަޖެހުން ޤާއިމުނުކުރެވޭނެކަމަށެވެ.

އަންހެނުންނަށް ފަހިކޮށްދޭ ކޮންމެ ފުރުޞަތަކީ، އޭގެއިން ރަނގަޅު ނަތީޖާއެއް ނެރެ، އޭގެ ފައިދާ މުޅި މުޖުތަމަޢުއަށް ކުރާނެކަމެއްކަމުގައިވެސް އެމަނިކުފާނު ވިދާޅުވިއެވެ. ނަމަވެސް ގޮތް ނިންމުމާއި ސިޔާސީ ދާއިރާގައި އަދިވެސް އަންހެނުން މަދުވުމުގެ ކަންބޮޑުވުން ނައިބު ރައީސް ފާހަގަކުރެއްވިއެވެ. ޚާއްސަކޮށް ޤާނޫނު ހަދާ މަޖިލީހުގައި އަންހެނުންގެ ބައިވެރިވުން އިތުރުކުރުމަށް، އަންހެނުން ކުރީ ސަފަށް ނިކުތުމަށް ގޮވާލެއްވިއެވެ.

"ހަމަހަމަ ފުރުޞަތު ފަހިކޮށް ނުދީ، މުޖުތަމަޢުގެ ހަމަޖެހުން ނޯންނާނެ. މަޖިލީހުގައި ރައްޔިތުން ތަމްސީލްކުރާ އަންހެނުން އަންނަނީ މަދުވަމުން. މިއީ އިތުރަށް ވިސްނާލަން ޖެހޭ ކަމެއް. ގައުމުގެ އިޤްތިޞާދާއި ސިޔާސީ މަސައްކަތަށް ކުރިއަށް ނިކުތުމަށް އަންހެނުންނަށް ގޮވާލަން." ނައިބު ރައީސް ވިދާޅުވިއެވެ.

މި ރަސްމިއްޔާތުގައި ނައިބު ރައީސް ފައިސަލް ނަސީމް ޔޫއެންއެފްޕީއޭގެ، "ސްޓޭޓް އޮފް ވޯލްޑް ޕޮޕިއުލޭޝަން ރިޕޯޓް"ވެސް އިފްތިތާޙުކޮށްދެއްވިއެވެ.

ބޯހިމެނުމުގެ ތަފާސް ހިސާބަށް ބަލާއިރު، ރާއްޖޭގެ އާބާދީ 51500އިން މައްޗަށް ވަނީ އަރާފައެވެ. މީގެތެރެއިން ދިވެހިންގެ އާބާދީއަކީ 382000މީހުންނެވެ. އަދި 132000މީހުންނަކީ ބިދޭސީންނެވެ.