އޭޝިއަން އިންޑޯ އަދި މާޝަލް އާޓްސް ގޭމްސް ބޭއްވުމަށް ބޭނުންވާ ފައިސާ ހަމަޖެހުމުގައި ލަސްތަކެއް ހުރުމާއެކު މި އަހަރުގެ ފަހުކޮޅު ބާއްވަން ތާވަލުކޮށްފައިވާ ގޭމްސް އަންނަ އަހަރަށް ފަސްކޮށްފިއެވެ.
ތައިލޭންޑުގައި ބާއްވާ ހަ ވަނަ އޭޝިއަން އިންޑޯ އެންޑް މާޝަލް އާޓްސް ގޭމްސް އަންނަ އަހަރަށް ފަސްކުރަން ނިންމާފައިވަނީ މިދިޔަ ހަފްތާގައި ކުރިއަށްދިޔަ އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ އަހަރީ އާންމު ޖަލްސާގައެވެ.
މި ގޭމްސް އެންމެ ފުރަތަމަ ބާއްވަން މަސައްކަތްކުރީ މިއަހަރުގެ ޑިސެމްބަރު މަހުގެ 17-26 އަށެވެ. ތާރީހަށް ގެނައި ބަދަލުތަކާއެކު މި ގޭމްސް މިހާރު ބާއްވަން ތާވަލުކޮށްފައިވަނީ ފެބްރުއަރީ 24 އިން މާޗް ހަޔަކަށެވެ.
ރާއްޖެއިން ވަނީ އެންމެ ފަހުން ބޭއްވި އޭޝިއަން އިންޑޯ ގޭމްސްގައި ވާދަކޮށްފައެވެ. އެއީ 2017 ވަނަ އަހަރު ތުރުކުމެނިސްތާނުގައި ބޭއްވި މުބާރާތެވެ. އެފަހަރު ރާއްޖެއިން ފަސް ކުޅިވަރަކުން 37 އެތްލީޓުން ވާދަކޮށްފައިވެއެވެ. ރާއްޖެއިން ވާދަކުރި ފަސް ކުޅިވަރަކީ ފުޓްސަލް، ބިލިއާޑް، ސްވިމިން، ޗެސް އަދި އިންޑޯ އެތުލެޓިކްސް އެވެ.
މުބާރާތުގެ ފުޓްސަލްގައި ރާއްޖެއިން ވަނީ ހަތަރު މެޗެއް ކުޅެފައެވެ. އެގޮތުން ފުރަތަމަ މެޗުގައި އޫއޭއީ އަތުން 3-1 އިން ބަލިވިއިރު، އަފްގާނިސްތާން އަތުން ބަލިވީ 6-1 އިންނެވެ. އުޒްބަކިސްތާން އަތުން 9-1 އިން ބަލިވިއިރު، ޗައިނާ އަތުން ބަލިވީ 9-3 އިންނެވެ.
މީގެއިތުރުން ބައިނަލްއަޤްވާމީ ބޮޑު މުބާރާތަކުން ރާއްޖެއަށް ބިލިއާޑުން މޮޅެއް ލިބުނީވެސް އެންމެ ފަހުން ބޭއްވި ފަހަރުއެވެ. ރާއްޖޭގެ ފަޔާޒް ވަނީ ކިރްގިސްތާންގެ ކުޅުންތެރިއެއް ބަލިކޮށްފައެވެ.