ރާއްޖޭގެ ޤައުމީ ކްރިކެޓް ޓީމުގެ ހެޑް ކޯޗަކަށް ސްރީ ލަންކާގެ ތަޖުރިބާކާރު ކޯޗެއް ކަމަށްވާ ޕަސިންދު ލިޔަނާރަޗިޗީ ހަމަޖައްސައިފިއެވެ.
ޕަސިންދު އެންމެ ފަހުން މަސައްކަތްކުރީ ލަންކަން ކްރިކެޓް ކުލަބުގެ ހެޑް ކޯޗުކަމުގައެވެ. ވޭތުވެދިޔަ ދެ އަހަރުތެރޭ އެ އެކެޑަމީގައި އޭނާ ވަނީ ލިމިޓެޑް އޯވަރު މުބާރާތްތަކާއި ތުރީ ޑޭ ލީގު މުބާރާތްތަކުގައި ބައިވެރިވެފައެވެ.
ލަންކާގެ ވެސްޓާން ޕްރޮވިންސް ކްރިކެޓް އެސޯސިއޭޝަންގައި ވެސް އޭނާ ވަނީ މީގެކުރިން މަސައްކަތްތަކެއް ކޮށްފައެވެ. އެގޮތުން އޭނާ ވަނީ އެ އެސޯސިއޭޝަނުގެ ކޮލަމްބޯ ސައުތު ޒޯން 1 ކްލަސްޓާގެ ޑިސްޓްރިކްޓް ޑިވެލޮޕްމަންޓް ކޯޗެއްގެ ގޮތުގައި މަސައްކަތްކޮށްފައެވެ.
އެންމެ ފަހުން ޤައުމީ ކްރިކެޓު ޓީމުގައި ބިދޭސީ ކޯޗަކަށް ހުރީ ދެކުނު އެފްރިކާގެ މުހައްމަދު އާސިފް އަމީން ޚާން އެވެ. ނަމަވެސް ޖިންސީ ގޯނާކުރިކަމުގެ ތުހުމަތުގައި އޭނާ ވަނީ ހައްޔަރުކޮށްފައެވެ.
މިހާރު ކުރިޔަށްދާ ރާއްޖޭގެ ޓީ20 ޕްރިމިއާ ލީގުގެ މޮޅު ކުޅުންތެރިންނަށް އިނާމު ދިނީ ވެސް ކޯޗު ޕަސިންދު އެވެ. މިހާތަނަށް ތިން މެޗެއް ކުޅުނުއިރު އެންމެ އަވަހަށް ދެން މެޗެއް ކުޅޭނީ އަންނަ ހުކުރު ދުވަހު އެވެ. އެދުވަހު ހެނދުނު އޮއްފު އެފްސީ އާއި ވިޔަންސާ ބައްދަލުކުރާ އިރު މެންދުރު ބައްދަލުކުރާނީ މިލާން ކްރިކެޓް އެކަޑަމީ އާއި މާލޭ ވެޓެރަންސް އެވެ. އަދި ހޮނިހިރު ދުވަހު މާލޭ ސްޕޯޓްސް ކްލަބާއި ވިޔަންސާ ބައްދަލުކުރާނެ އެވެ.