ރަޝިޔާއިން އަތްގަދަކޮށްފައިވާ ޔޫކްރެއިންގެ ސަރަޙައްދެއް ކަމުގައިވާ ކްރައިމިޔާގެ އިތުރުން ރަޝިޔާގެ ދެ ރަށަކަށް އަމާޒުކޮށް ދޭން އުޅުނު މިސައިލް ހަމަލަތަކެއް ދިފާޢުކޮށްފައިވާ ކަމުގައި ރަޝިޔާއިން ބުނެފިއެވެ. ކްރައިމިޔާއަކީ 2014 ވަނަ އަހަރު ރަޝިޔާއިން އަތްގަދަކޮށްފައިވާ ސަރަޙައްދެކެވެ.
ރަޝިޔާގެ ދިފާޢީ ވުޒާރާއިން ބުނީ ކްރައިމިޔާގެ އިތުރުން އެ ޤައުމުގެ ދެ ރަށް ކަމުގައިވާ ރަސްތޮފާއި ބްރިޔަންސްކަށް ހަތަރު މިސައިލް ހަމަލައެއް ދޭން މަސައްކަތް ކޮށްފައިވާ ކަމުގައެވެ. ރަސްތޮފާއި ބްރިޔަންސްކަކީ ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ދެ ރަށެވެ. ރަޝިޔާގެ ދިފާޢީ ވުޒާރާއިން ބުނީ އެ ރަށްތަކަށް ހަމަލަދޭން ފޮނުވައިލި މިސައިލްތައް އެ ޤައުމުގެ ވައިގެ ދިފާޢީ ނިޒާމު ބޭނުންކޮށްގެން ދިފާޢުކޮށް ވައްޓައިލާފައިވާ ކަމުގައެވެ.
ކްރައިމިޔާއަށް ރަޝިޔާއިން ކަނޑައަޅާފައި ހުންނަވާ ގަވަރުނަރު ސެރްގޭ އަކްސްޔޯނެފް ވިދާޅުވީ ކްރައިމިޔާގެ ރަށެއް ކަމުގައިވާ ކިއެރްޗަށް ހަމަލަދޭން ބޭނުންކޮށްފައި ވަނީ ކްރޫޒް މިސައިލެއް ކަމުގައެވެ. އަދި، އެ މިސައިލް ދިފާޢުކޮށް ވައްޓައިލާފައިވާ ކަމަށާއި، އެ ހާދިސާގައި އެއްވެސް މީހެއްގެ ފުރާނައަށް އަދި މުދަލަކަށް ވެސް ގެއްލުންވެފައި ނުވާ ކަމުގައެވެ. މިސައިލްތައް އުދުއްސައިލާފައި ވަނީ ކޮން ތަނަކުން ކަން ރަޝިޔާއިން ސާފުކޮށްދީފައެއް ނުވެއެވެ.
ޔޫކްރެއިންގެ ދެކުނުގައިވާ ކްރައިމިޔާއަކީ ރަޝިޔާއިން އަތްގަދަކޮށްފައިވާ ސަރަޙައްދެއް ނަމަވެސް، އެއީ ރަޝިޔާގެ ބަޔެއްގެ ގޮތުގައި ބައިނަލްއަޤުވާމީ މުޖުތަމަޢުން ބަލައިގަނެފައެއް ނުވެއެވެ. އެ ސަރަޙައްދަށް މިސައިލް ހަމަލަތަކެއް ދޭން އުޅުމާ ގުޅިގެން، އެ ސަރަޙައްދާއި ރަޝިޔާ ގުޅައިދޭ "ކްރައިމިޔަން ބުރިޖު" ވަގުތީ ގޮތުން ބަންދުކޮށް، ދަތުރުފަތުރު މެދުކަނޑައިލިއެވެ.
ރަޝިޔާގެ ދެކުނުގައިވާ ރަސްތޮފަށް ހަމަލަދޭން ބޭނުންކުރި މިސައިލް ވެސް ވައްޓައިލާފައިވާ ކަމުގައި އެ ރަށުގެ ގަވަރުނަރު ވަސީލީ ގުއޮލޮބިއެފް ވިދާޅުވިއެވެ. އޭއީ ޔޫކްރެއިނުން ދީފައިވާ ހަމަލައެއް ކަމަށް ތުހުމަތުކުރައްވައި، އެ ހަމަލާގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި އޭނާ ވިދާޅުވިއެވެ. ނަމަވެސް، މިސައިލްގެ ބައިތަކެއް ވެއްޓި، ބައެއް ޢިމާރާތްތަކުގެ ފުރާޅުތަކަށް ގެއްލުންވިއެވެ.
ބްރިޔަންސްކުގެ ގަވަރުނަރު އަލެކްސާންދްރަ ބޮގާމާސް ވިދާޅުވީ އެ ރަށަށް ހަމަލަދޭން ދެ މިސައިލް ފޮނުވައިލާފައިވާ ކަމަށާއި، އެ ދެ މިސައިލް ވެސް ދިފާޢުކޮށް ވައްޓައިލާފައިވާ ކަމުގައެވެ. އެއް މިސައިލްގެ ބައިތައް ވެއްޓިފައި ވަނީ ސޯމިލަކަށެވެ. މި ހާދިސާގައި އެ ތަނަށް ބޮޑެތި ގެއްލުންތަކެއް ލިބުނު ކަމުގައި ބޮގާމާސް ވިދާޅުވިއެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާގެ ސިފައިން ވަނީ ޔޫކްރެއިންގެ ބައެއް ސަރަޙައްދުތަކަށް އަތްގަދަކޮށްފައެވެ. އޭގެ ތެރޭގައި އިރުމަތީގައިވާ ދޮންބާސްގެ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާ ހިމެނެއެވެ. ރަޝިޔާގެ އިސްތިޢުމާރީ ސިފައިންގެ އަތްދަށުން މިނިވަންކަން ހޯދަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.