ޒަމާނީ ފެންވަރަށް ތަރައްޤީކޮށްފައިވާ ށ. ފޯކައިދޫ ފުޓްބޯޅަ ދަނޑު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރަސްމީކޮށް ހުޅުއްވައިދެއްވައިފިއެވެ.
މި ދަނޑުގެ މަސައްކަތް ފަށާފައިވަނީ 2020 ވަނަ އަހަރުގެ ޖެނުއަރީ މަހުގެ 10 ވަނަ ދުވަހުގައެވެ. ފުޓުބޯޅައިގެ ފޯރި ބޮޑު ފޯކައިދޫގައި ހުޅުވި މި ސްޓޭޑިއަމްގައި މި ސަރުކާރުން ވަނީ ޒަމާނީ ރޭގަނޑު ކުޅެވޭ ގޮތަށް ލައިޓިން ސިސްޓަމެއް ހަރުކޮށްފައެވެ. އަދި ރޮސްޓްރަމް ސަރަހައްދެއް ޤާއިމުކުރުން ވެސް ހިމެނެއެވެ.
ށ. އަތޮޅަށް ކުރެއްވި ދަތުރުފުޅުގެ ތެރެއިން މި ދަނޑު ހުޅުއްވައިދެއްވުމުގެ ރަސްމިއްޔާތުގައި ނައިބު ރައީސް ފައިސަލް ނަސީމާއި ކުޅިވަރާ ބެހޭ ވަޒީރު އަޙްމަދު މަޚްލޫފާއި، ޚާރިޖީ ވަޒީރު އަބްދުﷲ ޝާހިދާއި، ހޯމް މިނިސްޓަރު ޝައިޚް އިމްރާން އަބްދުﷲ ގެ އިތުރުން، ރައްޔިތުންގެ މަޖިލީހުގެ ބައެއް މެންބަރުން ބައިވެރިވެ ވަޑައިގެންފައިވެއެވެ.
ރާއްޖޭގެ އެކި ކަންކޮޅުތަކުގައި މި ސަރުކާރުން ވަނީ ފުޓުބޯޅަ ދަނޑު ޤާއިމުކޮށްފައެވެ. ރިޔާސީ ވައުދުގައި ކަނޑައެޅި އަދަދަށްވުރެ މި ސަރުކާރުން ވަނީ މިހާތަނަށް ދެގުނަ އިތުރަށް މުޅި ރާއްޖޭގައި ޓާފް ދަނޑު އަޅައިދީފައެވެ.