ސޫދާނުގެ އަސްކަރިއްޔާއާއި ހަތިޔާރު އެޅި ރެޕިޑް ސަޕޯޓް ފޯސަސް (އާރް.އެސް.އެފް)އާ ދެމެދު ކުރަމުންދާ ހަނގުރާމައިގައި ވެރިރަށް ޚަރްތޫމަށް ދިން ނުރައްކާތެރި ވައިގެ ހަމަލާއެއްގައި ޢާންމުންގެ 22 މީހުން މަރުވެއްޖެއެވެ. ޚަރްތޫމާ އިންވެގެން އޮންނަ ޢުންމުދުރުމާންގެ ދާރުއްސަލާމް އަވަށަށް އެ ޤައުމުގެ އަސްކަރިއްޔާއިން ދިން މި ހަމަލާގައި ގިނަ ޢަދަދެއްގެ ބަޔަކު ޒަޚަމުވެފައިވާ ކަމުގައި މަންޒަރު ފެނުނު ފަރާތްތަކުން ބުނެއެވެ.
ޚަރްތޫމްގެ އޮފިޝަލަކު ވިދާޅުވީ މި ހަމަލަތަކުގައި ޢާންމުންގެ 22 މީހުން މަރުވެފައިވާ ކަން ކަށަވަރު ކުރެވިފައިވާ ކަމުގައެވެ. ނަމަވެސް، އާރް.އެސް.އެފުން ބުނާ ގޮތުގައި ޢާންމުންގެ 31 އަށްވުރެ ގިނަ މީހުން ވަނީ މަރުވެފައެވެ. އަދި، އަސްކަރިއްޔާގެ ވައިގެ ހަމަލަތަކުގައި ޢާންމުންގެ ގެދޮރަށް ބޮޑެތި ގެއްލުންތަކެއް ލިބިފައިވާ ކަމުގައި ވެސް އެ ޖަމާޢަތުން ބުނެއެވެ.
ސޫދާންގައި ދާޚިލީ ހަމަނުޖެހުންތައް ފެށުނީ އޭޕްރިލް 15 ވަނަ ދުވަހު އާރް.އެސް.އެފްގެ ފައުޖުތަކުން ވެރިރަށް ޚަރްތޫމަށް އަރައި އެ ރަށް ހިފަން މަސައްކަތް ފެށުމާ އެކުގައެވެ. ޚަރްތޫމްގެ ބޮޑު ސަރަޙައްދެއް މިހާރު އޮތީ އެ ޖަމާޢަތުގެ އަތްދަށުގައެވެ. އަދި، އެ ޖަމާޢަތުގެ ފައުޖުތަކަށް އަމާޒުކޮށް އަސްކަރިއްޔާއިން ދަނީ ވަރުގަދަ ވައިގެ ހަމަލަތަކެއް ދެމުންނެވެ.
މި ހަމަނުޖެހުންތަކުގައި މަރުވެފައިވާ މީހުންގެ ޢަދަދު 3,000 އަށްވުރެ މައްޗަށް އަރާފައިވާ ކަމަށް ތަފާސްހިސާބުތަކުން ދައްކައެވެ. ނަމަވެސް، އެ ޢަދަދު 3,000 އަށްވުރެ އިތުރުވާނެ ކަމަށް ބެލެވޭ ކަމުގައި ދުނިޔޭގެ ޞިއްޙަތު ޖަމުޢިއްޔާ – ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)އިން ބުނެއެވެ. ހަމަލަ ބަދަލުކުރަމުންދާ ސަރަޙައްދުތަކުގައި ހުރި ގިނަ ޞިއްޙީ ޚިދުމަތްދޭ ތަންތަން ބަންދުކޮށްފައިވާއިރު ހަމަނުޖެހުންތަކުގައި ޒަޚަމުވެފައިވާ މީހުންނަށް ފަރުވާދިނުމަށް ވަނީ ހުރަސް އެޅިފައެވެ.
ސޫދާންގެ ދާޚިލީ ހަނގުރާމައިގެ ދެ ކޮޅުގައި ތިބީ އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރުހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯއެވެ. ވެރިކަން ހިންގުމާ ގުޅޭ ގޮތުން އުފެދުނު ޚިޔާލު ތަފާތުވުންތަކެއްގައި އާރް.އެސް.އެފްގެ ފައުޖުތަކުން ވެރިރަށް ޚަރްތޫމަށް އަރާފައި ވަނީ އޭޕްރިލް 15 ވަނަ ދުވަހުއެވެ.
ޚަރްތޫމްގެ އިތުރުން ސޫދާންގެ ދެން އެންމެ ބޮޑު ދެ ރަށް ކަމުގައިވާ ޢުންމުދުރުމާނާއި ބަހްރިއްޔާގެ ބޮޑު ސަރަޙައްދެއް ވެސް މިހާރު އޮތީ އާރް.އެސް.އެފްގެ ފައުޖުތަކުގެ ބާރުގެ ދަށުގައެވެ. ހުޅަނގުގައިވާ ދާރްފޫރުގައި ވެސް ދެ ފަރާތުން ދަނީ ހަމަލަ ބަދަލުކުރަމުންނެވެ.
އާރް.އެސް.އެފްގެ ފައުޖުތަކާ ދެކޮޅަށް ސޫދާނުގެ އަސްކަރިއްޔާއިން ދަނީ މެދުކެނޑުމެއް ނެތި ވައިގެ ހަމަލަތަކާއި އާޓިލަރީ ބަޑީގެ ހަމަލަތައް އަމާޒު ކުރަމުންނެވެ. ޖުލައި 8 ވަނަ ދުވަހު ޚަރްތޫމަށް ދީފައިވާ ހަމަލާއަކީ މި ފަދަ އެންމެ ނުރައްކާތެރި އެއް ހަމަލާގެ ގޮތުގައި މަސްރަޙު ދިރާސާކުރާ ފަރާތްތަކުން ސިފަކުރެއެވެ.
ސޫދާނުގެ ދާޚިލީ ހަމަނުޖެހުންތަކާ ގުޅިގެން 3 މިލިޔަނެއްހާ މީހުން އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައިވާ ކަމުގައި ރިޕޯޓުތައް ބުނެއެވެ. އޭގެ ތެރެއިން 645,000 ރެފިއުޖީން އަވައްޓެރި ޤައުމުތަކަށް ހިޖުރަކޮށްފައިވާ ކަމުގައި ހިޖުރަކުރާ މީހުންނާ ބެހޭ ބައިނަލްއަޤުވާމީ ޖަމުޢިއްޔާ – އިންޓަރނޭޝަނަލް އޮގަނައިޒޭޝަން ފޯ މައިގްރޭޝަން (އައި.އޯ.އެމު)ން ބުނެއެވެ. ސޫދާނުގައި އިންސާނީ އެހީއަށް ޖެހި، ރައްކާތެރިކަމަށް ބޭނުން ޖެހިފައިވާ މީހުންގެ ޢަދަދު 25 މިލިޔަނަށް އަރާފައިވާ ކަމުގައި އ.ދއިން ވެސް ބުނެއެވެ.