ބްރެޒިލްގެ އިރުއުތުރުގައިވާ ރަށެއް ކަމުގައިވާ ހެސީފީގައި ހުންނަ އުސް ޢިމާރާތެއް ވެއްޓި އަށް މީހުން މަރުވެއްޖެއެވެ. ޢާންމުން ދިރިއުޅޭ އެޕާޓްމަންޓްތަކެއް ހުންނަ ޢިމާރާތް ވެއްޓުނު ހާދިސާގައި މަރުވި މީހުންގެ ތެރޭގައި ދެ ކުޑަކުދިން ހިމެނޭ ކަމުގައި އޮފިޝަލުން ވިދާޅުވެއެވެ. އެއީ، ފަސް އަހަރާއި އަށް އަހަރުގެ ދެ ކުދިންނެވެ.
މި ހާދިސާ ހިނގާފައި ވަނީ ހެސީފީގެ ޕައުލީސްތާ އަވަށުގައެވެ. މި ހާދިސާ ހިނގާފައި ވަނީ މޫސުން ގޯސްވެ، ބޯކޮށް ވާރޭވެހެމުންދިޔަ ވަގުތެއްގައެވެ. ނަމަވެސް، ޢިމާރާތް ވެއްޓެން މެދުވެރިވި ސަބަބު އަދި މިހާތަނަށް ދެނެގަނެވިފައި ނުވާ ކަމުގައި އޮފިޝަލުން ވިދާޅުވެއެވެ. ވެއްޓުނު ޢިމާރާތުގެ ދަށުވެފައިވާ މީހުން ސަލާމަތް ކުރުމަށް އޮފިޝަލުން މަސައްކަތް ކުރަމުންދާއިރު، މިހާތަނަށް ހަތަރު މީހަކު ސަލާމަތް ކުރެވިފައިވާ ކަމުގައި އޮފިޝަލުން ވިދާޅުވިއެވެ.
ވެއްޓިފައިވާ ހަތަރު ބުރީގެ އުސް ޢިމާރާތުގެ ދަށުގައި އިތުރު ހަ މީހަކު ތާށިވެފައިވާ ކަމަށް ބެލެވެއެވެ. ޢިމާރާތް ވެއްޓިފައި ވަނީ ބްރެޒިލް ގަޑިން ހެނދުނު 6:35 ހާއިރު ގިނަ މީހުން ނިދާފައި ތިބި ވަގުތުގައި ކަމަށް އޮފިޝަލުން ވިދާޅުވެއެވެ. ޢިމާރާތް ވެއްޓުނު ހާދިސާ ތަހުޤީޤު ކުރަމުންދާ ފަރާތްތަކުން ބުނީ، އެއީ ވަރަށް ބަލިކަށިކޮށް ބިނާކޮށްފައިވާ ޢިމާރާތެއް ކަމުގައެވެ.
މި ހާދިސާގައި މަރުވި މީހުންގެ ތެރޭގައި އުމުރުން 43 އަހަރުގެ އަންހެނަކާއި އޭނާގެ 19 އަހަރުގެ ފިރިހެން ދަރިފުޅު ވެސް ހިމެނޭ ކަމުގައި ރިޕޯޓުތައް ބުނެއެވެ. ކުރިއަށް އޮތް ދުވަސްތަކުގައި ވެސް ހެސީފީއަށް ބޯކޮށް ވާރޭވެހޭނެ ކަމަށް ލަފާކޮށް، އެ ރަށުގެ ގަވަރުނަރު ވަނީ ރައްކާތެރި ކަމުގެ ފިޔަވަޅުތައް އެޅުމަށް އެ ރަށުގެ ރައްޔިތުންނަށް އިރުޝާދުދެއްވާފައެވެ.