އޭޝިއަން ސާފިން ޗެމްޕިއަންޝިޕް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފައްޓަވައިދެއްވައިފިއެވެ.
ކ. ތުލުސްދޫގައި ކުރިއަށްދާ މި މުބާރާތުގައި 20 ގައުމަކުން ސާފަރުން ވާދަކުރާނެއެވެ.
މި މުބާރާތް ފައްޓުމަށް ތުލުސްދޫގައި މިއަދު ބޭއްވި ހަފުލާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އިތުރުން، ނައިބު ރައީސް ފައިސަލް ނަސީމާއި، ކުޅިވަރާ ބެހޭ ވަޒީރުގެ އިތުރުން އޭޝިއަން ސާފިން ފެޑަރޭޝަނުގެ ރައީސް އާޓްސުސީ ސަކާއީ ބައިވެރިވެވަޑައިގަތެވެ.
މި މުބާރާތް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ކުޅިވަރާ ބެހޭ ވަޒީރު ވިދާޅުވީ، މިއީ ރާއްޖޭގައި މިއަހަރު ބޭއްވޭ އަށްވަނަ ބައިނަލްއަގްވާމީ މުބާރާތް ކަމަށެވެ. އަދި ބައިނަލްއަގްވާމީ ދެ މުބާރާތެއް މިވަގުތު ރާއްޖޭގައި ބޭއްވޭއިރު، ސާފިން މުބާރާތުންވެސް ދިވެހި އެތުލީޓުން ކާމިޔާބު ހޯދާނެ ކަމަށް އުންމީދުކުރައްވާ ކަމަށް މަޚްލޫފް ވިދާޅުވިއެވެ.
މި މުބާރާތުގައި ރާއްޖޭގެ ގައުމީ ސްކޮޑުގައި ހިމެނޭ ހަ އެތުލީޓުންގެ އިތުރުން ވައިލްޑް ކާޑް ސްލޮޓް ގައި މުބާރާތް ބާއްވާ ތުލުސްދޫގެ ދެ އެތުލީޓުން ވާދަކުރާނެއެވެ.
ވައިލްޑްކާޑް ދެ ސްލޮޓާ އެކު މުބާރާތުގެ ފިރިހެން އޯޕަން ކެޓެގަރީގައި ރާއްޖޭގެ މުޅި އެކު އަށް އެތުލީޓުން ވާދަ ކުރެ އެވެ. އެއީ ޗިކާ އާއި މުއީންގެ އިތުރުން، ގައުމީ ސްކޮޑުގައި ހިމެނޭ އަހުމަދު އާގިލް (އަންމަޑޭ)، ނަޖާހު މުހައްމަދު (ކަބޯ)، ޖައިލަމް ނިޒާރު، ހޫދު އަހުމަދު (ހޫބްޒް)، އިސްމާއިލް ރަޝީދު (ސްމައިލީ) އަދި ހުސެއިން އަރީފް (އިބޫ) އެވެ.
މުބާރާތް ކުރިއަށް ދާނީ ތުލުސްދޫގެ "ކޯކްސް ސާފް ބްރޭކް" ނުވަތަ ދިވެހި ނަމުން ނަމަ "ރަން ދާ" ސާފިން ޕޮއިންޓުގައެވެ.