ވިމްބަލްޑަން ޓެނިސް މުބާރާތުގެ ދެވަނަ ބުރުން ފިރިހެން ހަތަރުވަނަ ސީޑް ޑެންމާކްގެ ކެސްޕަރ ރޫޑް ބަލިވެއްޖެއެވެ.
ރޫޑް ބަލިވެފައިވަނީ އިނގިރޭސިވިލާތުގެ ލިއާމް ބްރޯޑީ އާއި ބައްދަލުކުރިމެޗުން 3 ސެޓް 2 ސެޓުންނެވެ.
މިއި މިފަހަރުގެ މުބާރާތުގައި މިހާތަނަށް ފެނިގެންދިޔަ އެންމެ ހައިރާން ކުރުވަނިވި ނަތީޖާއެވެ. ދުނިޔޭގައި 142 ވަނަ އަށް ރޭންކް ކުރެވިފައިވާ ބްރޯޑީ މިމެޗް ކާމިޔާބުކުރީ ހައެއް ހަތަރެއް، ތިނެއް ހަޔެއް، ހަތަރެއް ހަޔެއް، ހައެއް ތިނެއް އަދި ހައެއް ސުމަކުންނެވެ. ރޫޑް ވަނީ އެންމެ ފަހުން ކުޅުނުް ފްރެންޗް އޯޕަން ޓޭނިސް މުބާރާތުގެ ފައިނަލްގައި އެއްކޮޅުން ވާދަކޮށްފައެވެ.
މިކާމިޔާބީއަކީ އުމުރުން 29 އަހަރުގެ ބްރޯޑީއަށް ގަދަ ފަހެއްގައި ހިމެނޭ ކުޅުންތެރިއަކު ބަލިކުރެވުނު ފުރަތަމަ ފަހަރެވެ. އަދި ވިމްބަލްޑަންގެ ސެންޓަރ ކޯޓުގައި ހޯދުނު ފުރަތަމަ ކާމިޔާބީވެސް މެއެވެ. ބްރޯޑީ ހާމަކުރިގޮތުގައި ވިމްބަލްޑަންގެ ސެންޓަރ ކޯޓުގައި ކުޅެ މޮޅުވުމަކީ އޭނާ ކުޑައިރުން ފެށިގެން ދެކެމުން އައި ހުވަފެނެއް ކަމަށެވެ. ވައިލްޑްކާޑް އެންޓްރީއެއްގެ ދަށުން މިފަހަރުގެ މުބާރާތުގައި ވާދަކުރަމުންދާ ބްރޯޑީ ތިންވަނަ ބުރުގައި ބައްދަލުކުރާނީ 29 ވަނަ އަށް ރޭންކް ކުރެވިފައިވާ ކެނެޑާގެ ޑެނިސް ޝާޕޮވަލޯވް އާއެވެ. ޝާޕޮވަލޯވް ތިންވަނަ ބުރުން ޖާގަހޯދީ ދެވަނަ ބުރުގައި ފަރަންސޭސިވިލާތުގެ ބަރޭރެ އާއި ބައްދަލުކުރި މެޗް ސީދާ ތިން ސެޓުން ކާމިޔާބުކޮށްގެންނެވެ.
މިމުބާރާތުގައި އިނގިރޭސިވިލާތުގެ އެންޑީ މަރީ އާއި ފަސްވަނައަށް ސީޑް ކުރެވިފައިވާ ސްޓެފަނޯސް ސިޓްސިޕާސް ބައްދަލުކުރި ދެވަނަ ބުރުގެ މެޗް ވަނީ 2 ސެޓް އެއްސެޓުން މަރީ ކުރީގައި އޮއްވާ މާ ލަސްވުމުގެ ސަބަބުން މިރޭ ކުޅޭގޮތަށް މެޗް މެދު ކަނޑާލާފައެވެ. މިމެޗްގެ ފުރަތަމަ ސެޓް ސިޓްސިޕާސް ޓައިބްރޭކަކަށް ގޮސް ތިނެއް ހަތަކުން ކާމިޔާބު ކުރި އިރު ޖެހިގެން އައި ސެޓްގެ ޓައިބްރޭކް މަރީ ކާމިޔާބުކުރީ ހަތެއް ދެއަކުންނެވެ. އަދި މެޗްގެ ތިންވަނަ ސެޓް މަރީ ކާމިޔާބު ކުރީ ހައެއް ހަތަރަކުންނެވެ.