ސްޕެނިޝް ލީގުގެ ރެއާލް މެޑްރިޑުން ތުރުކީވިލާތުގެ އަރަމުންއަންނަ ޒުވާން ފޯވަޑް އަރްޑާ ގުލަރ އެޓީމަށް ގެންގޮސްފިއެވެ.
ފެނަބާޗޭއަށް ކުޅެމުންދާ ގުލަރ ރެއާލް އާއި ގުޅިފައިވަނީ ހަ އަހަރު ދުވަހުގެއެއްބަސްވުމެއްގެ ދަށުންނެވެ.
ޓަރކިޝް މެސީގެ ނަމުން ނަންދެވިފައިވާ މިޒުވާން ކުޅުންތެރިޔާވަނީ ފެނަބާޗޭއަށް 51 މެޗް ކުޅެދީ 9 ލަނޑު ޖަހާދީ 12 އެސިސްޓް ކޮށްފައެވެ. އޭނާ ފެނަބާޗޭއަށް ފުރަތަމަ ކުޅެފައިވަނީ އުމުރުން 16 އަހަރުގައެވެ. އަދި ކުޅުނު ފުރަތަމަ މެޗްގައި އޭނާ ވަނީ އެސިސްޓެއް ކޮށްފައެވެ. މިދިޔަ މަހު ގުލަރވަނީ ތުރުކީވިލާތުގެ ޤައުމީ ޓީމަށް ލަނޑު ޖެހި އެންމެ ޒުވާން ކުޅުންތެރިޔާއަށް ވެގެން ގޮސްފައެވެ. ގުލަރ މިދިޔަ ސީޒަންގައި ފެނަބާޗޭއަށް ވަނީ ހަތަރު ލަނޑު ޖަހާދީ ހަތަރު އެސިސްޓް ކޮށްފައެވެ. އަދި ޓަރކިޝް ކަޕް ފައިނަލްގައި އޭނާ ވަނީ މޮޅު ކުޅުންތެރިޔާގެ މަގާމްވެސް ހޯދާފައެވެ.
ގުލަރ ހޯދުމަށް ޔޫރަޕްގެ ބޮޑެތި ގިނަ ކްލަބް ތަކަކުން މަސައްކަތް ކޮށްފައިވެއެވެ. މީގެ ތެރޭގައި އާސެނަލް، މެންޗެސްތަރ ޔުނައިޓެޑް، ނިއުކާސްލް ޔުނައިޓެޑް، ބަޔޭން މިޔުނިކް އަދި ޕެރިސް ސެއިންޓް ޖަރމެއިން ހިމެނެއެވެ. ރެއާލް އިން ގުލަރ އެޓީމަށް ސޮއިކުރުވި އަގު ހާމަކޮށްފައިނުވި ނަމަވެސް ބުނެވޭގޮތުގައި މިޓްރާންސްފަރގެ އަގު 20 މިލިއަން ޔޫރޯއަށް އަރައެވެ.