ސްވިޑެންގައި ކީރިތި ޤުރުއާނުގެ މުޞްޙަފެއްގެ ހުރުމަތް ކެނޑި މައްސަލައިގައި މުޅި މުސްލިމް އުންމަތުގެ ރުޅިވެރިކަމާއި ފާޑުކިޔުންތައް އެ ޤައުމަށް އަމާޒުވެފައިވާ ދަނޑިވަޅުގައި އެ ހާދިސާއާ ގުޅޭގޮތުން މަޝްވަރާކޮށް، އެ މައްސަލަ ބަލަން ނިންމާފައިވާ ކަމުގައި އ.ދގެ އިންސާނީ ހައްޤުތަކާ ބެހޭ އިދާރާ – ހިޔުމަން ރައިޓްސް ކައުންސިލް (އެޗް.އާރް.ސީ)ން ބުނެފިއެވެ. އެ އިދާރާގެ ތަރުޖަމާނު ޕެސްކާލް ސިމް ވިދާޅުވީ، އެ ހާދިސާއާ ގުޅޭ ގޮތުން މަޝްވަރާ ކުރަން އެޗް.އާރް.ސީގެ ކުއްލި ބައްދަލުވުމެއް ބާއްވަން ނިންމާފައިވާ ކަމުގައެވެ.
މުޞްޙަފުގައި ހުޅުޖެހުމުގެ ދަށު ދަރަޖައިގެ އަމަލު ހިންގާފައި ވަނީ ސްވިޑެނަށް ހިޖުރަކޮށްފައިވާ އިރާޤުގެ ރައްޔިތެއް ކަމުގައިވާ ސުލްވާން މުމީކެވެ. ސްޓޮކްހޯމްގެ މައި މިސްކިތުގެ ކުރިމަތީގައި މުޞްޙަފެއްގައި ރޯކޮށްލާފައި ވަނީ ބަރަކާތްތެރި އަޟުޙާ ޢީދު ދުވަހުއެވެ. ހައްދުފަހަނަ އަޅާފައިވާ ޖައްބާރު މީހެއް ކަމުގައިވާ މުމީކު އެ އަމަލު ހިންގާފައި ވަނީ ސްވިޑެންގެ ފުލުހުން ދީފައިވާ ހުއްދައެއްގެ ދަށުން ކުރި މުޒާހަރާއެއްގެ ތެރެއިންނެވެ. މުޒާހަރާ ކުރުމަށް މުމީކަށް ހުއްދަ ދީފައި ވަނީ ޚިޔާލުފާޅުކުރުމުގެ މިނިވަންކަމުގެ ހައްޤުގެ ދަށުން ކަމުގައި ފުލުހުން ބުނެއެވެ.
މި ކަމާ މެދު މަޝްވަރާ ކުރުމަށް އެޗް.އާރް.ސީގެ ކުއްލި ބައްދަލުވުމެއް ބޭއްވުމަށް އެދި ހުށަހަޅާފައި ވަނީ ޕާކިސްތާނުންނެވެ. މި ކަމާ ގުޅޭ ގޮތުން ވާހަކަފުޅު ދައްކަވަމުން ސިމް ވިދާޅުވީ ރާވައިގެން ދީނީ ޝުޢޫރުތަކަށް ގެއްލުންދޭ އަދި ދީނީ ނަފުރަތު ފެތުރޭ މި ފަދަ އަމަލުތައް ހިންގުން ޢާންމުވަމުން އަންނަ ކަމުގައެވެ. އަދި، މިއީ ކަންބޮޑުވުން އޮތް މައްސަލައެއް ކަން ފާހަގަކުރައްވައި އޭނާ ވިދާޅުވީ މިފަދަ އަމަލުތައް ހުއްޓުވުމާ ގުޅޭ ގޮތުން މަޝްވަރާ ކުރުމަށް އެޗް.އާރް.ސީގެ ކުއްލި ބައްދަލުވުމެއް ބާއްވަން ނިންމާފައި ވަނީ ޕާކިސްތާނުގެ އިތުރުން އޮގަނައިޒޭޝަން އޮފް އިސްލާމިކް ކޯޕޮރޭޝަން (އޯ.އައި.ސީ)ގެ އެދުމުގެ ދަށުން ކަމުގައެވެ.
މުސްލިމް އުންމަތުގެ ނުރުހުމާއި ފާޑުކިޔުންތައް އަމާޒުވުމާ ގުޅިގެން ސްވިޑެންގެ ސަރުކާރުން ވެސް ވަނީ އެ ޤައުމުގައި މުޞްޙަފެއްގެ ހުރުމަތް ކެނޑި މައްސަލަ ކުށްވެރިކޮށްފައެވެ. އިޙުތިރާމު ކުޑަ، ދަށުދަރަޖައިގެ ހަޑިމުޑުދާރު އެ އަމަލާ ގުޅޭ ގޮތުން ސްވިޑެންގެ ޚާރިޖީ ވުޒާރާއިން ވަނީ އެއީ އިސްލާމްދީނާ މެދު ނަފްރަތު ފަތުރަން ހިންގާފައިވާ އަމަލެއްގެ ގޮތުގައި ސިފަކޮށްފައެވެ. އަދި، އެއީ ސްވިޑެންގެ ސަރުކާރުގެ ސިޔާސަތުތަކާ ބައްދަލު އަމަލެއް ނޫން ކަމުގައި ބުނެ، އެ އަމަލު ކުށްވެރިކުރާ ކަމުގައި އެ ވުޒާރާއިން ބުންޏެވެ.
އޯ.އައި.ސީން ވެސް ވަނީ މި ކަމާ ގުޅިގެން ކުއްލި ބައްދަލުވުމެއް ބާއްވައި، އެ އަމަލު އެންމެ ހަރުކަށި އިބާރާތުން ކުށްވެރިކޮށްފައެވެ. އަދި، އެއީ ދީނީ ނަފުރަތު އިތުރުކުރުމުގެ އަމަލެއްގެ ގޮތުގައި ސިފަކޮށް، އެ ފަދަ އަމަލުތައް ތަކުރާރު ކުރުމުގެ ފުރުޞަތު ދިނުން ހުއްޓައިލުމަށް ސްވިޑެންގެ ސަރުކާރުން ގޮވައިލާފައެވެ.
މުޞްޙަފުގެ ހުރުމަތް ކެނޑުމުގެ ފުރުޞަތު ދިން މައްސަލައިގައި އީރާނުން ވެސް ވަނީ ސްވިޑެނަށް އެ ޤައުމުގެ އައު ސަފީރަކު ފޮނުވަން ދެކޮޅު ހަދާފައެވެ. އެ އިޙުތިރާމު ކުޑަ، ދަށުދަރަޖައިގެ ހަޑިމުޑުދާރު އަމަލު ކުށްވެރިކުރައްވައި ވާހަކަފުޅު ދައްކަވަމުން އީރާނުގެ ޚާރިޖީ ވަޒީރު ޙުސައިން އާމިރުޢަބްދުاللهހިއަން ވިދާޅުވީ، އެ ކަމާ މެދު ހިތްހަމަނުޖެހުން ފާޅުކުރުމުގެ ގޮތުން އެ ޤައުމަށް އީރާނުގެ ސަފީރަކު ފޮނުވުން މަޑުޖައްސައިލައްވާފައިވާ ކަމުގައެވެ.
މުޞްޙަފުގެ ހުރުމަތް ކެނޑި މުމީކާ ދެކޮޅަށް ދަޢުވާ ކުރަން ސްވިޑެންގެ ފުލުހުން މިހާރު ވަނީ ހުށަހަޅާފައެވެ. އޭނާއާ ދެކޮޅަށް ދަޢުވާ އުފުލަނީ ވަކި ނަސްލެއް ނުވަތަ ބަޔަކާ ދެކޮޅަށް ނަފްރަތު އުފައްދަން މަސައްކަތް ކުރުމުގެ ކުށުގައެވެ. ކީރިތި ޤުރުއާނާއި މުސްލިމުންނާ ދެކޮޅަށް ނަފްރަތު ފެތުރުމުގެ ބޭނުމުގައި މުޒާހަރާތައް ބޭއްވުމަށް ހުއްދަ ދިނުން ސްވިޑެންގެ ފުލުހުން ވަނީ ހުއްޓައިލާފައެވެ. ނަމަވެސް، އެއީ ޚިޔާލުފާޅުކުރުމުގެ މިނިވަންކަމުގެ ހައްޤަށް އަރައިގަތުން ކަމަށް ކަނޑައަޅައި، ސްވިޑެންގެ ކޯޓަކުން ވަނީ އެ ފަދަ މުޒާހަރާތައް ބޭއްވުމުގެ ހުއްދަ ދޭން ފުލުހުންގެ މައްޗަށް އަމުރުކޮށްފައެވެ.