ދެކުނު އެފްރިކާގެ އެންމެ ބޮޑު ރަށް ކަމުގައިވާ ޖޮހެނެސްބަރގްގެ ރަށްބޭރުގައި ޢާންމުން ދިރިއުޅޭ ސަރަޙައްދެއްގައި ނުރައްކާތެރި ގޭހެއް ލީކުވުމުގެ ސަބަބުން 16 މީހުން މަރުވެއްޖެއެވެ. މި ހާދިސާ ހިނގާފައި ވަނީ ޖޮހެނެސްބަރގްގެ އިރުމަތިން އޮންނަ ބޮކްސްބަރގް ކިޔާ ސަރަޙައްދެއްގައެވެ. އެއީ، ގަވާޢިދާ ޚިލާފަށް މީހުން ވަޒަންވެރިވެފައިވާ ހިސާބެއްގައެވެ. އަދި، ޤަވާޢިދާ ޚިލާފަށް މައިން ކުރުމުގެ މަސައްކަތް ވެސް ކުރާ ސަރަޙައްދެކެވެ.
ޖޮހެނެސްބަރގްގެ ކުއްލި ހާލަތްތަކުގައި ހަރަކާތްތެރިވާ ޓީމުގެ އޮފިޝަލުން ވިދާޅުވީ، ގޭސް ލީކުވެގެން ގިނަ ޢަދަދެއްގެ ބަޔަކު މަރުވި ކަމުގެ ޚަބަރު ލިބުމާ އެކު އެ ތަނަށް ޓީމުތަކުން ގޮސްފައިވާ ކަމުގައެވެ. އަދި، ގޭހުގެ އަސަރުކުރުމުގެ ސަބަބުން ޚަބަރު ހުސްވެފައިވާ ގިނަ ޢަދަދެއްގެ މީހުންގެ ފުރާނަ ސަލާމަތް ކޮށްފައިވާ ކަމުގައެވެ. ގޭހުގެ އަސަރު ކޮށްފައިވާ ގިނަ ޢަދަދެއްގެ ބަޔަކު ހޮސްޕިޓަލަށް ގެންގޮސް ފަރުވާދޭން ޖެހުނެވެ. އޭގެ ތެރެއިން ހަތަރު މީހެއްގެ ހާލު ސީރިޔަސް ކަމުގައި ވެސް އޮފިޝަލުން ވިދާޅުވެއެވެ.
މި ހާދިސާގައި މަރުވި މީހުންގެ ތެރޭގައި ފަސް އަންހެނުންނާއި ތިން ކުޑަކުދިން ހިމެނެއެވެ. ޖޮހެނެސްބަރގްގެ އޮފިޝަލުން މި ހާދިސާގެ ތަހުޤީޤު ފަށާފައިވާއިރު، މި ހާދިސާ ހިނގާފައި ވަނީ ވިހަ ގޭހެއް އަޅާފައި ހުރި ސިލިންޑަރެއް ނުވަތަ ގޭސް ފުޅިއެއްގެ ތެރެއިން ގޭސް ލީކުވުމުގެ ސަބަބުން ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ. އޭގައި ހުރީ ނުރައްކާތެރި ވިހަ ގާހެއް ކަމުގައިވާ "ނައިޓްރޭޓް އޮކްސައިޑް" ކަމުގައި ވެސް އޮފިޝަލުން ވިދާޅުވިއެވެ. އެއީ، މައިން ކުރުމުގެ މަސައްކަތުގައި ބޭނުންކުރާ ގޭހެކެވެ.
މި ހާދިސާ ހިނގާފައި ވަނީ ޤަވާޢިދާ ޚިލާފަށް ރަން މައިން ކުރާ ސަރަޙައްދެއްގައި ކަމަށާއި، އެ ސަރަޙައްދުގައި ދިރިއުޅޭ ގިނަ މީހުންނަކީ މައިންކުރުމުގެ މަސައްކަތުގައި ހަރަކާތްތެރިވާ މީހުން ކަމުގައި އޮފިޝަލުން ވިދާޅުވެއެވެ. ދެކުނު އެފްރިކާއަކީ ވަޒީފާ ނެތް މީހުންގެ ޢަދަދު ގިނަ ޤައުމެކެވެ. އެ ޤައުމުގައި ވަޒީފާ ނެތް މީހުންގެ ނިސްބަތް 32 އިންސައްތައަށް އަރާ ކަމުގައި ތަފާސްހިސާބުތަކުން ދައްކައެވެ.
ހުސްވި ޖޫން މަހު ބޮކްސްބަރގް އޮންނަ ސަރަޙައްދަށް ރިކްޓަރ މިންގަނޑުން 5.0ގެ ބާރުމިނުގައި ބިންހެލުމެއް އައިސްފައިވާ ކަން ވެސް ފާހަގަކުރެވެއެވެ. އަދި، ހުސްވި އަހަރުގެ ޑިސެންބަރު މަހު އެ ރަށުގައި ގޭސް ޓޭންކަރެއް ގޮވައި، 41 މީހުން ވަނީ މަރުވެފައެވެ. އެ ހާދިސާ ހިނގާފައި ވަނީ ލިކުއިފައިޑް ޕެޓްރޯލިޔަމް ގޭސް (އެލް.ޕީ.ޖީ) އުފުލާ ލޮރީއެއް ބާރު ދުވެލީގައި ދުއްވާފައި ގޮސް ކޮންޓްރޯލް ނުވެގެން ބުރިޖެއްގައި ޖެހުމުގެ ސަބަބުންނެވެ.