އަހަރުގެ ތިންވަނަ ގްރޭންޑް ސްލޭމް މުބާރާތް ކަމަށްވާ ވިމްބަލްޑަން ޓެނިސް މުބާރާތުގެ ދެވަނަ ބުރުން ގްރީސްގެ ސްޓެފަނޯސް ސިޓްސިޕާސް ޖާގަ ހޯދައިފިއެވެ.
މިމުބާރާތުގެ ދެވަނަ ބުރުން ސިޓްސިޕާސް ޖާގަހޯދީ ފުރަތަމަ ބުރުގައި ޑޮމިނިކް ތިއެމް އާއި ބައްދަލުކުރިމެޗް ތިން ސެޓް ދެސެޓުން ކާމިޔާބުކޮށްގެންނެވެ.
ފޯރިގަދަ ކުޅުމެއް ފެނިގެންދިޔަ މިމެޗްގެ ފުރަތަމަ ސެޓް ތިނެއް ހަޔަކުން ތިއެމް ކާމިޔާބުކުރިއިރު ދެވަނަ ސެޓް ޓައި ބްރޭކަކަށް ގޮސްގން ހަތެއް އެކަކުން ކާމިޔާބުކުރީ ސިޓްސިޕާސްއެވެ. އަދި ޖެހިގެން އައި ތިންވަނަ ސެތް ހައެއް ދެއަކުން ކާމިޔާޞުކުރީވެސް ސިޓްސިޕާސްއެވެ. ނަމަވެސް ތިއެމް ވަނީ ހަތަރުވަނަ ސެޓް ޓައި ބްރޭކަކަށް ގޮސް ފަހެއް ހަތަކުން ކާމިޔާބުކޮށްފައެވެ.
މިމެޗްގެ ފަހު ސެޓްވެސް ނިމިގެންދިޔައީ ޓައި ބްރޭކަކަށް ގޮސްގެންނެވެ. މިގޮތުން މިޓައިބްރޭކް ދިހައެއް އަށަކުން ކާމިޔާބުކޮށް ސިޓްސިޕާސް މިމެޗް ކާމިޔާބުކުރިއެވެ. މިމެޗްވަނީ ތިން ގަޑިއިރާއި 56 މިނެޓަށް ދިގުލައިގެން ގޮސްފައެވެ. މިމުބާރާތުގެ ދެވަނަ ބުރުގައި ސިޓްސިޕާސް ބައްދަލުކުރުމަށް ހަމަޖެހިފައިވަނީ އިނގިރޭސިވިލާތުގެ އެންޑީ މަރީ އާއެވެ.
މިމުބާރާތުގައި ދެވަނައަށް ސީޑް ކުރެވިފައިވާ ސަރބިއާގެ ނޯވަކް ޖޯކޮވިޗް އާއި އޮސްޓްރޭލިއާގެ ޖޯޑަން ތޮމްޕްސަން ބައްދަލުކުރިމެޗް ސީދާ ތިން ސެޓުން ކާމިޔާބުކުރީ ޖޯކޮވިޗްއެވެ. މިގޮތުން މިމެޗްގެ ސެޓްތައް އޭނާ ކާމިޔާބުކޮށްފައިވަނީ ހައެއް ތިނެއް، ހަތެއް ހަޔެއް އަދި ހަތެއް ފަހަކުންނެވެ. މިމުބާރާތުގައި ރޭވެސްވަނީ ވާރޭ ވެހުމުގެ ސަބަބުން ބައެއް މެޗްތަކަށް އަސަރުކޮށްފައެވެ.