ބްރެޒިލުގެ ޤައުމީ ފުޓްބޯޅަ ޓީމުގެ ކޯޗަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ އަންނަ އަހަރު ހަމަޖެހިގެންދާނެ ކަމަށް ބްރެޒިލް ފުޓްބޯޅަ ކޮންފެޑެރޭޝަނުގެ ރައީސް އެޑްނާލްޑޯ ރޮޑްރިގޭޒް ވިދާޅުވެއްޖެއެވެ.
މިގޮތުން މިއަންނަ އަހަރުގެ ކޮޕާ އެމެރިކާ އަންނަންވާއިރަށް އެޤައުމުގެ ޓީމާއި އެންޗެލޯޓީ ހަވާލުވާނެކަމުގެ ވަރަށް ބޮޑު ޔަގީންކަމެއް ވަނީ ފެޑެރޭޝަނަށް ލިބިފައެވެ.
ރޮޑްރިގޭޒް ހާމަކުރިގޮތުގައި އެންޗެލޯޓީ ޤައުމީ ޓީމާއި ހަވާލުވަންދެން އެޓީމްގެ ކަންތައްތައް ބަލަހައްޓާނީ ފުލުމިނެންސޭގެ ކޯޗް ފެނާންޑޯ ޑިނީޒްއެވެ. ނަމަވެސް މިއީ ވަގުތީ ވަޒީފާއެއްގެ ގޮތުގައި ފެޑެރޭޝަނުން ނުގުނާނެކަމަށްވެސް އޭނާ ހާމަކުރިއެވެ.
މިދިޔަ އަހަރުގެ ވާރލްޑް ކަޕްގެ ކްއާޓަރ ފައިނަލްގައި ކްރޮއޭޝިއާ އަތުން ބަލިވެ އެމުބާރާތުން ކެޓުމާއެކު ޓީޓޭ މަގާމުން ވަކިވިފަހުން ބްރެޒިލްއަށް ދާއިމީ ކޯޗެއް އަދި ހަމަޖައްސާފައެއް ނުވެއެވެ. އަދި އެންޗެލޯޓީ އެޓީމާއި ހަވާލުވާ ވާހަކަ ދައްކާތާ މިހާރު ގިނަ ދުވަސް ތަކެއް ވެއްޖެއެވެ.
މިގޮތުން ނިމިދިޔަ ސީޒަނާއެކު އޭނާ ބްރެޒިލްގެ ކޯޗް ކަމާއި ހަވާލުވާނެކަމަށް އަޑުފެތުރު ނަމަވެސް އެކަން ވެގެންދިޔަ ތަނެއް ނުފެނުނެވެ. އަދި އެންޗެލޯޓީ މިހާރު އަންނަނީ އަންނަ ސީޒަނަށް ރެއާލް މެޑްރިޑް ވަރުގަދަ ކުރުމުގެ ގޮތުން ކުޅުންތެރިން ހޯދުމުގެ މަސައްކަތްވެސް ފަށާފައެވެ.
ބްރެޒިލް އެންމެ ފަހުން ކުޅުނު ރަހްމަތްތެރިކަމުގެ މެޗްތަކުގައި އެޓީމްގެ ކޯޗުގެ ގޮތުގައި ހަރަކާތްތެރިވެފައިވަނީ އެޤައުމުގެ 20 އަހަރުން ދަށުގެ ޓީމްގެ ކޯޗް ރޯމަން މެނެޒޭސް އެވެ. އެންޗެލޯޓީ ރެއާލް އާއި އެކު ހަދާފައިވާ އެއްބަސްވުން މިއަންނަ ސީޒަނާއެކު ހަމަވެގެންދާނެއެވެ. އަދި ބްރެޒިލްގެ ކޯޗަކަށް އެންޗެލޯޓީ ހަމަޖެހިގެން ހިނގައްޖެނަމަ އޭނާ ވެގެންދާނީ ބްރެޒިލް ޤައުމީ ޓީމްގެ ކޯޗް ކަމާއި 1965 ވަނަ އަހަރަށް ފަހު ހަވާލުވާ އެޤައުމުން ބޭރުގެ ފުރަތަމަ ކޯޗަށެވެ. ނަމަވެސް މިކަމާއި ގުޅޭގޮތުން އެންޗެލޯޓީ އަދި ވަކިއެއްޗެއް ބުނެފައެއް ނުވެއެވެ.