ޗައިނާގެ ހުޅަނގުދެކުނުގެ ސަރަޙައްދުތަކަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި ހާދިސާތަކެއްގައި 15 މީހުން މަރުވެއްޖެއެވެ. ވިއްސާރައިގެ އަސަރު އެންމެ ބޮޑަށް ކުރަމުން ދަނީ ޗޮންޗިންގަށެވެ. ފެންބޮޑުވެ އެ ސަރަޙައްދުން އިތުރު ހަތަރު މީހުން ގެއްލިފައިވާ ކަމަށް އޮފިޝަލުން ވިދާޅުވެއެވެ. ބޯކޮށް ވާރޭވެހި، ބައެއް ސަރަޙައްދުތަކުގައި ބިންގަނޑު ކެނޑި، ކިސަޑު ފޭބުމުގެ ހާދިސާތައް ހިނގާފައިވެއެވެ.
ފާއިތުވި މަހެއްހާ ދުވަހުގެ ތެރޭގައި ޗައިނާގެ އެކި ކަންކޮޅުތަކުގެ މޫސުން އާދަޔާ ޚިލާފަށް ގޯސްވެފައިވާ ކަން ފާހަގަކުރެވެއެވެ. ބައެއް ސަރަޙައްދުތަކަށް ބޯކޮށް ވާރޭވެހެމުންދާއިރު، އެހެން ސަރަޙައްދުތަކުގައި ފިނިހޫނުމިން ވަނީ އާދަޔާ ޚިލާފަށް އުފުލިފައެވެ. ފިނިހޫނުމިން އުފުލިފައިވާ ސަރަޙައްދުތަކުގެ ތެރޭގައި ވެރިރަށް ބެއިޖިންގ ހިމެނެއެވެ. އެ ރަށުގެ ފިނިހޫނުމިން 35 ޑިގްރީ ސެލްސިއެސްއަށް އުފުލިފައިވާއިރު، ބޭރުތެރޭގައި ނޫޅުމަށް މޫސުމާ ބެހޭ އިދާރާއިން ވަނީ އެ ރަށުގެ ރައްޔިތުންނަށް އިރުޝާދުދީފައެވެ.
ބޯކޮށް ވާރޭވެހި ޔެންގްޓްޒީ ނުވަތަ ޗަންގްޗިއަންގ ކޯރު ފުރިގެން ބަންޑުންވެ، ޗޮންޗިންގުގެ ވަންޖޯ ޑިސްޓްރިކްޓުގެ ބޮޑު ސަރަޙައްދެއްގައި ވަނީ ފެންބޮޑުވެފައެވެ. ވަންޖޯގެ އިތުރުން ޗޮންޗިންގުގެ 19 ޑިސްޓްރިކްޓެއްގެ އެކި ސަރަޙައްދުތަކުގައި ފެންބޮޑުވެ، 130,000 އަށްވުރެ ގިނަ މީހުންނަށް އެ ކަމުގެ އަސަރު ކޮށްފައިވާ ކަމުގައި އޮފިޝަލުން ވިދާޅުވެއެވެ.
ފެންބޮޑުވުމާ ގުޅިގެން ގެދޮރުގައި ތާށިވެފައިވާ މީހުން ސަލާމަތް ކުރަން ޗޮންޗިންގުގެ އޮފިޝަލުން މިހާރު ދަނީ މަސައްކަތް ކުރަމުންނެވެ. އަދި، ފެންބޮޑުވެފައިވާ ސަރަޙައްދުތަކުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ވެސް ވަނީ ފަށާފައެވެ. މި މަސައްކަތުގައި އެހީތެރިކަން ފޯރުކޮށްދިނުމަށް ވެރިރަށް ބެއިޖިންގުން ވެސް ޓީމުތައް ވަނީ ޗޮންޗިންގަށް ދަތުރުކޮށްފައެވެ.
ފެންބޮޑުވުމާ ގުޅިގެން ޗޮންޗިންގުގެ ޢާންމުންގެ ގެދޮރަށް ބޮޑެތި ގެއްލުންތައް ލިބިފައިވާއިރު، ޢުމްރާނީ ވަސީލަތްތަކަށް ވެސް ވަނީ ގެއްލުން ލިބިފައެވެ. މި ގޮތުން، ޗޮންޗިންގުގެ ރޭލުދަތުރުފަތުރުގައި ބޭނުންކުރާ ބުރިޖެއް ހަލާކުވެފައިވާ ކަމުގައި އޮފިޝަލުން ވިދާޅުވެއެވެ. ނަމަވެސް، މި ހާދިސާ ހިނގާފައި ވަނީ މަރާމާތަށް ބުރިޖު ބަންދުކޮށްފައިވާ ދަނޑިވަޅެއްގައެވެ.
ޗޮންޗިންގާ އިންވެގެން އޮންނަ ސިޗުއާން ޕުރޮވިންސަށް ވެސް ވިއްސާރައިގެ އަސަރު ދަނީ ކުރަމުންނެވެ. އަދި، ފެންބޮޑުވުމާ ގުޅިގެން 460,000 އަށްވުރެ ގިނަ މީހުންނަށް އަސަރުކޮށްފައިވާ ކަމުގައި އެ ޕުރޮވިންސުގެ އޮފިޝަލުން ވިދާޅުވެއެވެ. ފެންބޮޑުވުމާ ގުޅިގެން ސިޗުއާންގެ 85,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
ޗައިނާގެ މޫސުމާ ބެހޭ އިދާރާއިން ބުނީ ކުރިއަށް އޮތް މަހެއްހާ ދުވަހުގެ ތެރޭގައި ވެސް އެ ޤައުމުގެ އެކި ކަންކޮޅުތަކުގެ މޫސުން ގޯސްވާނެ ކަމުގައެވެ. އަދި، ބައެއް ސަރަޙައްދުތަކަށް ބާރުގަދަ ތޫފާންތައް އަރާނެ ކަމަށް ބެލެވޭއިރު، އެހެން ސަރަޙައްދުތަކުގެ ފިނިހޫނުމިން އުފުލޭނެ ކަމަށް ވެސް އެ އިދާރާއިން އިންޒާރު ކުރެއެވެ.
މި ކަމާ ގުޅިގެން ޗައިނާގެ ރައީސް ޝީ ޖިންޕިންގް ވަނީ ރައްކާތެރި ކަމުގެ ފިޔަވަޅުތައް އެޅުމަށް ހުރިހާ ރަށެއްގެ އޮފިޝަލުންނަށް އިރުޝާދު ދެއްވާފައެވެ. އަދި، ޢާންމުންގެ ފުރާނައާއި ގެދޮރާއި މުދާ ރައްކާތެރި ކުރުމަށް އިސްކަމެއް ދިނުމަށް އަންގަވާފައެވެ. އަދި، ފެންބޮޑުވުމުގެ އަސަރުކޮށްފައިވާ ސަރަޙައްދުތަކުގައި ދިރިއުޅޭ ރައްޔިތުންނަށް އެހީތެރިކަން ފޯރުކޮށްދިނުމަށް ޗައިނާގެ ފިނޭންސް މިނިސްޓްރީން ވަނީ 44.2 މިލިޔަން އެމެރިކާ ޑޮލަރުގެ އެހީ ދިނުމަށް ނިންމާފައެވެ.