އެމެރިކާގެ ރިޔާސީ ގަނޑުވަރު – ވައިޓްހައުސްގެ ތެރެއިން މަސްތުވާތަކެތީގެ ބާވަތެއް ކަމުގައިވާ ކޮކެއިން ފެނުމާ ގުޅިގެން ތަހުޤީޤު ކުރަން ފަށައިފިއެވެ. މަސްތުވާތަކެތި ފެނިފައި ވަނީ ވައިޓް ހައުސްގެ ވެސްޓް ވިންގުންނެވެ. އެއީ، ރައީސް ޖޯ ބައިޑަންގެ އޮފީސްކޮޅު ކަމުގައިވާ އޯވަލް އޮފީސް ވެސް ހުންނަ ޢިމާރާތެވެ.
އޯވަލް އޮފީހުގެ އިތުރުން ބައިޑަންގެ އެންމެ އަރިސް ބޭފުޅުންގެ އޮފީސްތައް ވެސް ހުންނަނީ ވެސްޓް ވިންގުގައެވެ. އެ ތަނުން ކޮކެއިން ފެނުމާ އެކު ވައިޓް ހައުސްގެ ސަލާމަތީ ކަންކަން ބަލަހައްޓާ ސީކްރެޓް ސަރވިސްއިން ވަނީ އެ ޢިމާރާތް ކުޑަ ވަގުތުކޮޅަކަށް ހުސްކޮށްފައެވެ. އެ ވަގުތު ބައިޑަން ހުންނެވީ އޭނާގެ ޢާއިލާއާ އެކު މޭރީލެންޑުގެ ކޭމްޕެ ޑޭވިޑްގައެވެ.
ކޮކެއިން ފެނިފައި ވަނީ، ވައިޓް ހައުސްއަށް ޒިޔާރަތް ކުރާ މީހުންނަށް ވެސް ވަދެވޭ ހިސާބަކުން ކަމުގައި މި ހާދިސާގެ ތަހުޤީޤުގައި އިސްކޮށް ހަރަކާތްތެރިވާ އޮފިޝަލުން ވިދާޅުވިއެވެ. އެ ތަކެތި ފެނިފައި ވަނީ ވައިޓް ހައުސްގެ މުވައްޒަފުންނާއި ބޭރުން ޒިޔާރަތްކުރާ މީހުންގެ މޯބައިލް ފޯނުތައް ބަހައްޓާ ސްޓޯރޭޖް ފެސިލިޓީއެއްގެ ތެރެއިންނެވެ.
ވައިޓް ހައުސްގެ ތެރެއަށް މަސްތުވާތަކެތި އެތެރެކުރި މީހަކާއި، އެ ތަކެތި އެ ތަނަށް ވެއްދި ގޮތެއް ހޯދުމަށް ސީކްރެޓް ސަރވިސްއިން ފުރިހަމަ ތަހުޤީޤެއް ހިންގާނެ ކަމުގައި ވައިޓް ހައުސްގެ އޮފިޝަލުން ވިދާޅުވިއެވެ. އަދި، ހުރިހާ ކެމެރާތަކާއި، ވަދެނިކުމެ ހަދާފައިވާ މީހުންގެ މަޢުލޫމާތު ބަލަހައްޓާ ލޮގުތައް ވެސް ބަލާނެ ކަމުގައި އޮފިޝަލުން ވިދާޅުވިއެވެ.
ބައިޑަން މަސައްކަތް ކުރައްވާ އޯވަލް އޮފީހާއި، އޭނާގެ ބައްދަލުވުންތައް ބާއްވަވާ އެހެން އޮފީސްތަކުގެ އިތުރުން ކުއްލި ހާލަތްތައް މޮނީޓަރުކުރުމަށް ބޭނުންކުރާ ސިޓުއޭޝަން ރޫމާއި ނައިބު ރައީސް ކަމަލާ ހެރިސްގެ އޮފީސްކޮޅު ވެސް ހުންނަނީ ވައިޓް ހައުސްގެ ވެސްޓް ވިންގުގައި ކަން ފާހަގަ ކުރެވެއެވެ.