އިނގިރޭސި ވިމެންސް ސުޕަ ލީގުގެ އެސްޓަން ވިލާއަށް ކުޅެމުން އައި އިންގްލަންޑުގެ ގޯލްކީޕަރ ހަނާ ހެމްޕްޓަން ޗެލްސީއަށް ސޮއިކޮށްފިއެވެ.
މައުލޫމާތު ލިބިފައިވާ ގޮތުގައި ހެމްޕްޓަން ޗެލްސީއަށް ސޮއިކޮށްފައިވަނީ ވިލާގެ އެގްރީމަންޓް ހަމަވުމުން ފްރީ އެޖެންޓެއްގެގޮތުގައެވެ. އުމުރުން 22 އަހަރުގެ ހެމްޕްޓަންވަނީ ވިލާއިން އެގްރީމަންޓް އާކުރުމަށް ދިން ހުށަހެޅުން ގަބޫލްނުކޮށްފައެވެ. އަދި ވިމެންސް ސުޕަރ ލިގުގެ ޗެމްޕިއަން ޗެލްސީ އާއި ގުޅިފައިވަނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ.
ޗެލްސީއަށް ސޮއިކުރުމަށްފަހު ހެމްޕްޓަން ހާމަކުރިގޮތުގައި ޗެލްސީއަކީ ވަރަށް ބޮޑު ކްލަބެއް ކަމަށާއި ޗެލްސީއަށް ސޮއިކޮށް އެ ކްލަބްގެ ޖާރޒީ ލުމަކީ އޭނާއަށް ލިބިގެންދާ ފަހުރެއް ކަމަށެވެ. އަދި ބޭނުންވަނީ އޭނާގެ ކުޅުން ރަނގަޅުކޮށް ޓީމަށް ވެވުނު ހުރިހާ ގޮތަކުން އެހީތެރިވެ ޗެލްސީއާއެކު ތަށިތަކެއް ހޯދަން ކަމަށެވެ.
ހެމްޕްޓަންއަކީ މިވަގުތު އަރަމުން އަންނަ އިންގްލަންޑްގެ ޒުވާން ކީޕަރުންގެ ތެރެއިން އެއް ކީޕަރެވެ. އަދި ސުޕަރ ލީގުގެ ގިނަ ކްލަބްތަކަކުން އޭނާ ހޯދުމަށް މަސައްކަތް ކުރިކަމަށް ހަބަރު ލިބެއެވެ.
ހެމްޕްޓަން ވިލާއާއި ގުޅިފައިވަނީ 2021 ވަނަ އަހަރު ބަރމިންގހަމް ސިޓީންނެވެ. އަދި މިދިޔަ ސީޒަންގައި ވިލާއަށް 15 މެޗް ކުޅެދީފައިވެއެވެ. ޗެލްސީގެ ކޯޗް އެމާ ހޭސް ހާމަކުރިގޮތުގައި ހެމްޕްޓަން އަކީ މިވަގުތު އިންގްލަންޑްގައި އަރަމުން އަންނަ ޒުވާން ކީޕަރުންގެ ތެރެއިން އެންމެ ފާހަގަ ކޮށްލެވޭ އެއް ކިޕަރު ކަމަށެވެ. އޭނާގެ ކުޅުން އަހަރުން އަހަރަށް އަންނަނީ ރަނގަޅު ވަމުން ކަމަށާއި އަދި ޗެލްސީ އާއެކު އޭނާއަށް މުސްތަގްބަލް އެބައޮތް ކަމަށްވެސް ހޭސް ހާމަކުރިއެވެ.