ހުޅަނގު އައްސޭރީގެ ޖިނީނަށް އަރައި ޔަހޫދީ އިސްރާޢީލުން ހިންގި ލާއިންސާނީ ޖަރީމާތަކުގައި ފަލަސްޠީނުގެ 12 މީހުން ޝަހީދުކޮށްލުމަށްފަހު އެ މީހުން އެ ރަށުން ފައިބައިފިއެވެ. ޔަހޫދީ ސިފައިން ޖިނީނަށް އަރައި އެ ރަށުގައިވާ ރެފިއުޖީ ކޭމްޕަށް ވަރުގަދަ ޑްރޯން ހަމަލަތަކެއްދީ 100 އަށްވުރެ ގިނަ މީހުން ވަނީ ޒަޚަމުކޮށްލާފައެވެ. މި އުދުވާންތަކާ ގުޅިގެން ޖިނީންގެ ރައްޔިތުން ތިބީ ބިރުވެރިކަމެއްގެ ތެރޭގައެވެ. އަދި، ގިނަ ޢަދަދެއްގެ ބަޔަކު ވަނީ ޖިނީން ދޫކޮށް އެހެން ހިސާބުތަކަށް ބަދަލުވެފައެވެ.
ޖިނީންގައި 11 މީހަކު ޝަހީދުކޮށްލާފައިވާއިރު، ޔަހޫދީ ސިފައިން ވަނީ ރާމަﷲއަށް އަރައި ފަލަސްޠީނުގެ ރައްޔިތެއްގެ ބޮލަށް ބަޑިޖަހައި އޭނާ ޝަހީދުކޮށްލާފައެވެ. ޖިނީންގައި ހިންގަމުންދިޔަ ލާއިންސާނީ އުދުވާންތައް ހުއްޓައިލުމަށް ފަހު ޔަހޫދީ ޓެރެރިސްޓު ސިފައިން އެ ރަށުން ފައިބާފައިވީ ނަމަވެސް، އެ މީހުން ވަނީ ޣައްޒާއަށް ވެސް ބޮންއަޅަން ފަށާފައެވެ.
ޢައްޒާއަށް ބޮން އަޅަން ފަށާފައި ވަނީ، ޖިނީންގައި ހިންގަމުންދިޔަ ލާއިންސާނީ ޖަރީމާތަކުގެ ރައްދުގައި މުޖާހިދުންގެ ޖަމާޢަތްތަކުން އިސްރާޢީލަށް ރޮކެޓް ހަމަލަތަކެއް ދިނުމާ ގުޅިގެންނެވެ. ރޮކެޓް ހަމަލަތަކާ ގުޅިގެން އިސްރާޢީލުން ވަނީ އަޔަން ޑޯމް ވައިގެ ދިފާޢީ ނިޒާމު އެކްޓިވޭޓްކޮށް ބޭނުންކުރަން ފަށާފައެވެ.
ޖިނީންގައި ހިންގާފައިވާ ލާއިންސާނީ އުދުވާންތަކަކީ ފާއިތުވި 20 ވަރަކަށް އަހަރުގެ ތެރޭގައި އިސްރާޢީލުން ހިންގާފައިވާ އެންމެ ބޮޑު އަސްކަރީ އޮޕަރޭޝަން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. މި އޮޕަރޭޝަންގައި ޔަހޫދީ ޖައްބާރު އަސްކަރިއްޔާއިން ވަނީ ހެލިކޮޕްޓަރާއި ޑްރޯންގެ އިތުރުން ބުލްޑޯޒަރުތައް ވެސް ބޭނުންކޮށް، ފަލަސްޠީން ރައްޔިތުންގެ ގެދޮރާއި މުދަލަށް ބޮޑެތި ގެއްލުންތަކެއް ދީފައެވެ.
މީގެ ދެ ހަފުތާއެއްހާ ދުވަސް ކުރިން ވެސް ޔަހޫދީ ޓެރެރިސްޓު އަސްކަރިއްޔާގެ ސިފައިން ވަނީ ޖިނީނަށް އަރައި އުދުވާންތަކެއް ހިންގާފައެވެ. އަސްކަރީ ހެލިކޮޕްޓަރުތައް ބޭނުންކޮށްގެން ހިންގި އެ އުދުވާންތަކުގައި ވެސް ފަލަސްޠީނުގެ ހަތް މީހުން ޝަހީދުކޮށްލިއެވެ. ފަލަސްޠީނުގެ ޚާރިޖީ ވުޒާރާއިން ބުނީ ޔަހޫދީ އިސްރާޢީލުން ފަލަސްޠީނުގެ ނިކަމެތި ރައްޔިތުންނާ ދެކޮޅަށް ހަނގުރާމަ ކުރަމުންދާ ކަމުގައެވެ.
ޖިނީން ރެފިއުޖީ ކޭމްޕަކީ 14,000 އަށްވުރެ ގިނަ ރެފިއުޖީން ދިރިއުޅޭ ކޭމްޕެކެއެވެ. އެ ތަނަށް ހަމަލަދޭން ޔަހޫދީ އިސްރާޢީލުން ހަ ޑްރޯނެއް ބޭނުން ކޮށްފައިވާ ކަމުގައި ރިޕޯޓުތައް ބުނެއެވެ. 2006 ވަނަ އަހަރަށް ފަހު ޔަހޫދީ އިސްރާޢީލުން އަނެއްކާ ވެސް މި ވަނީ ފަލަސްޠީނުގެ މުސްލިމުން ޝަހީދުކުރަން އަސްކަރީ ޑްރޯންތައް ބޭނުންކުރަން ފަށާފައެވެ.
ޔަހޫދީ އިސްރާޢީލުން ޖިނީންގައި ހިންގަމުންދާ ލާއިންސާނީ ޖަރީމާތަކާ މެދު ޢަރަބި ދުނިޔޭގެ އިތުރުން އެމެރިކާއިން ވެސް ވަނީ ކަންބޮޑުވުން ފާޅުކޮށްފައެވެ. އެމެރިކާގެ ޚާރިޖީ ވުޒާރާއިން ބުނީ ޖިނީންގެ ހާލަތު ވަރަށް ގާތުން ބަލަމުންދާ ކަމުގައެވެ. އަދި، ޢާންމުންގެ އިތުރު މީހުންގެ ފުރާނަ ގެއްލުނަ ނުދިނުމުގެ ގޮތުން އެޅެން އޮތް ހުރިހާ ފިޔަވަޅެއް އެޅުމަށް ގޮވައިލާފައެވެ. ފާއިތުވި އަހަރެއްހާ ދުވަހުގެ ތެރޭގައި ޔަހޫދީ ޓެރެރިސްޓު އަސްކަރިއްޔާއިން ކޮންމެ ދުވަހަކު ކަހަލަ ގޮތަކަށް ޖިނީނަށް ހަމަލަދީފައިވާ ކަން ފާހަގަކުރެވެއެވެ.
ޔަހޫދީ އިސްރާޢީލުން ފަލަސްޠީނުގެ ބިންތަކަށް އަރައި ހުޅަނގު އައްސޭރީގައި ދިރިއުޅޭ ރައްޔިތުން އަޅުވެތިކޮށްފައި ވަނީ 1967 ވަނަ އަހަރުގެ ހަނގުރާމައަށް ފަހުއެވެ. އެއަށްފަހު ފަލަސްޠީނުގެ ބިންތަކުގައި 490,000 އަށްވުރެ ގިނަ ޔަހޫދީން ވަނީ ވަޒަންވެރި ކުރުވާފައެވެ. ޔަހޫދީ އިސްރާޢީލުގެ ޖައްބާރު އަސްކަރިއްޔާއިން މި އަހަރުގެ މިހާތަނަށް ހިންގާފައިވާ ލާއިންސާނީ ޖަރީމާތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 185 އަށް އަރާފައެވެ. އޭގެ ތެރޭގައި ގިނައީ ކުށެއް ނެތް ޢާންމުންނާއި ކުޑަކުދިންނެވެ.